ঢকুৱাখনাৰ সাপতীয়া উচ্চতৰ মাধ্যমিক বিদ্যালয় তিনিদিনীয়া কাৰ্যসূচীৰে সোণালী জয়ন্তীৰ আয়োজন
ঢকুৱাখনা,২২ আগষ্ট:
১৯৭৬ চনতে শিক্ষানুৰাগী বিদ্বৎ সমাজৰ ঐকান্তিক প্ৰচেষ্টাত গঢ় লৈ উঠা ঢকুৱাখনা সমজিলাৰ সাপতীয়া অঞ্চলৰ উচ্চতৰ মাধ্যমিক শিক্ষাৰ অন্যতম বাটকটীয়া শিক্ষানুষ্ঠান সাপতীয়া উচ্চতৰ মাধ্যমিক বিদ্যালয়ে জ্ঞানৰ গৰিমা বিলাই পাঁচটা দশকৰ গৌৰৱময় যাত্রা অংকন কৰি গৰকিছে সোণালী জয়ন্তীৰ দুৱাৰডলি। বৃহত্তৰ পশ্চিম মাছখোৱা অঞ্চলৰ অন্যতম শিক্ষানু্ঠানখনৰ এনে বৰ্ণিল সফল শৈক্ষিক যাত্ৰাক সশ্ৰদ্ধ স্মৰণৰ লক্ষ্যৰে বিদ্যালয় পৰিয়াল আৰু 
শুভাকাংক্ষী ৰাইজৰ সহযোগত সোণালী জয়ন্তী মহোৎসৱটি উদযাপনৰ ব্যাপক প্ৰস্তুতি চলিছে। অহা ১৩, ১৪ আৰু ১৫ নৱেম্বৰত তিনিদিনীয়া বৰ্ণিল কাৰ্যসূচীৰে অনুষ্ঠিত হ’বলগীয়া সোণালী জয়ন্তী উদ্যাপনৰ উদ্দেশ্যে ইতিমধ্যে ঢকুৱাখনাৰ বিধায়ক নৱ কুমাৰ দলেক সভাপতি, নৰেশ্বৰ বৰাক কাৰ্যকৰী সভাপতি আৰু বিদ্যালয়ৰ অধ্যক্ষ টংকেশ্বৰ গগৈক সম্পাদক, শিক্ষা মন্ত্রী ডাঃ ৰণোজ পেণ্ড, সাংসদ প্রদান বৰুৱা,
লখিমপুৰ জিলা পৰিষদৰ সভানেত্রী ছোনিয়া বৰগোহাঁই, মিচিং স্বায়ত্ত পৰিষদৰ অধ্যক্ষ সুনীল পেণ্ড, জিলা পৰিষদ সদস্য প্ৰণৱ পেণ্ড, জিলা পৰিষদ সদস্য চন্দ্ৰেশ্বৰ গগৈক মুখ্য পৃষ্ঠপোষক হিচাপে লৈ এখন শক্তিশালী উদ্যাপন সমিতি গঠন কৰা হৈছে।
অভ্যৰ্থনা সমিতিৰ সভাপতি সমুজ্জ্বল চেতিয়াৰ নেতৃত্বত ইতিমধ্য বিভিন্ন উপ-সমিতিসমূহে সোণালী জয়ন্তী মহোৎসৱটি সাফল্যমণ্ডিত কৰি তোলাৰ অৰ্থে ব্যাপক প্রস্তুতি অব্যাহত ৰাখিছে।