দলগাঁৱৰ কৌপাটীত উখল-মাখলেৰে বৈচাগু উদযাপন
দলগাঁও:
ৰাজ্যৰ ভিন্ন প্ৰান্তৰ লগতে দৰং জিলাৰ দলগাঁও সমষ্টিৰ অন্তৰ্গত কৌপাটীৰ লদাবাৰী গাঁৱতো এতিয়া বিৰাজ কৰিছে এক উৎসৱমুখৰ পৰিৱেশে।
বড়ো জনগোষ্ঠীৰ লোকসকলে তেওঁলোকৰ অতি চেনেহৰ বসন্তকালীন উৎসৱ ‘বৈচাগু’ পৰম্পৰাগত ৰীতি-নীতিৰে উদযাপন কৰিছে। বসন্তৰ আগমনৰ লগে লগে লদাবাৰীৰ আকাশ-বতাহ এতিয়া বৈচাগুৰ গীত-মাতত মুখৰিত হৈ পৰিছে। গাঁৱৰ ডেকা-গাভৰুৰ পৰা আবাল-বৃদ্ধ-বনিতালৈকে সকলোৱে পৰম্পৰাগত সাজ-পাৰ পিন্ধি এই আনন্দত চামিল হোৱা পৰিলক্ষিত হৈছে। চিফুং, খাম আৰু থৰ্খাৰ সুৰত লদাবাৰীৰ ৰাইজ একপ্ৰকাৰ আপোনপাহৰা হৈ পৰিছে। গাঁৱৰ নামঘৰ তথা ৰাজহুৱা স্থানত একত্ৰিত হৈ আবাল-বৃদ্ধ-বনিতাই বৈচাগু নৃত্যত অংশগ্ৰহণ কৰিছে। প্ৰতিজন বড়ো লোকে নিজৰ কৃষ্টি-সংস্কৃতি ৰক্ষা কৰি এই উৎসৱৰ জৰিয়তে ভাতৃত্ববোধৰ নিদৰ্শন দাঙি
ধৰিছে। নতুন বছৰটোক আদৰাৰ লগতে সকলোৱে গীত গাই, নাচি-বাগি এক অনাবিল আনন্দত আত্মহাৰা হৈ পৰিছে। উৎসৱটোৱে লদাবাৰী অঞ্চলৰ লোকসকলৰ মাজত বৰ্তমান এক সম্প্ৰীতিৰ এনাজৰী অধিক দৃঢ় কৰি তুলিছে।