দুবছৰেই বন্ধ বাছ সেৱা!
ধুবুৰী–শিলিগুৰি এএছটিচি বাছ সেৱা
শীঘ্ৰে পুনৰ সেৱা আৰম্ভৰ দাবী আছুৰ
চাইন অন ডেস্ক,১৭জুলাই:
ধুবুৰীৰ পৰা পশ্চিমবংগৰ শিলিগুৰিলৈ চলাচল কৰা অসম ৰাজ্যিক পৰিবহণ নিগম (এএছটিচি)ৰ নিজস্ব বাছ সেৱা প্ৰায় দুবছৰে বন্ধ হৈ থকাৰ পৰিপ্ৰেক্ষিতত সাধাৰণৰ যাত্ৰীৰ মাজত তীব্ৰ অসন্তুষ্টিৰ সৃষ্টি হৈছে। চৰকাৰী বাছ সেৱা বন্ধ হৈ থকাৰ ফলত স্বাভাবিকভাবেই যাত্ৰীসকল ব্যক্তিগত খণ্ডৰ শিলিগুড়িগামী যাত্ৰীবাহী বাছৰ ওপৰত নিৰ্ভৰশীল হ’বলৈ বাধ্য হৈছে। তাৰেই পৰিপ্ৰেক্ষিতত সদৌ অসম ছাত্ৰ সন্থা (আছু)ৰ ধুবুৰী জিলা সমিতিয়ে অসমৰ মুখ্যমন্ত্ৰী, পৰিবহণ বিভাগৰ মন্ত্ৰী, ধুবুৰী জিলা আয়ুক্ত আৰু এএছটিচিৰ পৰিচালন সঞ্চালকৰ ওচৰত ধুবুৰীৰ পৰা শিলিগুৰিলৈ বাছ সেৱা অনতিপলমে পুনৰ আৰম্ভ কৰাৰ দাবী জনাইছে। ইপিনে,
এএছটিচিৰ ধুবুৰী আস্থানৰ অধীক্ষকে জনোৱা মতে, নিগমৰ নিজস্ব বাছসমূহৰ অনলাইন ফিটনেছ পঞ্জীয়ন সম্পূৰ্ণ নোহোৱাৰ বাবেই পশ্চিমবংগ চৰকাৰে বিভাগৰ বাহনসমূহ ৰাজ্যখনত চলাচলৰ অনুমতি দিয়া নাই। এই সমস্যা সমাধানৰ বাবে বহুবাৰ আবেদন-নিবেদন কৰা হৈছিল যদিও এতিয়ালৈকে কোনো ইতিবাচক ফল লাভ কৰা হোৱা নাই বুলিও দাবী তেওঁৰ । ইপিনে, নিতৌ পুৱাৰ পৰা নিশা লৈ ব্যক্তিগত খণ্ডৰ বহু বাছ গুৱাহাটীলৈ অহা-যোৱা কৰাৰ বিপৰীতে বৰ্তমান ধুবুৰীৰ পৰা এএছটিচিৰ নিজস্ব মাত্ৰ দুখন বাছ গুৱাহাটী অভিমুখে চলাচল কৰে বুলিও জানিব পৰা গৈছে। পূৰ্বে বঙাইগাঁও, গোৱালপাৰা, যোগীঘোপা আদি স্থানলৈ চলাচল কৰিলেও বৰ্তমানে কিন্তু ধুবুৰীৰ পৰা ওচৰ-চুবুৰীয়া জিলাসমূহলৈ নিগমৰ কোনো নিজস্ব বাছ সেৱা উপলব্ধ নহয়। তাৰেই পৰিপ্ৰেক্ষিতত ধুবুৰীৰ পৰা গুৱাহাটী, শিলিগুৰি আৰু ওচৰ-চুবুৰীয়া জিলাসমূহলৈ এএছটিচিৰ নিজস্ব বাছ সেৱা পুনৰ আৰম্ভ কৰাৰ বাবে বিভাগ তথা চৰকাৰে পদক্ষেপ লোৱাটো কিন্তু কামনা কৰিছে বহুতেই।