বিশ্ব পৰিৱেশ দিৱসত ডিব্ৰুগড় প্ৰেছ ক্লাবৰ সেউজ সংকল্প
নাহৰ গছ ৰোপণ কৰি পৰিৱেশ সুৰক্ষাৰ বাৰ্তা
জুবিন গাৰ্গলৈ বিশেষ শ্ৰদ্ধাঞ্জলি
চাইন অন ডেস্ক,৫জুনঃ
বিশ্ব পৰিৱেশ দিৱস উপলক্ষে ডিব্ৰুগড় প্ৰেছ ক্লাবে ১৭১ নং বেটেলিয়ন চিআৰপিএফ আৰু বন বিভাগৰ সহযোগত চৌকিডিঙীস্থিত প্ৰেছ ক্লাব চৌহদত এক বিশেষ বৃক্ষৰোপণ কাৰ্যসূচীৰ আয়োজন কৰে। পৰিৱেশ সংৰক্ষণ আৰু সেউজ ভৱিষ্যতৰ সংকল্পৰে অনুষ্ঠিত এই কাৰ্যসূচীত নাহৰ গছৰ পুলি ৰোপণ কৰি প্ৰকৃতি সংৰক্ষণৰ প্ৰতি সামাজিক দায়বদ্ধতাৰ বাৰ্তা প্ৰেৰণ কৰা হয়।
অনুষ্ঠানত চিআৰপিএফৰ ডিআইজি (অপাৰেশ্যনছ) প্ৰভাকৰ ত্ৰিপাঠী মুখ্য অতিথি হিচাপে উপস্থিত থাকে। আনহাতে, ১৭১ নং বেটেলিয়ন চিআৰপিএফৰ কমাণ্ডিং অফিচাৰ এছ. কেংগু, দ্বিতীয় কমাণ্ডেণ্ট সঞ্জয় মাৰৱাৰ, ডিব্ৰুগড় জিলা ক্ৰীড়া সন্থাৰ সাধাৰণ সম্পাদক তথা প্ৰাক্তন ৰঞ্জী ক্ৰিকেটাৰ কামাখ্যা শইকীয়া, আকাশবাণী ডিব্ৰুগড়ৰ প্ৰাক্তন কাৰ্যসূচী প্ৰধান লোহিত ডেকা আৰু ড° ৰাধাকৃষ্ণ স্কুল অৱ আৰ্টছ, কমাৰ্চ এণ্ড চাইন্সৰ সঞ্চালক তথা অধ্যক্ষ বিকাশ গগৈ বিশিষ্ট অতিথি হিচাপে অংশগ্ৰহণ কৰে।
ডিব্ৰুগড় প্ৰেছ ক্লাবৰ সভাপতি মানস জ্যোতি দত্ত, সম্পাদক ঋপুঞ্জয় দাসকে ধৰি ক্লাবৰ বিষয়ববীয়া আৰু সদস্যসকলেও কাৰ্যসূচীত উপস্থিত থাকে। মুখ্য অতিথি প্ৰভাকৰ ত্ৰিপাঠীৰ নেতৃত্বত সকলো অতিথি আৰু সদস্যই নাহৰ গছৰ পুলি ৰোপণ কৰে।
উল্লেখযোগ্য যে, অসমৰ জনপ্ৰিয় কণ্ঠশিল্পী Zubeen Garg-ৰ নাহৰ গছৰ প্ৰতি থকা বিশেষ অনুৰাগৰ প্ৰতি সন্মান জনাই এই বৃক্ষৰোপণ কাৰ্যসূচী উৎসৰ্গা কৰা হয়।
সভাত ভাষণ প্ৰদান কৰি ডিআইজি প্ৰভাকৰ ত্ৰিপাঠীয়ে কয় যে, ক’ভিড-১৯ মহামাৰীয়ে সমগ্ৰ বিশ্বক অক্সিজেনৰ গুৰুত্ব উপলব্ধি কৰাইছিল। তেওঁ কয় যে ক’ভিডৰ সময়ত অক্সিজেনেই ৰোগীৰ বাবে আটাইতকৈ প্ৰয়োজনীয় উপাদান হিচাপে পৰিগণিত হৈছিল আৰু গছ-গছনিয়ে হৈছে অক্সিজেনৰ আটাইতকৈ ডাঙৰ প্ৰাকৃতিক উৎস। সেয়ে অধিক সংখ্যক গছ ৰোপণ কৰাৰ লগতে বিদ্যমান গছসমূহ সংৰক্ষণ কৰাটোও সকলোৰে দায়িত্ব বুলি তেওঁ উল্লেখ কৰে।
আকাশবাণী ডিব্ৰুগড়ৰ প্ৰাক্তন কাৰ্যসূচী প্ৰধান লোহিত ডেকাই কয় যে, কেৱল গছৰ পুলি ৰোপণ কৰিলেই নহয়, সেই পুলিসমূহক পূৰ্ণাঙ্গ গছলৈ পৰিণত নোহোৱালৈকে যথাযথ যত্ন আৰু সংৰক্ষণ কৰাটোও সমানেই জৰুৰী।
অনুষ্ঠানত উপস্থিত বক্তাসকলে পৰিৱেশ সংৰক্ষণ, জৈৱ বৈচিত্ৰ্যৰ বিকাশ আৰু সেউজ জীৱনশৈলী গ্ৰহণৰ প্ৰয়োজনীয়তাৰ ওপৰত আলোকপাত কৰে। অনুষ্ঠানৰ অন্তত ডিব্ৰুগড় প্ৰেছ ক্লাবৰ ফালৰ পৰা অতিথিসকলক স্মৃতিচিহ্ন আৰু পৰম্পৰাগত অসমীয়া গামোচা প্ৰদান কৰি সম্বৰ্ধনা জনোৱা হয়।
বিশ্ব পৰিৱেশ দিৱস উপলক্ষে অনুষ্ঠিত এই কাৰ্যসূচীয়ে কেৱল আনুষ্ঠানিক বৃক্ষৰোপণতে সীমাবদ্ধ নাথাকি সমাজলৈ প্ৰকৃতি সংৰক্ষণ, গছৰ গুৰুত্ব আৰু ভৱিষ্যৎ প্ৰজন্মৰ বাবে সেউজ পৰিৱেশ নিশ্চিত কৰাৰ এক শক্তিশালী বাৰ্তা প্ৰেৰণ কৰে।