শিৱসাগৰত বান সাহায্য আৰু ক্ষেত্ৰভিত্তিক প্ৰচাৰ কাৰ্যসূচী অব্যাহত ৰাখিছে আকাশবাণী ডিব্ৰুগড় ক্লাষ্টাৰে
চাইন অন ডেস্ক,১১আগষ্ট:
বানপীড়িত ৰাইজৰ প্ৰতি অব্যাহত মানৱীয় সেৱাৰ অংশ হিচাপে আকাশবাণী ডিব্ৰুগড় ক্লাষ্টাৰে শিৱসাগৰ জিলাৰ নেপালী খুটিত দ্বিতীয়টো বান সাহায্য কাৰ্যসূচীত অংশগ্ৰহণ কৰে। এই কাৰ্যসূচীত ক্লাষ্টাৰ হেড কে কে ৰেংমা আৰু আকাশবাণী ডিব্ৰুগড়ৰ হেড অৱ প্ৰগ্ৰাম ইন্দিৰা মৰাঙ উপস্থিত থাকে।
শেহতীয়া বানত ক্ষতিগ্ৰস্ত লোকসকলক সহায়-সহযোগিতা আগবঢ়োৱাৰ লগতে তেওঁলোকৰ দুখ-দুৰ্দশাৰ সময়ত একাত্মতা প্ৰকাশ কৰাই এই সাহায্য কাৰ্যসূচীৰ মূল উদ্দেশ্য। সংকট আৰু দুৰ্যোগৰ সময়ত আকাশবাণী ডিব্ৰুগড় ক্লাষ্টাৰে ৰাইজৰ কাষত থকাৰ প্ৰতিশ্ৰুতি পুনৰ দোহাৰে।
সাহায্য সামগ্ৰী বিতৰণৰ সমান্তৰালভাৱে আকাশবাণী ডিব্ৰুগড়ে বানৰ ফলত আটাইতকৈ বেছি ক্ষতিগ্ৰস্ত নেপালী খুটি আৰু নাজিৰা মহকুমাৰ অন্তৰ্গত তথা ইয়াৰ আশে-পাশে থকা বিভিন্ন অঞ্চলত অফ-ব্ৰডকাষ্ট (OB) ৰেকৰ্ডিং সম্পন্ন কৰে। এই ক্ষেত্ৰভিত্তিক ৰেকৰ্ডিঙৰ জৰিয়তে বানপীড়িত লোকসকলৰ বাস্তৱ অভিজ্ঞতা, সমস্যাৰ লগতে তেওঁলোকৰ কণ্ঠস্বৰ সংগ্ৰহ কৰি ৰেডিঅ’ৰ মাধ্যমেৰে বৃহত্তৰ শ্ৰোতা সমাজৰ মাজলৈ লৈ যোৱাৰ প্ৰয়াস কৰা হয়।
আকাশবাণী ডিব্ৰুগড়ৰ হেড অৱ প্ৰগ্ৰাম ইন্দিৰা মৰাঙৰ নেতৃত্বত অনুষ্ঠিত এই OB ৰেকৰ্ডিং কাৰ্যসূচীত ট্ৰেন্সমিছন এক্সিকিউটিভ জিন্টু চেতিয়া আৰু সন্তোষ ঠাকুৰে অংশগ্ৰহণ কৰে।
এনে ক্ষেত্ৰভিত্তিক কাৰ্যসূচীৰ জৰিয়তে আকাশবাণী ডিব্ৰুগড়ে ৰাইজৰ সৈতে নিজৰ সম্পৰ্ক অধিক সুদৃঢ় কৰাৰ লগতে তেওঁলোকৰ অভিজ্ঞতা, সমস্যা আৰু দাবীসমূহৰ কণ্ঠস্বৰ বৃহত্তৰ সমাজৰ মাজলৈ লৈ যোৱাৰ প্ৰয়াস অব্যাহত ৰাখিছে।