বিদ্যুৎ যোগান আৰু ৰিংবান্ধ নিৰ্মাণৰ দাবী
ডিব্ৰুগড়ত কৃষক মুক্তি সংগ্ৰাম সমিতিৰ অৱস্থান ধৰ্মঘট
চাইন অন ডেস্ক,২৪আগষ্টঃ
ডিব্ৰুগড়ৰ চৌকিডিঙ্গী চাৰিআলিত আজি কৃষক মুক্তি সংগ্ৰাম সমিতিৰ বৰবৰুৱা (বগীবিল) আঞ্চলিক সমিতিৰ উদ্যোগত এক প্ৰতিবাদী অৱস্থান ধৰ্মঘট কাৰ্যসূচী ৰূপায়ণ কৰা হয়। হাতে হাতে পষ্টাৰ-বেনাৰ লৈ আৰু চৰকাৰবিৰোধী বিভিন্ন প্ৰতিবাদী শ্লোগানেৰে প্ৰতিবাদকাৰীসকলে উত্তাল পৰিৱেশৰ সৃষ্টি কৰে। প্ৰতিবাদকাৰীসকলে অভিযোগ কৰা অনুসৰি, অসমত বানৰ সংহাৰী ৰূপ অব্যাহত থকাৰ 
সময়তে বগীবিল অঞ্চলৰ ২ নং ৱাকহাবিৰ পৰা লেঙাপথাৰলৈকে বিস্তৃত ৰিংবান্ধটোৰ অৱস্থা অতি শোচনীয় হৈ পৰিছে। যিকোনো মুহূৰ্ততে ব্ৰহ্মপুত্ৰৰ পানীয়ে উক্ত বান্ধ ভাঙি পেলাই হাজাৰ হাজাৰ লোকক গৃহহীন কৰাৰ লগতে কৃষিভূমি আৰু পশু-ধনৰ অপূৰণীয় ক্ষতি কৰাৰ তীব্ৰ শংকা দেখা দিছে। ইয়াৰ উপৰি লেঙাপথাৰ আৰু ৱাকহাবি গাঁৱত এতিয়াও বিদ্যুৎ যোগান নোহোৱাত অঞ্চলবাসী চৰম সমস্যাৰ মুখামুখি হৈছে। আজিৰ এই প্ৰতিবাদী 
কাৰ্যসূচীৰ জৰিয়তে ২ নং ৱাকহাবিৰ পৰা লেঙাপথাৰলৈ থকা ৰিংবান্ধটোৰ পুনৰ নিৰ্মাণ কাৰ্য অচিৰেই আৰম্ভ কৰা, খহনীয়া প্ৰতিৰোধৰ বাবে উক্ত ৰিংবান্ধৰ এলেকাত সুচাৰুৰূপে জিঅ’বেগ ব্যৱহাৰ কৰা, ৰিংবান্ধটোৰ ওপৰত স্থায়ীভাৱে পকী পথ নিৰ্মাণৰ ব্যৱস্থা কৰা, লেঙাপথাৰ আৰু ৰাসাবি গাঁৱত শীঘ্ৰে বিদ্যুৎ
যোগানৰ সু-ব্যৱস্থা কৰা আদি দাবীসমূহ উত্থাপন কৰে। কাৰ্যসূচীৰ অন্তত সমিতিৰ সভাপতি গোপাল সিং, কাৰ্যকৰী সভাপতি অৰজু আলি আৰু সাধাৰণ সম্পাদক ৰাজ অসমৰ স্বাক্ষৰিত এখন স্মাৰক পত্ৰ ডিব্ৰুগড় জিলাৰ জিলা আয়ুক্তলৈ প্ৰেৰণ কৰা হয়। প্ৰতিবাদকাৰীসকলে সকীয়াই দিয়ে যে যদিহে জনসাধাৰণৰ জীৱন-সম্পত্তিৰ সুৰক্ষাৰ স্বাৰ্থত প্ৰশাসনে এই দাবীসমূহ অতি সোনকালে পূৰণ নকৰে, তেন্তে অনাগত দিনত আৰু অধিক তীব্ৰ আন্দোলন গঢ়ি তোলা হ’ব।