নিযুত মইনাৰ ধন লাভৰ আনন্দত মদ্যপান ছাত্ৰীৰ ?
ছাত্ৰীৰ ভিডিঅ’ ভাইৰেল, তীব্ৰ চাঞ্চল্য
আগমনি,৮আগষ্ট:
অসম চৰকাৰৰ নিযুত মইনা আঁচনিৰ ধন লাভৰ খবৰ পোৱাৰ পিছতে গোলকগঞ্জৰ চিলাৰায় মহাবিদ্যালয়ৰ একাংশ ছাত্ৰীয়ে মদ্যপান কৰাৰ অভিযোগ উত্থাপন হৈছে। এই ঘটনাৰ সৈতে জড়িত বুলি দাবী কৰা এটা ভিডিঅ’ সামাজিক মাধ্যমত ভাইৰেল হৈ পৰাৰ পিছতে সমগ্ৰ অঞ্চলটোতে তীব্ৰ চাঞ্চল্যৰ সৃষ্টি হৈছে। উল্লেখ্য, দুদিন পূৰ্বে গোলকগঞ্জ বিধানসভা সমষ্টিৰ বিধায়ক তথা অসম চৰকাৰৰ কেবিনেট মন্ত্ৰী অশ্বিনী ৰায়ে সৰকাৰে চিলাৰায় মহাবিদ্যালয়ত নিযুত মইনা আঁচনিৰ আনুষ্ঠানিকভাৱে শুভাৰম্ভ কৰিছিল। ইয়াৰ পিছদিনাই, অৰ্থাৎ বৃহস্পতিবাৰে, মহাবিদ্যালয়ৰ নিচেই কাষত পাঁচগৰাকী ছাত্ৰীয়ে মদ্যপানৰ আসৰ বহোৱাৰ অভিযোগ উত্থাপন হয়। 
সামাজিক মাধ্যমত ভাইৰেল হোৱা ভিডিঅ’টোত কেইগৰাকীমান যুৱতীক মদৰ বটলসহ দেখা গৈছে বুলি দাবী কৰা হৈছে। অৱশ্যে ভাইৰেল ভিডিঅ’টোৰ সত্যতা আৰু ঘটনাটোৰ সম্পূৰ্ণ পৰিপ্ৰেক্ষিত স্বতন্ত্ৰভাৱে নিশ্চিত হোৱা নাই।
ভিডিঅ’টো ভাইৰেল হোৱাৰ পিছতে বিষয়টো মহাবিদ্যালয় কৰ্তৃপক্ষৰ দৃষ্টিগোচৰ হয়। ইতিমধ্যে ঘটনাটোৰ সৈতে জড়িত বুলি অভিযোগ উঠা ছাত্ৰীকেইগৰাকী আৰু তেওঁলোকৰ অভিভাৱকসকলক মহাবিদ্যালয়ত উপস্থিত হ’বলৈ মাতি পঠিওৱা হৈছে বুলি জানিব পৰা গৈছে।