প্ৰাণৰ শিল্পী জুবিন গাৰ্গক সামাজিক মাধ্যমত অপমান!
মানকাচৰ থানাত এজাহাৰ দাখিল
মানকাচৰ:
অসমীয়াৰ আৱেগ তথা প্ৰাণৰ শিল্পী জুবিন গাৰ্গক সামাজিক মাধ্যমত বিৰূপ মন্তব্য কৰি এতিয়া শলঠেকত পৰিছে এজন যুৱক। মানকাচৰৰ চক বজাৰ এলেকাৰ বাপন সাহা নামৰ এজন যুৱকে ফেচবুক তথা সামাজিক মাধ্যমত জুবিন গাৰ্গৰ বিৰুদ্ধে অতি অপমানজনক মন্তব্য কৰাক লৈ সমগ্ৰ অঞ্চলটোত তীব্ৰ প্ৰতিক্ৰিয়াৰ সৃষ্টি হৈছে।
জানিব পৰা মতে, বাপন শ্বাহা নামৰ যুৱকজনে নিজৰ সামাজিক মাধ্যমৰ একাউণ্টৰ পৰা জনপ্ৰিয় শিল্পীজনৰ বিৰুদ্ধে অশালীন আৰু কটু মন্তব্য প্ৰকাশ কৰিছিল। এই মন্তব্য ভাইৰেল হৈ পৰাৰ লগে লগে জুবিন অনুৰাগীসকলৰ মাজত তীব্ৰ ক্ষোভৰ সৃষ্টি হয়। শিল্পীজনৰ প্ৰতি থকা এনে অসন্মানক সহজভাৱে ল’ব পৰা নাই তেওঁৰ গুণমুগ্ধসকলে।
উক্ত অপমানজনক কাৰ্যৰ বিৰুদ্ধে আজি একগোট হয় মানকাচৰৰ জুবিন অনুৰাগীসকল। তেওঁলোকে ক্ষোভ প্ৰকাশ কৰাৰ লগতে অভিযুক্ত বাপন শ্বাহাৰ বিৰুদ্ধে উচিত শাস্তিৰ দাবী জনাই মানকাচৰ আৰক্ষী থানাত এখন এজাহাৰ দাখিল কৰে।
জুবিন গাৰ্গ কেৱল এজন শিল্পীয়েই নহয়, তেওঁ অসমীয়া জাতিৰ এটা আৱেগ। এনে এজন ব্যক্তিক সামাজিক মাধ্যমত নিৰ্লজ্জভাৱে আক্ৰমণ কৰাটো কোনো কাৰণতে গ্ৰহণযোগ্য নহয়। আমি আৰক্ষীক অনুৰোধ জনাইছো যাতে এই ক্ষেত্ৰত কঠোৰ পদক্ষেপ গ্ৰহণ কৰা হয়।
এই ঘটনাক লৈ বৰ্তমান সামাজিক মাধ্যমতো ব্যাপক চৰ্চা চলিছে। সচেতন মহলে মত প্ৰকাশ কৰিছে যে বাক-স্বাধীনতাৰ নামত কোনো ব্যক্তিৰ মানহানি কৰাটো দণ্ডনীয় অপৰাধ। এতিয়া মানকাচৰ আৰক্ষীয়ে এই এজাহাৰৰ ভিত্তিত কি ব্যৱস্থা গ্ৰহণ কৰে, সেয়া লক্ষণীয় হ’ব।