ডিব্ৰুগড় বিমানবন্দৰত ‘প্ৰদীপ্তি’ ইণ্টাৰ্নশ্বিপ
শিক্ষাৰ্থীসকলৰ মাহজোৰা সামৰণি
চাইন অন ডেস্ক,৩১জুলাই:
ভাৰতীয় বিমান প্ৰাধিকৰণ (AAI)ৰ অধীনস্থ ডিব্ৰুগড় বিমানবন্দৰত শুকুৰবাৰে মাহজোৰা ‘প্ৰদীপ্তি সমাৰ ইণ্টাৰ্নশ্বিপ প্ৰগ্ৰেম’ৰ সফল সামৰণি ঘটে। এই কাৰ্যসূচীৰ জৰিয়তে ডিব্ৰুগড় বিশ্ববিদ্যালয় আৰু ডিব্ৰুগড় হনুমানবক্স সুৰজমল কানৈ (ডি.এইচ.এছ.কে.) মহাবিদ্যালয়ৰ ৩০ গৰাকী শিক্ষাৰ্থীক কাৰ্যক্ষম বিমানবন্দৰ এটাৰ কাম-কাজৰ প্ৰত্যক্ষ অভিজ্ঞতা প্ৰদান কৰা হয়।
১ জুলাইৰ পৰা ৩১ জুলাইলৈ অনুষ্ঠিত এই কাৰ্যসূচীৰ উদ্দেশ্য আছিল ইলেক্ট্ৰনিক্স এণ্ড টেলিকমিউনিকেচন, বাণিজ্য আৰু গণিত বিভাগৰ শিক্ষাৰ্থীসকলক বিমানবন্দৰৰ মুখ্য বিভাগসমূহ— সংযোগ, নেভিগেচন আৰু নিৰীক্ষণ (CNS), এয়াৰ ট্ৰেফিক কণ্ট্ৰোল (ATC), বিত্ত, বাণিজ্যিক আৰু বিমানবন্দৰ পৰিচালনা (Airport Operations) বিভাগৰ সৈতে পৰিচিত কৰোৱা।
ইণ্টাৰ্নশ্বিপৰ সময়ত শিক্ষাৰ্থীসকলক প্ৰত্যেকটো বিভাগৰ দায়িত্ব আৰু কৰ্তব্যৰ বিষয়ে অৱগত কৰাৰ লগতে বিমানবন্দৰৰ কাম-কাজ নিৰাপদ আৰু দক্ষতাৰে চলাই 
নিয়াৰ বাবে ব্যৱহৃত ব্যৱস্থা তথা পদ্ধতিসমূহ প্ৰত্যক্ষ কৰোৱা হয়। বিষয়াসকলে জানিবলৈ দিয়া মতে, কেৱল শ্ৰেণীকোঠাৰ তত্ত্বীয় জ্ঞানতে আৱদ্ধ নাৰাখি শিক্ষানবিচসকলক বিমান পৰিবহণ নিৰাপত্তা ব্যৱস্থা আৰু আন্তঃবিভাগীয় সমন্বয়ৰ ব্যৱহাৰিক তথা প্ৰত্যক্ষ জ্ঞান প্ৰদানৰ ওপৰত গুৰুত্ব দিয়া হৈছিল।
প্ৰগ্ৰেমটো সমন্বয় কৰে সংশ্লিষ্ট বিভাগীয় মুৰব্বী ৰাইজউদ্দিন আহমেদ (CNS), কিশোৰ কল্লোল চেতিয়া (ATC), লাখ ঈশ্বৰ সোণোৱাল (Finance), সৌৰভ কুমাৰ (Airport Operations) আৰু চন্দ্ৰশেখৰ কুমাৰ (Commercial)-এ। তেওঁলোকে নিজ নিজ বিভাগত শিক্ষাৰ্থীসকলৰ প্ৰশিক্ষণ পৰিচালনা কৰে।
কাৰ্যসূচীৰ সামৰণি উপলক্ষে শুকুৰবাৰে এখন বিদায়ী সভা অনুষ্ঠিত হয়, য’ত ৩০ গৰাকী অংশগ্ৰহণকাৰীকে ইণ্টাৰ্নশ্বিপ সমাপ্তিৰ প্ৰমাণপত্ৰ প্ৰদান কৰা হয়। অনুষ্ঠানত বিমানবন্দৰৰ সঞ্চালকৰ লগতে ATC, CNS, Airport Operations, Finance, Commercial আৰু HR বিভাগৰ মুৰব্বীসকল উপস্থিত থাকে।
অনুষ্ঠানত বক্তব্য ৰাখি ডিব্ৰুগড় বিমানবন্দৰৰ সঞ্চালক বঙ্গাজিৎ সাহাই শিক্ষানবিচসকলক অভিনন্দন জনায় আৰু তেওঁলোকক শৈক্ষিক তথা বৃত্তিমূলক জীৱনত উৎকৃষ্টতা অৰ্জনৰ বাবে প্ৰচেষ্টা চলাই যাবলৈ উৎসাহিত কৰে। তেওঁ কয়, “এ.এ.আই.ৰ ‘প্ৰদীপ্তি’ ইণ্টাৰ্নশ্বিপ কাৰ্যসূচীয়ে নৱপ্ৰজন্মক বিমান পৰিচালনাৰ জটিলতা আৰু বিমান উদ্যোগৰ বহুমুখী ধাৰণা বুজি উঠাৰ এক অনন্য সুযোগ প্ৰদান কৰে।” তেওঁ আশা প্ৰকাশ কৰে যে ইণ্টাৰ্নশ্বিপৰ এই ব্যৱহাৰিক অভিজ্ঞতাই শিক্ষাৰ্থীসকলক “দেশৰ দ্ৰুতবৰ্ধনশীল বিমান পৰিবহণ খণ্ডত অৰ্থপূৰ্ণ বৰঙণি আগবঢ়াবলৈ অনুপ্ৰাণিত কৰিব” আৰু শিক্ষাৰ্থীসকলৰ উজ্জ্বল ভৱিষ্যত কামনা কৰে।