সুদীর্ঘ ৫০ বছৰৰ পাছত উপস্থিত মণিপুৰৰ উখৰুলত এনএছচিএন (আইএম)ৰ মুৰব্বী থুইংগালেং মুইভাই
ডিমাপুৰৰ পৰা হেলিকপ্টাৰেৰে আহি উখৰুলত উপস্থিত
উত্তৰ-পূবৰ আটাইতকৈ বর্ষীয়ান বিদ্রোহী নেতা: জনাকীর্ণ টাংখুল নংগ্রাউণ্ড
বিশাল সমদলেৰে উষ্ম আদৰণি হাজাৰ হাজাৰ জনতাৰ
চাইন অন ডেস্ক:
সুদীর্ঘ ৫০ বছৰৰ মূৰত জন্মভূমি উখৰুলত উপস্থিত হ’ল উত্তৰ-পূবৰ বিদ্ৰোহী সংগঠনৰ আটাইতকৈ বর্ষীয়ান নেতা থুইংগালেং মুইভা। নগাৰ সাৰ্বভৌমত্বৰ দাবীৰে দীর্ঘদশক ধৰি সশস্ত্ৰ সংগ্ৰাম অব্যাহত ৰখাৰ পাছত যুদ্ধবিৰতি চুক্তিৰে আলোচনাৰ মেজলৈ অহা এনএছচিএন-আইএমৰ মুৰব্বী হিচাপে পৰিচিত থুইংগালেং মুইভাৰ এই আগমনত উছৱমুখৰ পৰিৱেশ সৃষ্টি হ’ল উখকল আৰু সোমদলত।
উল্লেখ্য যে ২০২৩ চনৰ মে’ মাহৰ পৰা গোষ্ঠীগত সংঘৰ্ষত জুৰুলা হৈ পৰা মণিপুৰৰ উখৰুলত মুইভাৰ এই আগমন বিশেষ উল্লেখযোগ্য ঘটনা হিচাপে পৰিগণিত হৈছে। শতবর্ষ গৰকিবলৈ কিছু বছৰ বাকী থকা মুইভাই এই ভ্রমণকালতে নিজৰ জন্মগাঁও সোমদলত কটাব এসপ্তাহ।
ডিমাপুৰৰ পৰা বুধবাৰে হেলিকপ্টাৰেৰে আহি উখৰুলত উপস্থিত হোৱা থুইংগালেং মুইভাক উষ্ম আদৰণি জনোৱা হয়। প্রায় ৫০ বছৰৰ পিছত প্রিয় নেতাগৰাকীক চাবলৈ উখৰুলৰ টাংখুল লংগ্রাউণ্ড জনাকীর্ণ হৈ পৰে। ৰাজকীয়ভাৱে আদৰণি জনোৱা মুইভাৰ এই আগমনক নেতাৰ প্ৰত্যাৱৰ্তন 
বুলিয়েই ব্যাখ্যা কৰিছে স্থানীয় বাসিন্দাসকলে। সম্পূৰ্ণ পৰম্পৰাগতভাবে আদৰণি জনোৱা মুইভাক শিৰত পিন্ধাই দিয়া হ’ল ৰাজকীয় মুকুট। ৯০ বছৰ গৰকা মুইভাৰ শৰীৰ এতিয়া থৰক-বৰক। নগা সশস্ত্ৰ সংগ্ৰামী ফিজো, খাপলাঙৰ পাছত জীৱিত অৱস্থাত থকা থুইংগালেং মুইভাই হৈছে উত্তৰ-পূৰ্বাঞ্চলৰ বিদ্ৰোহী সংগঠনসমূহৰ ভিতৰত আটাইতকৈ বর্ষীয়ান নেতা। এনএছচিএন-আইএম গোটক নেতৃত্ব দি অহা মুইভা হ’ল সংগঠনটোৰ সাধাৰণ সম্পাদক তথা এনএছচিএন (আইএম)ৰ প্ৰস্তাৱিত নাগালিমৰ তেৱেই হ’ল প্রধানমন্ত্রী।
জন্মসূত্রে নাগালেণ্ডৰ নগা নহয় যদিও মণিপুৰৰ উখৰুল জিলাৰ সোমদলত ১৯৩৪ চনৰ ১৩ মাৰ্চত জন্মলাভ কৰা মুইভা এজন টাংখুল নগা। লক্ষণীয়ভাৱে নাগালেণ্ডৰ ১৪টা স্বীকৃত জনজাতিৰ তালিকাত নাই এই টাংখুল নগা। তথাপি স্বাধীন-সার্বভৌম নাগালিমৰ দাবীৰে সশস্ত্ৰ সংগ্ৰামেৰে ওৰেজীৱন পাৰ কৰিলে ইভাই। যাৰ বাবে এতিয়াও মুইভা এনএছচিএন-আইএমৰ অবিসম্বাদী নেতা। ১৯৯৭ চনত যুদ্ধবিৰতি ঘোষণা ৰাৰ পাছত ২০১৫ চনত এনএছচিএন-আইএমে স্বাক্ষৰিত কৰে নগা ফ্ৰেমৰ এগ্রিমেন্ট। সেই শান্তি চুক্তিক লৈয়েই ইখনৰ পাছত সিখন আলোচনাত অংশগ্ৰহণ কৰি আহিছে মুইভাই। সশস্ত্ৰ সংগ্ৰামৰ এই কাৰ্যসূচীত ব্যস্ত থাকা মুইভাই বিগত ৫০ বছৰেই অহা নাছিল নিজৰ ওপজা ভূমি সোমদললৈ। সেই অপেক্ষাৰ অন্ত পেলাই এনএছচিএন-আইএমৰ লেফটেনেন্ট জেনেৰেল (অৱসৰপ্ৰাপ্ত) সামূহিক নেতৃত্বৰ সদস্য আটেম ডিচি আৰু সেনাপ্রধান লেফটেনেন্ট জেনেৰেল এন্টনী নিং খান শিমৰেসহ এনএছচিএনৰ মুখ্য কাৰ্যালয়ত উপস্থিত হ’ল
মুইভা। পত্নীৰ সৈতে উপস্থিত হোৱা মুইভাক হাজাৰ হাজাৰ জনতাই বিশাল সমদলেৰে আদৰি আনে মুইভাক। বীৰৰ দৰে মুইভাক আদৰি অনাৰ লগতে টাংখুল নগাসকলৰ প্ৰাচীন বীৰসকলৰ পোছাক পিন্ধাই ৰাজকীয়ভাৱে আদৰণি জনায়। লক্ষণীয়ভাৱে মুইভাৰ শাৰীৰিক অৱস্থাৰ প্ৰতি লক্ষ্য ৰাখি এটা চিকিৎসকৰ দলকো সাজু কৰি ৰখা হৈছিল। কাৰ্যতঃ মুইভাৰ এই আগমনে এক ঐতিহাসিক দিনৰ সাক্ষী হ’ল উখৰুল জিলা। অহা এসপ্তাহ নিজৰ জন্মভূমি গাঁও সোমদলত কটোৱাৰ লগতে কেইবাখনো ৰাজহুৱা সভাত মুইভাই অংশ ল’ব বুলি জানিব পৰা গৈছে।