ডিব্ৰুগড়ত ড° ভূপেন হাজৰিকাক ১৪তম মৃত্যু বৰ্ষপূৰ্তি
শ্ৰদ্ধাঞ্জলি জনালে ৫,০০০ কণ্ঠই
চাইন অন ডেস্ক:
ভাৰত ৰত্ন ড° ভূপেন হাজৰিকাৰ ১৪তম মৃত্যু বৰ্ষপূৰ্তি উপলক্ষে বুধবাৰে ডিব্ৰুগড়ৰ চৌকিডিঙী খেলপথাৰত প্ৰায় ৫,০০০ লোক এক বৃহৎ ক’ৰাছ প্ৰদৰ্শনৰ বাবেই আজি একত্ৰিত হয়। ডিব্ৰুগড় জিলা প্ৰশাসন আৰু সাংস্কৃতিক বিভাগৰ যুটীয়া উদ্যোগত আয়োজিত এই অভূতপূৰ্ব সংগীতানুষ্ঠানত বিভিন্ন বয়সৰ অংশগ্ৰহণকাৰীয়ে একত্ৰিত হৈ কিংবদন্তি সংগীতজ্ঞৰ অমৰ সৃষ্টি “মানুহে মানুহৰ বাবে” গীতটি পৰিৱেশন কৰে।
বৃহৎ এই সমাৱেশে এক আবেগিক পৰিৱেশ সৃষ্টি কৰিছিল য’ত স্কুলীয়া ছাত্ৰ-ছাত্ৰী, যুৱক-যুৱতী আৰু বয়সস্থ নাগৰিকে একেলগে গীত গাই শ্ৰদ্ধাঞ্জলি জ্ঞাপন কৰে। যাৰ সুৰ আৰু সংগীতৰ মায়াজালত আজিও প্ৰজন্মসমূহক অনুপ্ৰাণিত কৰি ৰাখিছে। অনুষ্ঠানটোৱে ড° হাজৰিকাৰ সংগীতৰ শাশ্বত আকৰ্ষণ আৰু অসমীয়া সংস্কৃতিৰ ওপৰত তেওঁৰ স্থায়ী প্ৰভাৱৰ প্ৰদৰ্শন কৰে।
অসমৰ শক্তি মন্ত্ৰী আৰু ডিব্ৰুগড়ৰ বিধায়ক প্ৰসন্ত ফুকন, মেয়ৰ সৈকত পাত্র, ডিব্ৰুগড় বিশ্ববিদ্যালয়ৰ উপাচাৰ্য জিতেন হাজৰিকা, জিলা উপায়ুক্ত বিক্ৰম কৈৰী, আৰু অন্যান্য গৰাকীয়ে সাধাৰণ নাগৰিকৰ কাষত থিয় দি এই সংগীত প্ৰতিভাক শ্ৰদ্ধাঞ্জলি জনাই ক’ৰাছ প্ৰদৰ্শনত অংশগ্ৰহণ কৰে।
অনুষ্ঠানত মন্ত্ৰী প্ৰশান্ত ফুকনে কয়, “ড° ভূপেন হাজৰিকাৰ সংগীত সময় আৰু সীমা অতিক্ৰম কৰি আছে। আজিৰ এই সমাৱেশে তেওঁৰ মানৱতা আৰু কৰুণাৰ বাৰ্তাই কেনেকৈ সমাজৰ সকলো শ্ৰেণীৰ লোকক একত্ৰিত কৰি ৰাখিছে সেয়া প্ৰদৰ্শন কৰিছে।”
মেয়ৰ সৈকত পাত্রে এই বৃহৎ সমাৱেশ দেখি তেওঁৰ আবেগ প্ৰকাশ কৰে। “৫,০০০ কণ্ঠই, য’ত সৰু ল’ৰা-ছোৱালীও অন্তৰ্ভুক্ত, একেলগে ‘মানুহে মানুহৰ বাবে’ গীতটি গাই থকা দেখা টো ভূপেন দাৰ স্থায়ী অৱদানৰ প্ৰমাণ। তেওঁৰ গীতসমূহ অসমৰ সাংস্কৃতিক হৃদস্পন্দন হৈ ৰৈছে আৰু ভৱিষ্যত প্ৰজন্মক অনুপ্ৰাণিত কৰি ৰাখিব,” বুলি তেওঁ কয়।
জিলা উপায়ুক্ত বিক্ৰম কৈৰীয়ে কয়, “এই সমূহীয়া শ্ৰদ্ধাঞ্জলিয়ে নিশ্চিত কৰে যে ভৱিষ্যত প্ৰজন্মে পাৰস্পৰিক সন্মান আৰু সহানুভূতিৰ ওপৰত গঢ়ি উঠা এক সন্মিলিত সমাজৰ ড° হাজৰিকাৰ দৃষ্টিভংগীৰ সৈতে সংযুক্ত হৈ ৰয়। এনেধৰণৰ অনুষ্ঠানসমূহে তেওঁৰ আত্মাক জীয়াই ৰাখে।”
শ্ৰদ্ধাঞ্জলিৰ আয়োজন দিনটোৰ আৰম্ভণিতে জিলা উপায়ুক্তৰ কাৰ্যালয় চৌহদত আৰম্ভ হৈছিল। য’ত মন্ত্ৰী প্ৰসন্ত ফুকন, জিলা উপায়ুক্ত বিক্ৰম কৈৰী, জিলা পৰিষদৰ মুখ্য কাৰ্যবাহী বিষয়া বিপুল কুমাৰ দাস, আৰু কেইবাগৰাকী প্ৰশাসনিক বিষয়াই শ্ৰদ্ধাঞ্জলি জ্ঞাপন কৰিবলৈ একত্ৰিত হৈছিল। বিষয়াসকলে আজি উপায়ুক্ত কাৰ্যালয় চৌহদত স্থাপিত ড° ভূপেন হাজৰিকাৰ প্ৰতিমূৰ্তিৰ আগত ফুলৰে শ্ৰদ্ধাঞ্জলি জ্ঞাপন কৰি আৰু সন্মানীয় প্ৰদীপ জ্বলাই দিনটোৰ কাৰ্য্যক্ৰমৰ বাবে এক গাম্ভীৰ্য্যময় সূচনা কৰে।
চৌকিডিঙী খেলপথাৰত এই বৃহৎ ক’ৰাছ প্ৰদৰ্শন ডিব্ৰুগড়ৰ সৰ্ববৃহৎ সাংস্কৃতিক সমাৱেশৰ ভিতৰত অন্যতম হিচাপে পৰিগণিত হৈছে, যিয়ে চহৰখনৰ অসমৰ গণশিল্পীৰ আৰু ভাৰতীয় সংগীত আৰু সংস্কৃতিৰ অদ্বিতীয় অৱদানৰ প্ৰতি গভীৰ শ্ৰদ্ধা প্ৰদৰ্শন কৰিছে