নতুন ইতিহাসঃ ৰূপালী পৰ্দাৰ পৰা ৰাজসিংহাসনলৈ, তামিলনাডুৰ মুখ্যমন্ত্ৰী হিচাপে শপত গ্ৰহণ থালাপথি বিজয়ৰ
জ্যোতিষ কুমাৰ পাতিৰ
তামিলনাডুৰ ৰাজনীতিত এক নতুন যুগৰ সূচনা। লাখ লাখ অনুৰাগী আৰু সমৰ্থকৰ হৰ্ষধ্বনিৰ মাজত আজি তামিলনাডুৰ নতুন মুখ্যমন্ত্ৰী হিচাপে শপত গ্ৰহণ কৰিলে জনপ্ৰিয় অভিনেতা তথা ‘তামিলাগা ভেট্ৰি কাজাগাম’ (TVK) দলৰ মুৰব্বী থালাপথি বিজয়ে। ইয়াৰ লগে লগে ৰূপালী পৰ্দাৰ এজন ছুপাৰষ্টাৰৰ পৰা এগৰাকী জননায়ক হিচাপে বিজয়ৰ যাত্ৰাই এক পূৰ্ণতা পালে।
আজি চেন্নাইত অনুষ্ঠিত এক বিশাল শপতগ্ৰহণ অনুষ্ঠানত ৰাজ্যপালৰ সন্মুখত বিজয়ে মুখ্যমন্ত্ৰী হিচাপে শপত লয়। অভিনয় জগতত কেইবাদশকো ধৰি একছত্ৰী সম্ৰাট হিচাপে ৰাজত্ব কৰাৰ পিছত এতিয়া তেওঁৰ কান্ধত পৰিছে তামিলনাডুৰ শাসনভাৰ। উল্লেখ্য যে, নিৰ্বাচনী ফলাফল ঘোষণাৰ পিছৰে পৰা ৰাজ্যখনত এক উৎসৱমুখৰ পৰিৱেশে বিৰাজ কৰিছে।
শপত গ্ৰহণৰ পিছতেই নিজৰ প্ৰথমটো, ভাষণত বিজয়ে কয় যে তেওঁৰ চৰকাৰ হ’ব ‘সাধাৰণ জনতাৰ চৰকাৰ’। দুৰ্নীতি নিৰ্মূল কৰা, শিক্ষা খণ্ডৰ আমূল পৰিৱৰ্তন আৰু দৰিদ্ৰ জনসাধাৰণৰ উন্নয়নৰ বাবে তেওঁ উৎসৰ্গিতভাৱে কাম কৰি যাব বুলি সংকল্প লয়। চিনেমাৰ পৰ্দাত যিদৰে তেওঁ অন্যায়ৰ বিৰুদ্ধে যুঁজ দিছিল, বাস্তৱ জীৱনতো ৰাইজৰ সমস্যা সমাধানৰ বাবে তেওঁ একেই উদ্যমেৰে কাম কৰিব বুলি অনুৰাগীসকল আশাবাদী।
ভাৰতীয় ৰাজনীতিত এম জি আৰ আৰু জয়াললিতাৰ দৰে মহান শিল্পীৰ পিছত বিজয়েই এনে এগৰাকী অভিনেতা, য’ত পোনপটীয়াকৈ জনতাৰ বিশাল সমৰ্থন লাভ কৰি মুখ্যমন্ত্ৰীৰ আসনত বহিবলৈ সক্ষম হৈছে। তেওঁৰ এই সফলতাই প্ৰমাণ কৰিলে যে জনসাধাৰণৰ প্ৰতি থকা দায়বদ্ধতা আৰু সঠিক আদৰ্শ থাকিলে এজন শিল্পীয়েও দেশৰ ভাগ্য সলনি কৰিব পাৰে।
থালাপথি বিজয়ৰ এই নতুন যাত্ৰাক লৈ সমগ্ৰ দেশজুৰি চৰ্চা চলিছে। অসমৰ পৰাও তেওঁৰ অলেখ অনুৰাগীয়ে ছ’চিয়েল মিডিয়াৰ জৰিয়তে শুভেচ্ছা জ্ঞাপন কৰিছে। এতিয়া সমগ্ৰ দেশৰ দৃষ্টি থাকিব বিজয়ৰ শাসনকালৰ ওপৰত— তেওঁ কেনেদৰে তামিলনাডুক এক নতুন মাত্ৰা প্ৰদান কৰে।