শ্ৰীশ্ৰীঅনিৰুদ্ধদেৱ কনিষ্ঠ মহাবিদ্যালয়ত ‘উল্লাস অভিযান’ৰ সজাগতা সভা
চাইন অন ডেস্ক,১৪ ছেপ্টেম্বৰ:
সমাজৰ পৰা নিৰক্ষৰতা দূৰ কৰি শিক্ষাৰ পোহৰ সকলোৰে মাজলৈ লৈ যোৱাৰ লক্ষ্যৰে ৰূপায়িত ‘উল্লাস অভিযান’ৰ এখন সজাগতা সভা আজি ডিব্ৰুগড়ৰ বৈৰাগীমঠস্থিত শ্ৰীশ্ৰীঅনিৰুদ্ধদেৱ কনিষ্ঠ মহাবিদ্যালয়ত অনুষ্ঠিত হয়।
মহাবিদ্যালয়ৰ অধ্যক্ষ ভূষণ জ্যোতি সন্দিকৈৰ অধ্যক্ষতাত অনুষ্ঠিত সভাখনত ‘উল্লাস অভিযান’ৰ সমন্বয়ক হেমন্ত হাজৰিকাই অভিযানটোৰ লক্ষ্য, উদ্দেশ্য, গুৰুত্ব আৰু সামাজিক তাৎপৰ্য সম্পৰ্কে ছাত্ৰ-ছাত্ৰীসকলক বিস্তৃতভাৱে অৱগত কৰে। তেওঁ কয় যে সমাজৰ নিৰক্ষৰ লোকসকলক সাক্ষৰ কৰি তোলাৰ ক্ষেত্ৰত কেৱল চৰকাৰী ব্যৱস্থাই নহয়, ছাত্ৰ-ছাত্ৰী আৰু যুৱ সমাজেও সক্ৰিয় ভূমিকা গ্ৰহণ কৰিব লাগিব।
ছাত্ৰ-ছাত্ৰীসকলে কেনেদৰে ‘উল্লাস অভিযান’ৰ সৈতে জড়িত হৈ নিজৰ অঞ্চলৰ নিৰক্ষৰ লোকসকলক সাক্ষৰতা প্ৰদানৰ ক্ষেত্ৰত সহায় কৰিব পাৰে, সেই বিষয়েও সমন্বয়কগৰাকীয়ে বুজাই দিয়ে। শিক্ষাৰ পোহৰ সমাজৰ প্ৰতিটো স্তৰলৈ প্ৰসাৰিত কৰাৰ ক্ষেত্ৰত ছাত্ৰ-ছাত্ৰীসকলক সামাজিক দায়বদ্ধতাৰে আগবাঢ়ি আহিবলৈ তেওঁ আহ্বান জনায়।
সজাগতা সভাত অনিল প্ৰসাদ সিংহ, গুণীন শেনচোৱা, মহাবিদ্যালয়ৰ শিক্ষক-শিক্ষয়িত্ৰীসকলৰ লগতে ‘উল্লাস অভিযান’ৰ ক্ষেত্ৰকৰ্মীসকল উপস্থিত থাকে।
অনুষ্ঠানৰ শেষত অনিল প্ৰসাদ সিংহই শলাগৰ শৰাই আগবঢ়াই উপস্থিত সকলোকে ধন্যবাদ জ্ঞাপন কৰে।