*ডিব্ৰুগড়ত দয়-কাও-ৰং-অৰ উদ্যোগত স্থাপিত পথ পুথিভঁৰাললৈ পঢ়ুৱৈৰ ব্যাপক সঁহাৰি*
ডিব্ৰুগড়, ১৮ এপ্ৰিলঃ
যোৱা ১৬ এপ্ৰিলত ডিব্ৰুগড় মহানগৰৰ পাৰ্শ্বৱৰ্তী অঞ্চল নগাখেলীয়া গাঁৱৰ এক ব্যস্ত পথত ভাষা-সাহিত্য-সংস্কৃতি-সমাজসেৱামূলক বেচৰকাৰী অনুষ্ঠান দয়-কাও-ৰং-ৰ উদ্যোগত স্থাপন কৰা পথ পুথিভঁৰালটোৰ প্ৰতি স্থানীয় ৰাইজৰ লগতে পথটোৰে যাতায়ত কৰা দূৰ-দূৰণিৰ যাত্ৰীয়ে আশাব্যঞ্জক সঁহাৰি জনাইছে৷ উল্লেখ্য যে জন্মলগ্নৰ পৰাই অসমীয়া ভাষা-সাহিত্যৰ বিকাশৰ বাবে বিভিন্ন কাৰ্যসূচী ৰূপায়ণ কৰি অহা দয়-কাও-ৰঙে ৰাজ্যখনৰ বিভিন্ন স্থানত পথ পুথিভঁৰাল 
স্থাপনৰ এক বিশেষ পৰিকল্পনা গ্ৰহণ কৰিছে। উক্ত পৰিকল্পনা অনুসৰি প্ৰথমটো পথ পুথিভঁৰাল সৰবৰহী ব্যক্তি প্ৰয়াত সুৰেশ ভূঞাৰ সোঁৱৰণত নগাখেলীয়া গাঁৱত স্থাপন কৰা হয়। পুথিভঁৰালটোৰ দাতা হৈছে পণ্ডিত দীনদয়াল উপাধ্যায় আদৰ্শ মহাবিদ্যালয়, দলগাঁৱৰ সহকাৰী অধ্যাপক ড° সীমা ভূঞা।
দয়-কাও-ৰঙৰ সভাপতি তথা বিশিষ্ট লেখক টুনুজ্যোতি গগৈয়ে এক প্ৰেছ বিবৃতিত কয় যে নতুন প্ৰজন্মক কিতাপৰ প্ৰতি আগ্ৰহী কৰি তুলিবলৈ অনুষ্ঠানটোৰ উদ্যোগত ডিব্ৰুগড় জিলাৰ প্ৰান্তীয় অঞ্চল টেঙাখাতৰ ৰংচঙী-কপহুৱা গাঁৱত এটা স্থায়ী পুথিভঁৰাল নিৰ্মাণ কৰি থকা হৈছে৷ অদূৰ ভৱিষ্যতে নগাখেলীয়া গাঁৱৰ পথ পুথিভঁৰালটোৰ সমীপতে দয়-কাও-ৰং-অৰ স্থায়ী কাৰ্যালয়, এটা অধ্যয়ন আৰু গৱেষণা কেন্দ্ৰও স্থাপন কৰা হ’ব৷