ডিব্ৰুগড় জিলাত মুখ্যমন্ত্ৰীৰ নিযুত মইনা আৰু নিযুত বাবু আঁচনিৰ আবেদন পত্ৰ বিতৰণ কাৰ্যসূচী অনুষ্ঠিত
চাইন অন ডেস্ক,৬আগষ্ট:
শিক্ষা গ্ৰহণৰ দিশত অসম চৰকাৰৰ অভিলাষী পদক্ষেপ ‘মুখ্যমন্ত্ৰীৰ নিযুত মইনা আঁচনি’ আৰু ‘মুখ্যমন্ত্ৰীৰ নিযুত বাবু আঁচনি’ৰ আবেদন পত্ৰ বিতৰণৰ কেন্দ্ৰীয় অনুষ্ঠানটি আজি গুৱাহাটীৰ পাঞ্জাবাৰীস্থিত শ্ৰীমন্ত শংকৰদেৱ কলাক্ষেত্ৰৰ শ্ৰীমন্ত শংকৰদেৱ আন্তৰ্জাতিক প্ৰেক্ষাগৃহত সফলতাৰে অনুষ্ঠিত হয়। উক্ত কেন্দ্ৰীয় কাৰ্যসূচীত অসমৰ মুখ্যমন্ত্ৰী ড° হিমন্ত বিশ্ব শৰ্মা মুখ্য অতিথি হিচাপে উপস্থিত থাকি সমগ্ৰ ৰাজ্যজুৰি এই আবেদন পত্ৰ বিতৰণ প্ৰক্ৰিয়াৰ শুভাৰম্ভ কৰে। এই কেন্দ্ৰীয় অনুষ্ঠানৰ লগত সংগতি ৰাখি একেটা দিনতে সমগ্ৰ অসমৰ ৪৫২খন শিক্ষানুষ্ঠানত আৱেদন-পত্ৰ বিতৰণৰ বিশেষ ব্যৱস্থা গ্ৰহণ কৰা হয়।ইয়াৰ অংশস্বৰূপে আজি 
ডিব্ৰুগড় জিলাৰ বহুসংখ্যক শিক্ষানুষ্ঠানত এই আবেদন-পত্ৰ বিতৰণ কাৰ্যসূচী ৰূপায়ণ কৰা হয়। ডিব্ৰুগড়ৰ শিক্ষানুষ্ঠানসমূহত গুৱাহাটীত অনুষ্ঠিত মুখ্যমন্ত্ৰীৰ কেন্দ্ৰীয় কাৰ্যসূচীৰ পোনপটীয়া সম্প্ৰচাৰ কৰা হয়।
জিলাখনৰ বিভিন্ন মহাবিদ্যালয় আৰু বিশ্ববিদ্যালয়ত আয়োজিত এই বিশেষ কাৰ্যসূচীত মন্ত্ৰী, সাংসদ, বিধায়ক আৰু গণ্য-মান্য ব্যক্তিসকলে মুখ্য অতিথি হিচাপে উপস্থিত থাকে। টিংখাং মহাবিদ্যালয়ত মন্ত্ৰী বিমল বৰা মুখ্য অতিথি হিচাপে উপস্থিত থাকে। দুলীয়াজান মহাবিদ্যালয়ত মন্ত্ৰী ৰামেশ্বৰ তেলী, দুলীয়াজান ছোৱালী মহাবিদ্যালয়ত সাংসদ তেৰছ গোৱালা, ডি এইচ এছ কে মহাবিদ্যালয়ত ডিব্ৰুগড়ৰ বিধায়ক প্ৰশান্ত ফুকন উপস্থিত থাকে।একেদৰে ডি ডি আৰ মহাবিদ্যালয়ত বিধায়ক বিনোদ হাজৰিকা, 
নাহৰকটীয়া মহাবিদ্যালয়ত বিধায়ক তৰংগ গগৈ আৰু খোৱাং মহাবিদ্যালয়ত বিধায়ক চক্ৰধৰ গগৈয়ে মুখ্য অতিথি হিচাপে উপস্থিত থাকে।ইয়াৰ উপৰিও, নন্দলাল বৰগোহাঁই চিটি কলেজত ডিব্ৰুগড় পৌৰ নিগমৰ মেয়ৰ ড° সৈকত পাত্ৰ, ডি এইচ এছ কে কমাৰ্চ মহাবিদ্যালয়ত ডিব্ৰুগড় উন্নয়ন কৰ্তৃপক্ষৰ অধ্যক্ষ অসীম হাজৰিকা, ডিব্ৰু কলেজত ডিব্ৰুগড় পৌৰ নিগমৰ ডেপুটি মেয়ৰ উজ্জ্বল ফুকন আৰু ডিব্ৰুগড় বিশ্ববিদ্যালয়ত অসম পৰ্যটন উন্নয়ন নিগমৰ অধ্যক্ষ ঋতুপৰ্ণ বৰুৱাই অংশগ্ৰহণ কৰি আঁচনিৰ আবেদন পত্ৰ বিতৰণ কৰে। আনফালে মৰাণ কমাৰ্চ কলেজত সমাজকৰ্মী বিকুল ডেকা উপস্থিত থাকি অনুষ্ঠানটি সাফল্যমণ্ডিত কৰি তোলে।