ঈদৰ পূৰ্বে ডিব্ৰুগড়ত আৰক্ষীৰ বৃহৎ অভিযান
জব্দ ৭টা চোৰাং গৰু
চোৰাং গৰুৰ সৰবৰাহত কোন?
চাইন অন ডেস্ক,২৭মে’:
ঈদ উপলক্ষে কোৰবানি দিয়াৰ আশংকাৰ মাজতে ডিব্ৰুগড় আৰক্ষীয়ে এক বিশেষ অভিযানত জব্দ কৰে ৭টা চোৰাং গৰু। ডিব্ৰুগড় চহৰৰ ব্ৰহ্মপুত্ৰ নৈৰ পাৰত মালিপট্টি অঞ্চলত সন্দেহজনকভাৱে গৰু মজুত কৰি ৰখাৰ তথ্য লাভ কৰাৰ পিছতে আৰক্ষীয়ে তৎপৰতা বৃদ্ধি কৰি অভিযান চলায়। জানিব পৰা মতে, ঈদৰ পূৰ্বে কোৰবানি দিয়াৰ উদ্দেশ্যে কিছুমান লোকে অঞ্চলটোত চোৰাংকৈ গৰুসমূহ লুকুৱাই ৰাখিছে বুলি আৰক্ষীয়ে গোপন সূত্ৰে তথ্য লাভ কৰিছিল। তথ্য লাভ কৰাৰ লগে লগে ডিব্ৰুগড় আৰক্ষীৰ এটা বিশেষ দলে 
ঘটনাস্থলীত উপস্থিত হৈ সমগ্ৰ অঞ্চলটো তন্ন তন্নকৈ তালাচি চলায়। অভিযানকালত আৰক্ষীয়ে ৭টা গৰু উদ্ধাৰ কৰিবলৈ সক্ষম হয়। তথাপিও অভিযানৰ সময়ত ঘটনাস্থলীত কোনো লোক উপস্থিত নাছিল আৰু গৰুসমূহৰ দাবীদাৰ হিচাপেও কোনো উপস্থিত নাচিল। ফলত আৰক্ষীয়ে গৰুসমূহ জব্দ কৰি নিজৰ জিম্মাত লৈ যায়। উদ্ধাৰ হোৱা গৰুসমূহ ক’ৰ পৰা অনা হৈছিল, কোনে সেই স্থানত ৰাখিছিল আৰু ইয়াৰ সৈতে কোনো চোৰাং চক্ৰ জড়িত আছে নেকি সেই দিশত আৰক্ষীয়ে তদন্ত অব্যাহত ৰাখিছে। আৰক্ষী সূত্ৰে জানিবলৈ দিয়া মতে, সমগ্ৰ ঘটনাটোৰ লগত জড়িত ব্যক্তিসকলক চিনাক্ত কৰাৰ বাবে ইতিমধ্যে তদন্ত আৰম্ভ কৰা হৈছে। অঞ্চলটোৰ কিছুমান লোকক সোধ-পোছ কৰাৰ লগতে বিভিন্ন দিশত অনুসন্ধান চলোৱা হৈছে। তদন্ত সম্পূৰ্ণ হোৱাৰ পিছত আইন অনুসৰি জড়িত সকলৰ বিৰুদ্ধে কঠোৰ ব্যৱস্থা গ্ৰহণ কৰা হ’ব বুলিও আৰক্ষীয়ে স্পষ্ট কৰি দিয়ে। উল্লেখযোগ্য যে, উৎসৱ-পাৰ্বণৰ সময়ছোৱাত
ডিব্ৰুগড় আৰক্ষীয়ে অবৈধ কাৰ্যকলাপ ৰোধ কৰাৰ উদ্দেশ্যে বিভিন্ন স্থানত কটকটীয়া নজৰদাৰী অব্যাহত ৰাখিছে। এই ঘটনাই পুনৰ এবাৰ চোৰাং গৰু সৰবৰাহ চক্ৰ সক্ৰিয় হৈ থকাৰ সন্দেহ উত্থাপন কৰিছে।