ডিব্ৰুগড়ৰ হোটেলত ভয়ংকৰ কাণ্ড !
গ্ৰাহকৰ ধোচাত ওলাল পঁইতাচোৰা ?
চাইন অন ডেস্ক,২৩মে’:
ৰাজ্যৰ হোটেল-ৰেষ্টুৰেণ্টসমূহৰ চকু কপালত উঠা খাদ্যৰ অস্বাস্থ্যকৰ পৰিৱেশক লৈ পুনৰ এক চাঞ্চল্যকৰ ঘটনা পোহৰলৈ আহিছে। এইবাৰ ডিব্ৰুগড়ৰ এক আগশাৰীৰ হোটেলত গ্ৰাহকক যোগান ধৰা খাদ্যৰ মাজত উদ্ধাৰ হৈছে পঁইতাচোৰা। ডিব্ৰুগড়ৰ চৌকিডিঙ্গীস্থিত ‘শ্ৰী প্ৰকাশ হোটেল’ নামৰ বাণিজ্যিক প্ৰতিষ্ঠানখনত এই ভয়ংকৰ ঘটনাটো সংঘটিত হৈছে।
প্ৰাপ্ত তথ্য অনুসৰি, শনিবাৰে পুৱা তিনিজন যুৱকে উক্ত হোটেলখনলৈ ব্ৰেকফাষ্ট কৰিবৰ বাবে গৈছিল। যুৱককেইজনে হোটেলখনত দক্ষিণ ভাৰতীয় খাদ্য ‘ধোচা’ অৰ্ডাৰ কৰিছিল। কিন্তু খাদ্য গ্ৰহণ কৰাৰ সময়তে তেওঁলোকে চাম্বাৰৰ বাটিটোৰ ভিতৰত এটা মস্ত পইটাচোৰা ওপঙি থকা প্ৰত্যক্ষ কৰে। এই ঘটনাক কেন্দ্ৰ কৰি হোটেলখনত তীব্ৰ উত্তেজনাময় পৰিস্থিতিৰ সৃষ্টি হয়। ঘটনা সন্দৰ্ভত ভুক্তভোগী গ্ৰাহকজনে সংবাদ মাধ্যমৰ সন্মুখত ঘটনাৰ সবিশেষ বৰ্ণনা কৰি কয়, আমি ইয়াত ৰাতিপুৱা ব্ৰেকফাষ্ট কৰিবলৈ তিনিজন বন্ধু আহিছিলোঁ আৰু ধোছা অৰ্ডাৰ কৰিছিলোঁ। প্ৰথমতে আমাক যোগান ধৰা চাটনিখিনি অলপ টেঙা আছিল যদিও আমি কোনো আপত্তি নকৰি কেৱল চাম্বাৰৰ সৈতেই ধোছাটো খাবলৈ লৈছিলোঁ। কিন্তু খোৱাৰ মাজতে মোৰ বন্ধুজনৰ প্লেটত থকা চাম্বাৰৰ বাটিটোৰ পৰা এটা পঁইতাচোৰা ওলাই পৰে। যুৱকজনে লগতে অভিযোগ উত্থাপন কৰে যে হোটেল কৰ্তৃপক্ষক এই সন্দৰ্ভত অৱগত কৰাৰ পিছতো তেওঁলোকে নিজৰ ভুল স্বীকাৰ কৰাৰ পৰিৱৰ্তে ওলোটাই গ্ৰাহকসকলৰ ওপৰতহে দোষ জাপি দিবলৈ চেষ্টা কৰে। হোটেলখনৰ এই দায়িত্বহীন আৰু লিট্-পিট্ আচৰণৰ বাবে যুৱককেইজনে হোটেলত থকা চিচিটিভি ফুটেজ পৰীক্ষা কৰিবলৈ দাবী জনায়। হোটেল কৰ্তৃপক্ষৰ এনে ঔদ্ধত্যপূৰ্ণ আচৰণৰ পিছত ভুক্তভোগী যুৱককেইজনে সমগ্ৰ ঘটনা সন্দৰ্ভত স্থানীয় আৰক্ষী থানাত এক এজাহাৰ দাখিল কৰে। ইয়াৰ সমান্তৰালভাৱে তেওঁলোকে ‘খাদ্য সুৰক্ষা বিভাগ’কো লিখিতভাৱে অৱগত কৰি হোটেলখনৰ বিৰুদ্ধে বিহিত ব্যৱস্থা ল’বলৈ দাবী জনাইছে। ডিব্ৰুগড় মহানগৰৰ মাজমজিয়াতে থকা এনে এখন জনপ্ৰিয় হোটেলত গ্ৰাহকৰ স্বাস্থ্যক লৈ হেতালি খেলা এই কাণ্ডই এতিয়া তীব্ৰ প্ৰতিক্ৰিয়াৰ সৃষ্টি কৰিছে। সচেতন মহলে জিলা প্ৰশাসন আৰু খাদ্য সুৰক্ষা বিভাগক এনেধৰণৰ হোটেলসমূহৰ বিৰুদ্ধে তৰিৎ গতিত কঠোৰ পদক্ষেপ গ্ৰহণ কৰিবলৈ আহ্বান জনাইছে।