ব্যতিক্ৰম গ্ৰুপৰ উদ্যোগত গুৰু গৌৰৱ সন্মান ২০২৬ৰ দ্বিতীয় সংস্কৰণ
আপাৰ অসমৰ ৫০গৰাকী শিক্ষক-শিক্ষয়িত্ৰীক সন্মাননা
চাইন অন ডেস্ক,৩০ছেপ্টেম্বৰ:
শিক্ষক সমাজৰ অৱদান আৰু সমাজ গঠনত তেওঁলোকৰ গুৰুত্বপূৰ্ণ ভূমিকাৰ প্ৰতি শ্ৰদ্ধা জনাই ব্যতিক্ৰম গ্ৰুপৰ উদ্যোগত আয়োজিত ‘গুৰু গৌৰৱ সন্মান ২০২৬’ৰ দ্বিতীয় সংস্কৰণ (আপাৰ অসম) অনুষ্ঠিত হ’ব। এই উপলক্ষে আজি ডিব্ৰুগড়ৰ হোটেল ট্ৰি কান্ট্ৰিত এক সংবাদমেল অনুষ্ঠিত হয়। সংবাদমেলত উপস্থিত থাকে জেআইএছ গ্ৰুপৰ ডেপুটি ডাইৰেক্টৰ—বিজনেছ ডেভেলপমেণ্ট বিদ্যুৎ মজুমদাৰ, সমাজকৰ্মী সামিম আখতৰা আলী, ব্যতিক্ৰম গ্ৰুপৰ কৰ্ণধাৰ ড° সৌমেন ভাৰতীয়া প্ৰমুখ। সংবাদমেলৰ জৰিয়তে অনুষ্ঠানটোৰ বিভিন্ন দিশ, সন্মানপ্ৰাপকসকলৰ বিষয়ে আৰু এইবাৰৰ আয়োজনৰ বিশেষ তাৎপৰ্য সম্পৰ্কে বিতংভাৱে অৱগত কৰা হয়।
আপাৰ অসমৰ শিক্ষা, জ্ঞানচৰ্চা, সংস্কৃতি আৰু সমাজ গঠনত দীৰ্ঘদিন ধৰি গুৰুত্বপূৰ্ণ অৱদান আগবঢ়াই অহা ৫০গৰাকী শিক্ষক-শিক্ষয়িত্ৰীক এইবাৰৰ ‘গুৰু গৌৰৱ সন্মান ২০২৬’ত সন্মানিত কৰা হ’ব। অহা ১ অক্টোবৰত ডিব্ৰুগড়ৰ ডি.এইচ.এছ.কে. কলেজ অডিটৰিয়ামত বিয়লি ৪ বজাৰ পৰা অনুষ্ঠানটো অনুষ্ঠিত হ’ব।
এইবাৰৰ ‘গুৰু গৌৰৱ সন্মান ২০২৬’ৰ দ্বিতীয় সংস্কৰণটো বিশিষ্ট শিক্ষাবিদ, অভিনেত্ৰী, অসমীয়া লেখিকা আৰু মানৱীয় গুণসম্পন্ন ব্যক্তিত্ব প্ৰয়াত জাবিন আখতৰা বেগমৰ (১৯৫০–২০২২) পৱিত্ৰ স্মৃতিৰ উদ্দেশ্যে উৎসৰ্গা কৰা হৈছে। ভিক্টোৰিয়া বেংগলি গাৰ্লছ হায়াৰ ছেকেণ্ডাৰী স্কুলৰ উপাধ্যক্ষ হিচাপে তেওঁ শিক্ষা, সাহিত্য, নাট্যচৰ্চা আৰু সংস্কৃতিৰ ক্ষেত্ৰত দীৰ্ঘদিন গুৰুত্বপূৰ্ণ ভূমিকা পালন কৰিছিল। তেওঁৰ শিক্ষাদৰ্শন, সাংস্কৃতিক কৰ্মকাণ্ড আৰু মানৱীয় মূল্যবোধে বহু প্ৰজন্মক অনুপ্ৰাণিত কৰি আহিছে। তেওঁৰ অসামান্য অৱদান আৰু মানৱীয় উত্তৰাধিকাৰৰ প্ৰতি শ্ৰদ্ধা জনাই এইবাৰৰ অনুষ্ঠানটো তেওঁৰ স্মৃতিৰ উদ্দেশ্যে উৎসৰ্গা কৰা হৈছে।
