টাই আহোম যুৱ পৰিষদৰ কেন্দ্ৰীয় কাৰ্যালয়ক কেন্দ্ৰ কৰি সংঘাত !
চৌকিডিঙ্গীত উপস্থিত কেন্দ্ৰীয় যুটীয়া সম্পাদক দ্বীপজ্যোতি দুৱৰা
চাইন অন ডেস্ক,২৩আগষ্ট:
ডিব্ৰুগড় নগৰৰ মাজমজিয়াৰ চৌকিডিঙ্গীত অৱস্থিত টাই আহোম যুৱ পৰিষদ, অসমৰ (তাইজুৰ) কেন্দ্ৰীয় কাৰ্যালয়ক কেন্দ্ৰ কৰি বিগত কিছুদিন ধৰি সৃষ্টি হোৱা বিভিন্ন সংঘাত আৰু মতানৈক্যৰ মাজতে আজি কাৰ্যালয়টোত উপস্থিত হয় সংগঠনটোৰ কেন্দ্ৰীয় যুটীয়া সম্পাদক দ্বীপজ্যোতি দুৱৰা।
সংগঠনটোৰ একাংশ নেতৃত্বৰ মাজত সৃষ্টি হোৱা মতানৈক্য আৰু নেতৃত্বক কেন্দ্ৰ কৰি চলি থকা বিতৰ্কৰ পৰিপ্ৰেক্ষিতত আজি কাৰ্যালয়টোৰ নিয়ন্ত্ৰণ পুনৰ পৰিষদৰ আনটো পক্ষই নিজৰ অধীনলৈ অনাৰ কথা জানিবলৈ দিয়ে।টাইপাৰ ৰাণা ৰঞ্জন গগৈৰ নিয়ন্ত্ৰণত থকা কাৰ্যালয়টো আজি দ্বীপ জ্যোতি দুৱৰা পক্ষই পুনৰ নিজৰ নিয়ন্ত্ৰণলৈ আনে। সংগঠনটোৰ একাংশ ব্যক্তিয়ে নিজকে পৰিষদৰ নেতা হিচাপে পৰিচয় দি কাৰ্যালয়ৰ কাম-কাজত হস্তক্ষেপ নকৰিবলৈ দ্বীপ জ্যোতি দুৱৰাই সকীয়াই দিয়ে।
ইফালে, টাই আহোম যুৱ পৰিষদে বানপীড়িত লোকসকলৰ সহায়ৰ বাবে গ্ৰহণ কৰা বিভিন্ন পদক্ষেপৰ কথা উল্লেখ কৰি দ্বীপ জ্যোতি দুৱৰাই পৰিষদৰ উদ্যোগত বানপীড়িত পৰিয়ালৰ বাবে ৩৫টাতকৈ অধিক ঘৰ নিৰ্মাণৰ পদক্ষেপ গ্ৰহণ কৰা হৈছে বুলি জানিবলৈ দিয়ে। এই পদক্ষেপত দিশম ফাউণ্ডেচন আৰু পুনম গগৈয়ে সহযোগিতা আগবঢ়াইছে বুলি কয়।
আনহাতে, কাৰ্যালয়টোৰ পৰিৱেশ শান্তিপূৰ্ণ আৰু শুচি কৰি তোলাৰ উদ্দেশ্যে টাই আহোম সমাজৰ পৰম্পৰাগত ৰীতি-নীতি অনুসৰি বিশেষ পূজা-অৰ্চনাৰ আয়োজন কৰা হৈছে বুলিও পৰিষদৰ তৰফৰ পৰা জানিবলৈ দিয়ে।
কাৰ্যালয়টোক কেন্দ্ৰ কৰি সৃষ্টি হোৱা সংঘাতৰ অৱসান ঘটাই সংগঠনটোৰ কাম-কাজ পুনৰ সুস্থ আৰু ঐক্যবদ্ধ পৰিৱেশত আগবঢ়াই নিয়াৰ ক্ষেত্ৰত পৰৱৰ্তী সময়ত কি পদক্ষেপ গ্ৰহণ কৰা হয়, সেয়া লক্ষণীয় হ’ব।