ৰাষ্ট্ৰীয় পৰ্যায়ৰ বিদ্যাৰ্থী বিজ্ঞান মন্থন পৰীক্ষাত
জিলিকিল ডিব্ৰুগড় গীতাৰ্থ প্ৰতীম ভূঞা
চাইন অন ডেস্ক,২২মে’:
ৰাষ্ট্ৰীয় পৰ্যায়ত ডিব্ৰুগড়ৰ ছাত্ৰ গীতাৰ্থ প্ৰতীম ভূঞা বিদ্যাৰ্থী বিজ্ঞান মন্থন পৰীক্ষাত কৃতকাৰ্য লাভ কৰি সৰ্বভাৰতীয় ক্ষেত্ৰত 
ডিব্ৰুগড়ৰ নাম উজ্বলাই তুলিবলৈ সক্ষম হৈছিল ডিব্ৰুগড়ৰ শিক্ষা ভেলী স্কুলৰ একাদশ শ্ৰেণীৰ বিজ্ঞান শাখাৰ ছাত্ৰ গীতাৰ্থ প্ৰতীম ভূঞা। গুজৰাটৰ গান্ধীনগৰ আই আই টি ত ১৬ আৰু ১৭ মে’ত দুদিনীয়াকৈ অনুষ্ঠিত ৰাষ্ট্ৰীয় পৰ্যায়ৰ কৰ্মশালা আৰু পৰীক্ষাত উত্তীৰ্ণ হৈ গীতাৰ্থ ভূঞাই ৰাষ্ট্ৰীয় পৰ্যায়ৰ গৱেষণা প্ৰতিষ্ঠান আই আই এছ ই আৰ, ইচৰো, আই আই এছ চি আদিত ব্যৱহাৰিক প্ৰশিক্ষন কৰিবলৈ সুবিধা লাভ কৰে। বিদ্যাৰ্থী বিজ্ঞান মন্থন হ’ল বিজ্ঞান ভাৰতীয়ে এন চি ই আৰ টি ভাৰত চৰকাৰৰ শিক্ষা বিভাগ আৰু এন চি এছ এমৰ সহযোগত পৰিচালনা কৰা এক ৰাষ্ট্ৰীয় পৰ্যায়ৰ কৰ্মশালা আৰু পৰীক্ষা। স্কুল, জিলা, ৰাজ্যিক, মণ্ডল আৰু শেষত ৰাষ্ট্ৰীয় পৰ্যায়ত এই পৰীক্ষা অনুষ্ঠিত হয়। ৰাজ্যিক
আৰু মণ্ডল পৰ্যায়ৰ কৰ্মশালা আৰু পৰীক্ষাত উত্তীৰ্ণ হোৱা দুই জনকৈ শিক্ষাৰ্থীয়ে ৰাষ্ট্ৰীয় পৰ্যায়ৰ কৰ্মশালা আৰু পৰীক্ষাত অংশগ্ৰহণৰ সুযোগ লাভ কৰে। গীতাৰ্থই গুৱাহাটীত অনুষ্ঠিত হোৱা ৰাজ্যিক পৰ্যায়ৰ পৰা নিৰ্বাচিত হৈ গুজৰাটৰ গান্ধীনগৰ আই আই টিত অনুষ্ঠিত ৰাষ্ট্ৰীয় পৰ্যায়ৰ কৰ্মশালা আৰু পৰীক্ষাত অংশগ্ৰহণৰ সুযোগ লাভ কৰে। ৰাষ্ট্ৰীয় পৰ্যায়ৰ কৰ্মশালা আৰু পৰীক্ষাতো কৃতকাৰ্য লাভ কৰিবলৈ সক্ষম হৈ গীতাৰ্থ ভূঞাই ৰাষ্ট্ৰীয় পৰ্যায়ত 
জিলিকি উঠে আৰু সৃজন ইন্তাৰ্শিপ লাভ কৰিবলৈ সক্ষম হয়। এই ব্যৱহাৰিক প্ৰশিক্ষন ভাৰতীয় মহাকাশ গৱেষণা সংস্থা ইছৰো,আই আই এচ চি বাঙ্গালোৰ,আই পি এচ ই আৰ অথবা আই আই টি সমূহত অনুষ্ঠিত হ’ব। উল্লেখযোগ্য যে গীতাৰ্থ প্ৰতীম ভূঞাই সদ্য ঘোষিত হাইস্কুল শিক্ষান্ত পৰীক্ষাত ডিব্ৰুগড়ৰ ছল্ট ব্ৰুক স্কুলৰ পৰা ৯৭ শতাংশ নম্বৰ লাভ কৰি উত্তীৰ্ণ হৈছে। গীতাৰ্থ ভূঞা টেঙাখাত মহাবিদ্যালয় সহযোগী অধ্যাপক ডঃ প্ৰাঞ্জল ভূঞা আৰু আৰু ডিব্ৰুগড় বিশ্ববিদ্যালয়ৰ শিক্ষাতত্ব বিভাগৰ সহযোগী অধ্যাপিকা ডঃ মুন কলিতাৰ পুত্ৰ।