কাৰ্বি আংলঙত বনৰীয়া হাতীৰ সন্ত্ৰাস
আক্ৰমণত নিহত তিনি বছৰীয়া শিশু
চাইন অন ডেস্ক,১৪মে’:
বনৰীয়া হাতীৰ আক্ৰমণত এটি ৩ বছৰীয়া শিশুৰ মৃত্যু হয়। এই ঘটনাই অঞ্চলটোত শোকৰ ছাঁ পেলাইছে।
জিলাখনৰ খটখটী থানাৰ অন্তৰ্গত কাৰাগাওঁ পোহৰা চকীৰ অধীনস্থ অৰুচা আদিবাসী গাঁৱত সংঘটিত হৈছে এই কৰুণ ঘটনা।
জানিব পৰা মতে, বৃহস্পতিবাৰে নিশা প্ৰায় ১ বজাত এটা বনৰীয়া হাতীয়ে গাঁওখনত প্ৰৱেশ কৰি কেইবাটাও ঘৰত আক্ৰমণ কৰি ভাঙি পেলায়।
এই ঘটনাত আন দুজন লোক গুৰুতৰভাৱে আহত হয়। নিহত শিশুটি বেঙেনাবাৰীৰ জহিৰুল ইছলামৰ পুত্ৰ তানবিৰ আলম (৩) বুলি জানিব পৰা গৈছে।
ইফালে এই ঘটনাৰ খবৰ পোৱাৰ লগে লগে কাৰাগাওঁ আৰক্ষী চকীৰ আৰক্ষী গৈ ঘটনাস্থলীত উপস্থিত হয় আৰু মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে ডিফু চিকিৎসালয়লৈ প্ৰেৰণ কৰা হয়।