ডিব্ৰুগড়ত আইচক্ৰীমৰ ভিতৰত পইতাচোৰা উদ্ধাৰ ?
‘চৌপাতি’ নামৰ খাদ্য বিপণীক কেন্দ্ৰ কৰি সৃষ্টি চাঞ্চল্যৰ
চাইন অন ডেস্ক,১১জুন:
ডিব্ৰুগড়ত মাত্ৰ দুদিন পূৰ্বে মুকলি হোৱা ‘চৌপাতি’ নামৰ খাদ্য বিপণীক কেন্দ্ৰ কৰি সৃষ্টি হৈছে তীব্ৰ চাঞ্চল্যৰ। গৰমৰ পৰা কিছু সকাহ পাবলৈ পৰিয়ালসহ আইচক্ৰীম খাবলৈ অহা শিশু গ্ৰাহকে আইচক্ৰীমৰ ভিতৰত পইতাচোৰা উদ্ধাৰ কৰাৰ অভিযোগে এতিয়া ডিব্ৰুগড়ত তীব্ৰ চাঞ্চল্যৰ স্বৃষ্টি কৰিছে।একে স্থানতে বিভিন্ন ধৰণৰ খাদ্য একেলগে উপলব্ধ কৰোৱাৰ লক্ষ্যৰে ডিব্ৰুগড়ত যোৱা দুদিন পূৰ্বে মুকলি হৈছিল ‘চৌপাতি’ নামৰ এক খাদ্য বিপনী।ইয়াৰে ‘ভোক লাগিছে’ 
নামৰ বিপনী খনত সংঘটিত হয় এই ঘটনা। সন্ধিয়াৰ সময়ত বহু লোক, বিশেষকৈ পৰিয়াল আৰু শিশুসকলে ইয়ালৈ আহি ভীৰ কৰিছিল।কিন্তু সেই আনন্দৰ মুহূৰ্তটো নিমিষতে পৰিণত হয় এক বিতৰ্কৰ।অভিযোগ অনুসৰি, এজন গ্ৰাহকে খাই থকা আইচক্ৰীমৰ ভিতৰত এটা পইতাচোৰা দেখা পায়। লগে লগে ঘটনাস্থলীত উত্তেজনাৰ সৃষ্টি হয় আৰু উপস্থিত লোকসকলে তীব্ৰ ক্ষোভ প্ৰকাশ কৰে।
ঘটনাটোৰ ছবি আৰু ভিডিঅ’ ইতিমধ্যে সামাজিক মাধ্যমতো ব্যাপকভাৱে প্ৰচাৰ হৈছে। খাদ্য প্ৰস্তুতি আৰু সংৰক্ষণৰ ক্ষেত্ৰত কিমানখিনি সাৱধানতা অৱলম্বন কৰা হৈছে, সেই বিষয়েও উত্থাপিত হৈছে বহু প্ৰশ্নৰ।নতুন দিল্লীৰ ৰাজনীতিত পইতাচোৰাই প্ৰতিদিনে নতুন 
বিতৰ্কৰ সৃষ্টি কৰি অহাৰ সময়তে এতিয়া ডিব্ৰুগড়ত আইচক্ৰীমৰ মাজত পইতাচোৰা উদ্ধাৰক লৈ সৃষ্টি হৈছে নতুন বিতৰ্ক।গ্ৰাহকৰ স্বাস্থ্য আৰু খাদ্য সুৰক্ষাক লৈ উত্থাপিত এই অভিযোগৰ সত্যতা তদন্তৰ জৰিয়তেই স্পষ্ট 
হ’ব।ঘটনাৰ পিছত সংশ্লিষ্ট প্ৰতিষ্ঠানৰ ফালৰ পৰা কোনো আনুষ্ঠানিক মন্তব্য পোৱা হোৱা নাই।ইফালে, গ্ৰাহকসকলে খাদ্য সুৰক্ষা বিভাগক বিষয়টো তদন্ত কৰি উপযুক্ত ব্যৱস্থা গ্ৰহণৰ দাবী জনোৱাৰ পিছতেই আজি ডিব্ৰুগড়ৰ খাদ্য সুৰক্ষা বিভাগৰ পৰিদৰ্শক উপস্থিত হৈ ঘটনাৰ তদন্ত আৰম্ভ কৰাৰ লগতে খাদ্য সামগ্ৰীৰ নমুনা সংগ্ৰহ কৰি পৰীক্ষাগাৰলৈ প্ৰেৰণ কৰা বুলি জানিব পৰা গৈছে।সকলো তদন্তৰ পিছতহে ফাদিল হব প্ৰকৃত ৰহস্য।ঘটনাক লৈ এতিয়া খাদ্য সুৰক্ষা আৰু পৰিষ্কাৰ-পৰিচ্ছন্নতাক লৈও বহু প্ৰশ্নৰ অৱতাৰণা হৈছে।