ডিব্ৰুগড়ৰ বেংকত প্ৰায় ৫ কোটি টকাৰ হৰলুকি !
ডিব্ৰুগড়ৰ বেংক অৱ মহাৰাষ্ট্ৰত অনিয়ম
গ্ৰাহকৰ সাঁচতিয়া ধন একাউণ্টৰ পৰা নোহোৱা হল
বহু পেঞ্চনাৰ, জ্যেষ্ঠ নাগৰিকৰো জীৱনৰ কষ্টোপাৰ্জিত ধনৰ হৰলুকি
চাইন অন ডেস্ক,১৩মে’:
এহেজাৰ বা দুহেজাৰ নহয় ! প্ৰায় ৫ কোটি টকাৰ হৰলুকি।তাকো খোদ ৰাষ্ট্ৰীয়কৃত বেংকত সংঘটিত হৈছে, এনে ব্যাপক খেলিমেলি।এতিয়া যেন
ৰাষ্ট্ৰীয়কৃত বেংকও সুৰক্ষিত নহয় গ্ৰাহকৰ বাবে।তেনে এক বৃহৎ বিত্তীয় কেলেংকাৰী শেহতীয়াকৈ
ডিব্ৰুগড়ত পোহৰলৈ আহিছে।ডিব্ৰুগড়ৰ বেংক অৱ মহাৰাষ্ট্ৰৰ চৌকিডিঙ্গী শাখাৰ পৰা গ্ৰাহকৰ একাউণ্টৰ পৰা কোটি কোটি টকা হৰলুকি হোৱাৰ এক গুৰুতৰ অভিযোগ উথাপন হৈছে।গ্ৰাহকে, নিজৰ বহু বছৰৰ সাঁচতিয়া ধন একাউণ্টত নেদেখি এতিয়া মূৰে-কপালে হাত দিছে।যাৰ ফলত
ডিব্ৰুগড় চহৰৰ মাজমজিয়াত থকা বেংক অৱ মহাৰাষ্ট্ৰৰ চৌকিডিঙ্গি শাখাত আজি সৃষ্টি হয় এক উত্তপ্ত পৰিস্থিতি। ইজনৰ পিছত সিজন গ্ৰাহক বেংকত উপস্থিত হৈ নিজৰ একাউণ্ট পৰীক্ষা কৰোঁতেই পোহৰলৈ আহিছে বহু চাঞ্চল্যকৰ তথ্য। বছৰ বছৰ ধৰি জমা কৰা লক্ষ লক্ষ টকাৰ পৰিৱৰ্তে একাউণ্টত ওলাইছে মাথোঁ এহেজাৰ-দুহেজাৰ টকা।
নিজৰ বহু কষ্টৰে উপাৰ্জন কৰা ধন হঠাতে উধাও হৈ যোৱাত হতভম্ব হৈ পৰিছে গ্ৰাহকসকল। বেংকৰ বিষয়া-কৰ্মচাৰীক সোধ-পোছ কৰিলেও কোনো সদুত্তৰ নোপোৱাৰ অভিযোগ তুলিছে ভুক্তভোগীয়ে। ফলত বেংকৰ ভিতৰত সৃষ্টি হয় হাহাকাৰ পৰিস্থিতিৰ।
“আমাৰ জীৱনৰ গোটেই সাঁচতিয়া ধন এই বেংকত আছিল। এতিয়া একাউণ্টত ধন নাই। আমি সম্পূৰ্ণ ভাঙি পৰিছোঁ।”—এজন ভূক্তভোগী গ্ৰাহকে এইদৰে ব্যক্ত কৰি হতাশাত ভাগি পৰে।আজি এই সমগ্ৰ ঘটনা পোহৰলৈ অহাৰ পিছতেই বেংকটোৰ সন্মুখত ভিৰ কৰে শতাধিক ক্ষুব্ধ গ্ৰাহকে। পৰিস্থিতি নিয়ন্ত্ৰণ কৰিবলৈ ঘটনাস্থলীত উপস্থিত হয় এক বৃহৎ আৰক্ষীৰ দল। অভিযোগ উঠিছে যে, এই বৃহৎ বিত্তীয় অনিয়মত বেংকটোৰ আন বহুতো বিষয়া-কৰ্মচাৰীও জড়িত থাকিব পাৰে।
বিশেষকৈ বেংকৰ গুৰুং উপাধিৰ এজন কেচিয়াৰৰ বিৰুদ্ধে উঠিছে গুৰুতৰ অভিযোগ। জানিব পৰা মতে, ২০১১ চনত শাখাটো মুকলি হোৱাৰ পৰাই তেওঁ একেটা দায়িত্বত আছিল। আনকি, এদিনো ছুটি নোলোৱাৰ কথাও পোহৰলৈ আহিছে। শেহতীয়াকৈ নিৰ্বাচনী ডিউটিত যোৱাৰ পিছতেই এই কেলেংকাৰীৰ তথ্য উন্মোচিত হোৱা বুলি জানিব পৰা গৈছে।
ইতিমধ্যে সমগ্ৰ ঘটনাৰ উচিত তদন্ত দাবী কৰি ডিব্ৰুগড় জিলা আয়ুক্তক, জাতি জনগোষ্ঠীয় ঐক্য মঞ্চ আৰু অসম চাহ জনজাতি ছাত্ৰ সন্থাই
স্মাৰকপত্ৰ প্ৰদান কৰিছে।আনহাতে, ঘটনাৰ তদন্তৰ বাবে বেংকটোৰ জেনেৰেল মেনেজাৰৰ নেতৃত্বত এটা বিশেষ দলও উপস্থিত হৈছে ডিব্ৰুগড়ত।
প্ৰায় পাঁচ কোটি টকাৰো অধিক ধন হৰলুকিৰ অভিযোগে এতিয়া তীব্ৰ চাঞ্চল্য সৃষ্টি কৰিছে সমগ্ৰ ডিব্ৰুগড়ত।বহু পেঞ্চনাৰ, জ্যেষ্ঠ 
নাগৰিকৰো জীৱনৰ কষ্টোপাৰ্জিত ধনৰ হৰলুকি হোৱাত পৰিয়ালত লাগিছে হাহাকাৰ।
ভাৰত চৰকাৰৰ স্বীকৃতিপ্ৰাপ্ত এক ৰাষ্ট্ৰীয়কৃত বেংকত যদি গ্ৰাহকৰ ধনেই সুৰক্ষিত নহয়, তেন্তে সাধাৰণ মানুহে ক’ত বিশ্বাস ৰাখিব— এই প্ৰশ্নই এতিয়া উত্থাপন কৰিছে সচেতন মহলে।
এই বৃহৎ বিত্তীয় কেলেংকাৰীৰ আঁৰত আচলতে কোন? গ্ৰাহকৰ সাঁচতিয়া ধন ঘূৰাই পাব নে ভুক্তভোগীয়ে ? এতিয়া সেয়াও এক লাখটকীয়া প্ৰশ্ন।