ডিব্ৰুগড়ত ব্ৰহ্মপুত্ৰৰ বালিচৰত আৱদ্ধ হৈ থকা চাৰিজনক ৭২ ঘণ্টাৰ পাছত উদ্ধাৰ

চাইন অন ডেস্কঃ

জিলাখনৰ চাবুৱাৰ ৰহমৰীয়াৰ ব্ৰহ্মপুত্ৰ নদীৰ এক দুৰ্গম বালিচৰত ৭২ ঘণ্টা আৱদ্ধ হৈ থকা চাৰিজন ব্যক্তিক অৱশেষত আজি ৰাজ্য দুৰ্যোগ সঁহাৰি বাহিনীয়ে (SDRF) উদ্ধাৰ কৰিছে।বাৰম্বাৰ প্ৰচেষ্টাৰ পিছতো উদ্ধাৰ প্ৰচেষ্টা ব্যৰ্থ হোৱাৰ পাছত এই উদ্ধাৰ কাৰ্য সম্পন্ন হয়।আজি উদ্ধাৰ হোৱা ব্যক্তি কেইজন ক্ৰমে—অজয় ওৰাং, প্ৰাঞ্জল ওৰাং, ৰঞ্জিত কুৰ্মী আৰু প্ৰীতিকাই দাস।

যোৱা ৩০ মে’ৰ পৰা ৰহমৰীয়াৰ পলভোঙা চাপৰিত আৱদ্ধ হৈ আছিল।হঠাৎ ব্ৰহ্মপুত্ৰৰ পানী বাঢ়ি অহাত তেওঁলোক আবদ্ধ হৈ পৰে।জানিব পৰা অনুসৰি উক্ত চাৰিজন ব্যক্তিয়ে দেশী নাৱেৰে পলভোঙা চাপৰিলৈ গৈছিল গাখীৰ খুটিলৈ।উল্লেখ্য যে পলভোঙা চাপৰি ব্ৰহ্মপুত্ৰৰ মাজৰ এটা বালিচৰ।এজন নাৱৰীয়াই তেওঁলোকক ৰাতিপুৱা এৰি দি ঘূৰি আহিছিল আৰু সন্ধিয়া তেওঁলোকক উভতাই আনিবলৈ পুনৰ অহাৰ কথা আছিল। কিন্তু তেতিয়ালৈকে নদীৰ পানীৰ স্তৰ অপ্ৰত্যাশিতভাৱে বাঢ়ি গৈছিল, ফলত নাৱখন ঘূৰি চাপৰিলৈ যোৱা সম্ভৱ নহ’ল।বহিঃজগতৰ সৈতে

এই বালিচৰত মোবাইল ফোনৰ সংযোগ নথকাত দলটো সম্পূৰ্ণৰূপে সহায়ৰ পৰা বিচ্ছিন্ন হৈ পৰিছিল। দলটো উভতি নহাত স্থানীয় কৰ্তৃপক্ষক অৱগত কৰোৱা হৈছিল আৰু SDRF আৰু স্থানীয় উদ্ধাৰকাৰী দলে তেওঁলোকৰ ওচৰ পাবলৈ একাধিক প্ৰচেষ্টা চলাইছিল। কিন্তু প্ৰবল সোঁত আৰু তিনিখন নদী—ব্ৰহ্মপুত্ৰ, ডিব্ৰু আৰু লোহিতৰ সংগম স্থলে নাৱৰীয়াক অত্যন্ত বিমোৰত পেলাইছিল।

সৌভাগ্যক্ৰমে, আজি ব্ৰহ্মপুত্ৰৰ পানীৰ স্তৰ বিপদ সীমাৰ তলত নামি অহাৰ ফলত SDRF দলটোৱে নিৰাপদভাৱে যাব পাৰিছিল আৰু এক শ্বাসৰুদ্ধকৰ পৰিৱেশ তথা অভিযানৰ পাছত চাৰিওজন ব্যক্তিক জীৱিত অৱস্থাত উদ্ধাৰ কৰিবলৈ সক্ষম হয়।