অনুষ্ঠানত বিশিষ্ট অতিথি হিচাপে উপস্থিত থাকিব ডিব্ৰুগড় পৌৰ নিগমৰ মেয়ৰ ড° সৈকত পাত্ৰ, ভবানীপুৰ গ্লোবেল কেম্পাছৰ এছ’চিয়েট ভাইচ প্ৰেছিডেণ্ট তথা হেড, অফিচ অৱ এডমিছনছ এণ্ড আউটৰিচ জয়ন্ত বাগচী, জেআইএছ গ্ৰুপৰ ডেপুটি ডাইৰেক্টৰ—বিজনেছ ডেভেলপমেণ্ট বিদ্যুৎ মজুমদাৰ, জেটউইংস গ্ৰুপ অৱ ইনষ্টিটিউটছৰ অধ্যক্ষ সঞ্জয় আদিত্য সিং, সমাজকৰ্মী সামিম আখতৰা আলী, ব্যতিক্ৰম গ্ৰুপৰ কৰ্ণধাৰ ড° সৌমেন ভাৰতীয়া প্ৰমুখ।
এইবাৰৰ সন্মানপ্ৰাপকসকলৰ সৈতে জড়িত বিভিন্ন শিক্ষানুষ্ঠানৰ ভিতৰত আছে—ডি.আই.ই.টি., চাবুৱা; দিল্লী পাব্লিক স্কুল, ডিব্ৰুগড়; ড° ৰাধাকৃষ্ণন স্কুল অৱ আৰ্টছ, কমাৰ্চ এণ্ড ছায়েন্স; কেৰিয়াৰ পইণ্ট এডুভেঞ্চাৰ প্ৰাইভেট লিমিটেড; তিনিচুকীয়া শেশাকোষ মিডল ইংলিছ স্কুল; বাকপাৰা এম.ই. স্কুল; ডিব্ৰুগড় বেংগলি হাই স্কুল; নন্দেশ্বৰ চক্ৰৱৰ্তী হাই স্কুল; মানকাটা এম.ই. স্কুল; শান্তিপাৰা বেংগলি হাই স্কুল; ডিকোম পি.ডি.এম.ই. স্কুল; জেউতি মৰল এম.ই. স্কুল; ডিব্ৰুগড় বিশ্ববিদ্যালয়; ডি.এইচ.এছ.কে. কলেজ; শ্ৰী অগ্ৰসেন একাডেমী; কেন্দ্ৰীয় বিদ্যালয়, অইল, দুলীয়াজান; ছেইণ্ট জুড স্কুল; বিবেকানন্দ কেন্দ্ৰ বিদ্যালয়, তিনিচুকীয়া; খোৱাং কলেজ; গুৰুুকুল সংগীত নৃত্য কলাকেন্দ্ৰ, ডিব্ৰুগড়; মাৰ্গাৰিটা কলেজ; ডন বস্কো হায়াৰ ছেকেণ্ডাৰী স্কুল, ডিব্ৰুগড়; ৰামধেনু আৰ্ট এণ্ড ক্ৰাফ্ট একাডেমী; এন.কে.ডি. ছিনিয়ৰ ছেকেণ্ডাৰী স্কুল, তিনিচুকীয়া; গভৰ্ণমেণ্ট বয়জ হায়াৰ ছেকেণ্ডাৰী স্কুল, ডিব্ৰুগড়; কেন্দ্ৰীয় বিদ্যালয়, ডিব্ৰুগড়; ভাৰত স্কাউটছ এণ্ড গাইডছ; সম্পূৰ্ণ কেন্দ্ৰীয় বিদ্যালয়, ডিব্ৰুগড়; নাহৰতলি টি.