ডিব্ৰুগড় নিৰ্বাচন জিলাৰ ভোটকেন্দ্ৰসমূহৰ পৰিদৰ্শন
চাইন অন ডেস্ক:
অনাগত বিধানসভা নিৰ্বাচনৰ পৰিপ্ৰেক্ষিতত, সাধাৰণ পৰ্যবেক্ষক টি.এন. ভেঙ্কটেশে, IAS আজি ডিব্ৰুগড় বিধানসভা সমষ্টিৰ অন্তৰ্গত বিভিন্ন ভোটকেন্দ্ৰ পৰিদৰ্শন কৰে।পৰিদৰ্শনকালত ২৩১, ২৩০, ২২০, ২২৩ আৰু ২৩৩ নম্বৰ ভোটকেন্দ্ৰসমূহ নিৰীক্ষণ কৰা হয়। ভোটকেন্দ্ৰসমূহৰ প্ৰস্তুতি আৰু আন্তঃগাঁথনিৰ বুজ ল’বলৈ এই পৰিদৰ্শন কৰা হয়। পৰ্যবেক্ষকগৰাকীয়ে কেন্দ্ৰসমূহৰ ব্যৱস্থাপনাসমূহ পৰ্যালোচনা কৰে আৰু নিৰ্বাচন প্ৰক্ৰিয়াটো সুচাৰুৰূপে পৰিচালনা কৰাৰ স্বাৰ্থত সকলো যাৱতীয় প্ৰস্তুতি সময়মতে সম্পূৰ্ণ কৰাৰ ওপৰত গুৰুত্ব আৰোপ কৰে।
পৰিদৰ্শনৰ সময়ত তাৎক্ষণিক সংশোধনমূলক ব্যৱস্থা গ্ৰহণৰ বাবে প্ৰয়োজনীয় নিৰ্দেশনা প্ৰদান কৰা হয়। ইয়াৰ ভিতৰত সকলো বুথ পৰ্যায়ৰ বিষয়া সকলক (BLO) পলম নকৰাকৈ বৈধ পৰিচয় পত্ৰ প্ৰদান কৰা, ভোটকেন্দ্ৰসমূহত পৰ্যাপ্ত স্থান আৰু সঠিক ব্যৱস্থাপনা নিশ্চিত কৰা, আৰু নিৰ্মাণ কাৰ্য চলি থকা কেন্দ্ৰসমূহৰ কাম নিৰ্বাচনৰ তাৰিখৰ যথেষ্ট পূৰ্বেই সম্পূৰ্ণ কৰাটো নিশ্চিত কৰা হয়।
তদুপৰি, পৰিদৰ্শনৰ সময়ত চেক্টৰ বিষয়া আৰু BLO সকলক নিজ নিজ ভোটকেন্দ্ৰত উপস্থিত থাকিবলৈ নিৰ্দেশ প্ৰদান কৰা হয় আৰু সকলো ভোটকেন্দ্ৰ যাতে সকলো সময়তে ব্যৱহাৰোপযোগী হৈ থাকে সেয়া নিশ্চিত কৰিবলৈ নিৰ্দেশ প্ৰদান কৰা হয়।