আটছাৰ তীব্ৰ প্ৰতিবাদত কঁপিল ডিব্ৰুগড় মহানগৰ
নীতিবহিৰ্ভূতভাৱে চাহ বাগিচাৰ মাটি বিক্ৰী কৰা বাগিচাৰ মালিক পক্ষৰ বিৰুদ্ধে
গৰজি উঠিল অসম চাহ জনজাতি ছাত্ৰ সন্থা
চাইন অন ডেস্ক,২৮এপ্ৰিলঃ
আটছাৰ তীব্ৰ প্ৰতিবাদত কঁপিল ডিব্ৰুগড় মহানগৰ।ডিব্ৰুগড় মহানগৰৰ মেডিকেল কলেজৰ সমীপবৰ্তী জালান চাহ বাগিচাৰ ভূমি,চাহ গছ উভালি খণ্ড খণ্ডকৈ বাগিচাৰ মাটি বিক্ৰী কৰাৰ প্ৰতিবাদত নামিল আটছা।আটছাৰ দাবী যে হালধী খেতিৰ নামত চাহ গছ ধ্বংস কৰিছে উজনিৰ একাংশ বাগিচাৰ মালিকপক্ষই।চাহ বাগিচাৰ ভূমি শ্ৰেণী পৰিৱৰ্তনেৰে একাংশ পুঁজিপতিৰ ওচৰত বিক্ৰী কৰিছে বাগিচাৰ মাটি। নীতিবহিৰ্ভূতভাৱে চাহ বাগিচাৰ মাটি বিক্ৰী কৰা বাগিচাৰ মালিক পক্ষৰ বিৰুদ্ধে গৰজি উঠিল অসম চাহ জনজাতি ছাত্ৰ সন্থা। ডিব্ৰুগড়ৰ দক্ষিণ জালান নগৰ চাহ বাগিচাৰ মুখ্য কাৰ্যালয়ৰ মাটি জে এছ বি কনষ্ট্ৰাকশ্যন নামৰ প্ৰতিষ্ঠানটোক বাণিজ্যিক আৱাস নিৰ্মাণৰ বিৰুদ্ধে আজি তীব্ৰ প্ৰতিবাদ সাব্যস্ত কৰে আটছাৰ ডিব্ৰুগড় 
জিলাই। আজি জিলা আয়ুক্ত কাৰ্যালয়ৰ সন্মুখত দুই ঘন্টীয়া প্ৰতিবাদী ধৰ্ণা কাৰ্যসূচীৰ জৰিয়তে বিভিন্ন প্ৰতিবাদী শ্লোগানেৰে পৰিৱেশ উত্তাল কৰি তোলে।
আটছাই উত্থাপন কৰা অভিযোগ অনুসৰি চাহ নগৰী ডিব্ৰুগড় মহানগৰৰ ডিব্ৰুগড় পূৱ ৰাজহ চক্ৰ অধীনৰ বৰ্দ্ধিত গাভৰুপথাৰ ৱাৰ্ডৰ ১৬ নং পট্টাৰ ৪২ নং দাগ আৰু ৭১ নং পট্টাৰ ৪১ নং দাগৰ পাঁচ বিঘাতকৈ অধিক ভূমিত দক্ষিণ জালান নগৰ চাহ বাগিচাৰ লগতে জালান টি কোম্পানীৰ বাগিচা সমুহৰ প্ৰধান কাৰ্যালয় আছিল। কিন্তু চাহ শ্ৰমিকৰ অধিকাৰ প্ৰদত্ত এই ভূমিৰ পৰা চাহ বাগিচাৰ প্ৰধান কাৰ্যালয়টো সম্পূৰ্ণৰূপে ভাঙি ডিব্ৰুগড় পূৱ ৰাজহ চক্ৰ বিষয়াৰ হুকুম নং RECL/17/517/1025 শ্ৰেণী সংশোধনীকৰণৰ প্ৰস্তাৱৰ জৰিয়তে ২০২৫ চনৰ ২ আগষ্টত জালান নগৰ টি কোম্পানীৰ উক্ত ভূমি খিনিৰ ‘চাহ তলি’ৰ পৰা ১ম বেপাৰৰ ঠাইলৈ শ্ৰেণী পৰিবৰ্তন কৰি চক্ৰান্তমুলকভাৱে জে এছ বি কনষ্ট্ৰাকশ্যন আৰু অনান্য ব্যক্তিক বিক্ৰী কৰা হ’ল বুলি আটছাৰ কেন্দ্ৰীয় সাধাৰণ সম্পাদক লক্ষীন্দৰ কুমীয়ে সংবাদ মাধ্যমৰ আগত সদৰী কৰে।তেওঁ 
পুনৰাই অভিযোগত কয়, বৰ্তমানে জে এছ বি কনষ্ট্ৰাকশ্যনে এই মাটিত কেৱল ধন ঘটাৰ স্বাৰ্থত বাণিজ্যিক আৱাস নিৰ্মাণ কৰিছে।
আনহাতে বদ্ধিত গাভৰুপথাৰ ৱাৰ্ডৰ ১৬নং পট্টাৰ ৪২নং দাগ আৰু ৭১ নং পট্টাৰ ৪১ নং দাগৰ ভূমি চাহ তলিৰ পৰা ১ম বেপাৰৰ ঠাইলৈ শ্ৰেনী পৰিবৰ্তন কৰি মেডিকেল ৰোডত থকা জালান নগৰ বাগিচাখনৰ মুখ্য কাৰ্যালয়ৰ সমস্ত ভূমি বাণিজ্যিক আৱাস নিৰ্মাণৰ বাবে জে এছ বি কনষ্ট্ৰাকশ্যনক
কেনেকৈ বিক্ৰী কৰিলে তাৰ এক উচ্চ পৰ্যায়ৰ তদন্ত কৰাৰ লগতে JSB Constructionৰ বাণিজ্যিক আৱাস নিৰ্মাণৰ কাম সম্পূৰ্ণৰূপে বন্ধ কৰাৰ দাবী উত্থাপন কৰে।অন্যথা শীঘ্ৰে আটছাই তীব্ৰ আন্দোলন গঢ়ি তুলিবলৈ বাধ্য হ’ব বুলি সঁকিয়নী প্ৰদান কৰে।