ই. মডেল হায়াৰ ছেকেণ্ডাৰী স্কুল; দিগবৈ কলেজ; দুলীয়াজান নৱজ্যোতি এম.ই. স্কুল; ময়ূৰী নৃত্য নিকেতন; ডুমডুমা কলেজ; মনোহৰী দেৱী কানৈ গাৰ্লছ কলেজ; ৰহমৰীয়া হায়াৰ ছেকেণ্ডাৰী স্কুল; বিদ্যা ভাৰতী ইণ্টাৰনেশ্যনেল স্কুল, তিনিচুকীয়া; ছেইণ্ট থমাছ স্কুল, দুলীয়াজান; লিটল ফ্লাৱাৰ হায়াৰ ছেকেণ্ডাৰী স্কুল; অসম হাইটছ পাব্লিক স্কুল, তিনিচুকীয়া; ছল্ট ব্ৰুক একাডেমী, ডিব্ৰুগড়।
শিক্ষাক্ষেত্ৰত দীৰ্ঘদিনীয়া নিষ্ঠা, অৱদান আৰু সমাজ নিৰ্মাণত শিক্ষকৰ ভূমিকাৰ প্ৰতি সন্মান জনোৱাই ‘গুৰু গৌৰৱ সন্মান’ৰ মূল উদ্দেশ্য। এগৰাকী শিক্ষক কেৱল পাঠ্যবিষয় শিকোৱাৰ মাজতে সীমাবদ্ধ নাথাকে; জ্ঞান, মূল্যবোধ, অনুশাসন আৰু মানৱীয়তাৰ জৰিয়তে তেওঁ ভৱিষ্যৎ প্ৰজন্মৰ পথ নিৰ্মাণ কৰে। সেই মহান ভূমিকাৰ প্ৰতি শ্ৰদ্ধা জনোৱাৰ বাবেই এই উদ্যোগ।
আপাৰ অসমৰ বিভিন্ন প্ৰান্তত নীৰৱে শিক্ষা আৰু মূল্যবোধৰ পোহৰ বিলাই অহা শিক্ষক-শিক্ষয়িত্ৰীসকলক সন্মান জনোৱাৰ জৰিয়তে ‘গুৰু গৌৰৱ সন্মান ২০২৬’ৰ দ্বিতীয় সংস্কৰণে শিক্ষকতাৰ মৰ্যাদা আৰু গুৰুত্ব অধিক সুদৃঢ় কৰাৰ লগতে আগন্তুক প্ৰজন্মক অনুপ্ৰাণিত কৰিব বুলি আয়োজকসকলে আশা প্ৰকাশ কৰিছে।
ব্যতিক্ৰম গ্ৰুপৰ কৰ্ণধাৰ ড° সৌমেন ভাৰতীয়াই কয়, “এগৰাকী শিক্ষকৰ অৱদান কেতিয়াও কেৱল শ্ৰেণীকোঠাৰ চাৰি বেৰৰ মাজতে সীমাবদ্ধ নাথাকে। এগৰাকী আদৰ্শ শিক্ষকে তেওঁৰ জ্ঞান, মূল্যবোধ, মানৱীয়তা আৰু জীৱনদৰ্শনৰ জৰিয়তে প্ৰজন্মৰ পিছত প্ৰজন্মক গঢ় দিয়ে। ‘গুৰু গৌৰৱ সন্মান’ৰ জৰিয়তে আমি সেই নীৰৱ নিৰ্মাতাসকলৰ প্ৰতি কৃতজ্ঞতা আৰু শ্ৰদ্ধা নিবেদন কৰিব বিচাৰিছোঁ। আপাৰ অসমৰ বিভিন্ন প্ৰান্তত দীৰ্ঘদিন ধৰি শিক্ষা আৰু সমাজ গঠনত অৱদান আগবঢ়াই অহা ৫০গৰাকী শিক্ষক-শিক্ষয়িত্ৰীক সন্মান জনাবলৈ পাই আমি