ডিব্ৰুগড়ত বন বিভাগৰ ধাৰাবাহিক অভিযান
তিনিদিনত জব্দ ১০টা অবৈধ কাঠফলা মিল
চাইন অন ডেস্ক,৩জুলাইঃ
ৰাজ্যৰ বন বিভাগৰ দায়িত্ব গ্ৰহণ কৰাৰ পিছতে বন মন্ত্ৰী জয়ন্ত মল্ল বৰুৱাৰ কঠোৰ নিৰ্দেশনাত অনান্য জিলাৰ লগতেই ডিব্ৰুগড় জিলা বন বিভাগে অবৈধ কাঠফলা মিলৰ বিৰুদ্ধে এক বৃহৎ অভিযান আৰম্ভ কৰিছে। জিলাখনৰ বিভিন্ন প্ৰান্তত দীৰ্ঘদিন ধৰি চলি অহা এই অবৈধ ব্যৱসায়ৰ ওপৰত বন বিভাগে চলাইছে তীক্ষ্ণ নজৰ। জিলা বনপ্ৰাধিকাৰী বিষয়া নন্ধা কুমাৰে সংবাদ মাধ্যমৰ আগত প্ৰকাশ কৰা অনুসৰি, বিগত তিনিদিন ধৰি বিভাগে এক নিৰন্তৰ অভিযান চলাই আহিছে। এই অভিযানৰ ফলস্বৰূপে এতিয়ালৈকে জিলাখনৰ পৰা মুঠ ১০টা অবৈধ কাঠফলা মিল (পেনচ’মিল) চিজ কৰিবলৈ সক্ষম হৈছে। বিষয়াগৰাকীয়ে জনায় যে, ৩০ জুনৰ পৰা আৰম্ভ হোৱা এই অভিযানত প্ৰথম দিনাই বিভাগে সফলতা অৰ্জন কৰে আৰু কেৱল কালিৰ দিনটোতেই ৫টা অবৈধ মিল জব্দ কৰিবলৈ সক্ষম হয়। বন বিভাগৰ এই সফলতাৰ মূলতে হৈছে জনসাধাৰণৰ সক্ৰিয় সহযোগিতা। বনপ্ৰাধিকাৰী বিষয়া নন্ধা কুমাৰৰ ভাষ্য মতে— বন মন্ত্ৰীৰ নিৰ্দেশনা আৰু উৎসাহিত কৰাৰ পাছতেই জনসাধাৰণৰ পৰা 
অবৈধ কাৰ্যকলাপৰ বিষয়ে পোনপটীয়া অভিযোগ আৰু তথ্য আমাৰ ওচৰলৈ আহিবলৈ আৰম্ভ কৰিছে। সেই তথ্যৰ ভিত্তিতেই আমি একচন লৈ আছো। তেওঁ উল্লেখ কৰে যে স্থানীয় ৰাইজে বিভিন্ন অঞ্চলত চলি থকা অবৈধ কাৰ্যকলাপৰ বিষয়ে অৱগত কৰা বাবেই বিভাগে ততাতৈয়াকৈ ব্যৱস্থা গ্ৰহণ কৰিবলৈ সক্ষম হৈছে। জিলাখনত বৰ্তমান কিমানটা বৈধ মিল আছে সেই সন্দৰ্ভত বিষয়াগৰাকীয়ে স্পষ্ট কৰে যে, ডিব্ৰুগড়ত ১০টা প্ৰাইমেৰী উড বেষ্ট ইণ্ডাষ্ট্ৰীজ আৰু প্ৰায় ৭০ৰ পৰা ৮০টা চেকেণ্ডৰী উড বেষ্ট ইণ্ডাষ্ট্ৰীজ চৰকাৰী নিয়ম অনুসৰি পঞ্জীয়নভুক্ত হৈ আছে। তেওঁলোকক পাঁচ বছৰৰ বাবে কাৰ্যপন্থা চলোৱাৰ অনুমতি প্ৰদান কৰা হৈছে। বৈধ 
অনুজ্ঞাপত্ৰ থকা ব্যৱসায়ীসকলে নিৰ্ধাৰিত নীতি-নিৰ্দেশনা মানি তেওঁলোকৰ কাম অব্যাহত ৰাখিব পাৰিব বুলিও বিষয়াগৰাকীয়ে উল্লেখ কৰে। ডিব্ৰুগড়ৰ উপকণ্ঠৰ ঘোঁৰামৰা চেনিবিল অঞ্চলত শেহতীয়াকৈ চলোৱা এক বিশেষ অভিযানত বন বিভাগে এটা অবৈধ কাঠফলা মেচিন উচ্ছেদ কৰাৰ লগতে চোৰাং কাঠৰ এক বৃহৎ ভাণ্ডাৰ জব্দ কৰিবলৈ সক্ষম হয়। অৱশ্যে বন বিভাগৰ উপস্থিতিৰ উমান পাই মিলৰ গৰাকী ৰমেন গগৈ পলায়ন কৰিবলৈ সক্ষম হয়। ডিব্ৰুগড় নগৰৰ পাচঁআলি, মাইজান, ৰহমৰীয়া আৰু অকলেণ্ড আদি অঞ্চলত দীৰ্ঘদিন ধৰি অৰুণাচলৰ পৰা অনা চোৰাং কাঠৰ
ব্যৱসায় চলাই অহাৰ অভিযোগ উত্থাপিত হৈ আহিছে। বন বিভাগৰ এই সক্ৰিয় অভিযানে এতিয়া চোৰাং ব্যৱসায়ীসকলৰ মাজত এক ভীতিৰ সৃষ্টি কৰিছে। বিভাগটোৱে ভৱিষ্যতেও এই অভিযান অব্যাহত ৰাখিব বুলি স্পষ্ট কৰি দিছে।