মাৰ্ঘেৰিটা চাহ বাগিচাত উত্তপ্ত পৰিস্থিতি
চৰকাৰী ভূমি পট্টাক লৈ বিবাদ!
মাৰ্ঘেৰিটা:
তিনিচুকীয়া জিলাৰ মাৰ্ঘেৰিটা চাহ বাগিচাত বুধবাৰে চৰকাৰী ভূমি পট্টাক কেন্দ্ৰ কৰি এক উত্তপ্ত পৰিস্থিতিৰ সৃষ্টি হয়। চৰকাৰে চাহ জনজাতীয় লোকসকলক ভূমি পট্টা প্ৰদান কৰাৰ শেহতীয়া পদক্ষেপৰ মাজতে 
ভূমিৰ মালিকানাক লৈ সৃষ্টি হোৱা এক বিবাদে এই উত্তেজনাৰ সূত্ৰপাত ঘটায়।ঘটনাৰ বিৱৰণি অনুসৰি, ৮৩ নং মাৰ্ঘেৰিটা বিধানসভা সমষ্টিৰ অন্তৰ্গত এই
অঞ্চলটোত চৰকাৰী আঁচনিৰ অধীনত এজন শ্ৰমিকক আৱণ্টন দিয়া ভূমি আৰু গৃহৰ দখলক লৈ দুটা পক্ষৰ মাজত সংঘাতৰ সৃষ্টি হয়। মাৰ্ঘেৰিটা চাহ বাগিচাৰ শ্ৰমিক লক্ষ্মী চানিকাই কৰা অভিযোগ মতে, চৰকাৰে তেওঁক বিধিসন্মতভাৱে ভূমি পট্টা আৰু গৃহ প্ৰদান কৰিছিল। কিন্তু এ.চি. জাল নামৰ এজন ব্যক্তিয়ে উক্ত ভূমি আৰু গৃহটো অবৈধভাৱে দখল কৰি থকাৰ অভিযোগ উত্থাপন হৈছে। চানিকাই জনোৱা মতে, হাতত বৈধ চৰকাৰী নথিপত্ৰ থকাৰ পাছতো তেওঁ নিজৰ ন্যায্য সম্পত্তিৰ দখল ল’ব পৰা নাই। আনহাতে, অভিযুক্ত এ.চি. জালে এই অভিযোগ অস্বীকাৰ কৰি দাবী কৰে যে বাগিচাৰ পুৰণি প্ৰশাসনিক নিয়ম অনুসৰি কৰ্তৃপক্ষই উক্ত গৃহটো পূৰ্বতেই তেওঁক আৱণ্টন দিছিল। এই বিপৰীতমুখী দাবীৰ বাবে বাগিচাৰ সাধাৰণ শ্ৰমিকসকলৰ মাজত ব্যাপক বিভ্ৰান্তিৰ সৃষ্টি হৈছে। বিশেষকৈ চৰকাৰী পট্টাৰ আইনী বৈধতা আৰু বাগিচা কৰ্তৃপক্ষৰ পৰম্পৰাগত আৱণ্টন ব্যৱস্থাৰ মাজত থকা অমিলৰ বাবে জটিলতাই দেখা দিছে।কালি পুৱা এই বিবাদে চৰম ৰূপ ধাৰণ কৰাত সমগ্ৰ অঞ্চলটোত চেপা উত্তেজনাই বিৰাজ কৰে। ঘটনাৰ খবৰ পোৱা মাত্ৰকে মাৰ্ঘেৰিটা আৰক্ষীৰ এটা দল ঘটনাস্থলীত উপস্থিত হৈ পৰিস্থিতি 
নিয়ন্ত্ৰণৰ চেষ্টা চলায়। আৰক্ষীয়ে দুয়ো পক্ষৰ সৈতে আলোচনা কৰি মধ্যস্থতা কৰিবলৈ চেষ্টা কৰে যদিও বাতৰি লিখা পৰলৈকে কোনো স্থায়ী সমাধান সূত্ৰ ওলোৱা নাই। এই ঘটনাই চৰকাৰী ভূমি পট্টা আঁচনি ৰূপায়ণৰ ক্ষেত্ৰত থকা কিছু আসোঁৱাহ আৰু বাগিচা কৰ্তৃপক্ষৰ সৈতে থকা সমন্বয়ৰ অভাৱক প্ৰকট কৰি তুলিছে। ভৱিষ্যতে এনে সংঘাত পুনৰ হোৱাৰ সম্ভাৱনা ব্যক্ত কৰি বাগিচাৰ শ্ৰমিকসকলে গভীৰ উদ্বেগ প্ৰকাশ কৰিছে। বৰ্তমান স্থানীয় ৰাইজে এই স্পৰ্শকাতৰ বিষয়টোত মাৰ্ঘেৰিটা সম-জিলা প্ৰশাসনৰ জৰুৰী হস্তক্ষেপ কামনা কৰিছে, যাতে প্ৰকৃত হিতাধিকাৰীয়ে তেওঁলোকৰ আইনী অধিকাৰ সুৰক্ষিত কৰিব পাৰে। এই ঘটনাই অসমীয়া নৱবৰ্ষৰ প্ৰথমদিনটোৰ আনন্দ অঞ্চলটোত মোলান পেলায়। বৰ্তমানেও চাহ বাগিচা এলেকাধীন অঞ্চলটোত চেপা উত্তেজনা বিৰাজ কৰি আছে।