গৌৰৱান্বিত। এইবাৰৰ অনুষ্ঠানটো প্ৰয়াত শিক্ষাবিদ, অভিনেত্ৰী, লেখিকা আৰু মানৱীয় ব্যক্তিত্ব জাবিন আখতৰা বেগমৰ পৱিত্ৰ স্মৃতিৰ উদ্দেশ্যে উৎসৰ্গা কৰা হৈছে। শিক্ষা আৰু সংস্কৃতিৰ ক্ষেত্ৰত তেওঁৰ অৱদান আমাৰ সকলোৰে বাবে অনুপ্ৰেৰণাৰ উৎস। তেওঁৰ স্মৃতিক সন্মান জনোৱাৰ লগতে এই আয়োজনৰ জৰিয়তে আগন্তুক প্ৰজন্মৰ ওচৰত শিক্ষকৰ মৰ্যাদা আৰু গুৰুত্ব অধিক গভীৰভাৱে তুলি ধৰিব বিচাৰিছোঁ।”
জেআইএছ গ্ৰুপৰ ডেপুটি ডাইৰেক্টৰ—বিজনেছ ডেভেলপমেণ্ট বিদ্যুৎ মজুমদাৰে কয়, “অসমৰ বিভিন্ন প্ৰান্তত ব্যতিক্ৰম গ্ৰুপৰ সৈতে জড়িত হৈ ইয়াৰ পূৰ্বে একাধিক অনুষ্ঠানত অংশগ্ৰহণ কৰাৰ সুযোগ পাইছোঁ। সেই ধাৰাবাহিকতাত এইবাৰ আপাৰ অসমলৈ আহি ‘গুৰু গৌৰৱ সন্মান’ৰ দৰে এক গুৰুত্বপূৰ্ণ উদ্যোগৰ সৈতে জড়িত হ’বলৈ পাই মই অত্যন্ত আনন্দিত। শিক্ষকসকলক সন্মান জনোৱা আৰু তেওঁলোকৰ অৱদানক বৃহত্তৰ সমাজৰ সন্মুখত তুলি ধৰাৰ এই উদ্যোগ সঁচাকৈয়ে তাৎপৰ্যপূৰ্ণ। আপাৰ অসমৰ শিক্ষক-শিক্ষয়িত্ৰীসকলৰ সৈতে এই অনুষ্ঠানৰ জৰিয়তে সংযুক্ত হ’বলৈ পাই মই বিশেষভাৱে আনন্দিত আৰু আগন্তুক দিনতো এনে উদ্যোগৰ সৈতে জড়িত হৈ থকাৰ আশা ৰাখিছোঁ।”
সমাজকৰ্মী সামিম আখতৰা আলীয়ে কয়, “ব্যতিক্ৰম গ্ৰুপৰ সৈতে মই দীৰ্ঘদিন ধৰি জড়িত হৈ আছোঁ আৰু তেওঁলোকৰ বিভিন্ন সামাজিক আৰু সাংস্কৃতিক কৰ্মকাণ্ডৰ সৈতে থকাৰ সুযোগ পাইছোঁ। ডিব্ৰুগড় মোৰ নিজৰ চহৰ, সেয়েহে নিজৰ চহৰলৈ আহি ব্যতিক্ৰমৰ এনে এক গুৰুত্বপূৰ্ণ উদ্যোগৰ সৈতে জড়িত হ’বলৈ পাই মোৰ আনন্দ আৰু অধিক বৃদ্ধি পাইছে। ‘গুৰু গৌৰৱ সন্মান’ৰ দৰে এক অনুষ্ঠানৰ জৰিয়তে আপাৰ অসমৰ শিক্ষক-শিক্ষয়িত্ৰীসকলক সন্মান জনোৱা হৈছে, যিটো অত্যন্ত তাৎপৰ্যপূৰ্ণ। নিজৰ চহৰত থিয় হৈ এই আয়োজনৰ অংশীদাৰ হ’বলৈ পাই মই সঁচাকৈয়ে আনন্দিত আৰু গৌৰৱান্বিত।”