ৰাষ্ট্ৰীয় ঘাইপথৰ নিৰ্মাণ সম্পূৰ্ণ আৰু মেৰামতি নোহোৱালৈকে টোলগেট বন্ধৰ দাবী !
জনসাধাৰণৰ ওপৰত আৰ্থিক বোজা জাপি দিয়াৰ অভিযোগ
অসম জাতীয়তাবাদী যুৱ পৰিষদৰ
চাইন অন ডেস্ক,৩ছেপ্টেম্বৰঃ
ৰাষ্ট্ৰীয় ঘাইপথৰ নিৰ্মাণ আৰু উন্নয়ন সম্পূৰ্ণ নোহোৱা, জৰাজীৰ্ণ পথসমূহ যথাসময়ত মেৰামতি নকৰা আৰু পথ ব্যৱহাৰকাৰীৰ বাবে প্ৰয়োজনীয় মৌলিক সুবিধা নিশ্চিত নকৰালৈকে ৰাজ্যৰ বিভিন্ন প্ৰান্তত থকা টোলগেটসমূহত টোল কৰ সংগ্ৰহ বন্ধ ৰখাৰ দাবী উত্থাপন কৰিছে অসম জাতীয়তাবাদী যুৱ পৰিষদে।
সংগঠনটোৰ কেন্দ্ৰীয় সভাপতি উজ্জ্বল কুমাৰ চুতীয়া আৰু সাধাৰণ সম্পাদক উদয়ন কুমাৰ গগৈয়ে সংবাদ মাধ্যমলৈ প্ৰেৰণ কৰা এক প্ৰেছ বিজ্ঞপ্তিত অভিযোগ কৰে যে, ৰাজ্যত প্ৰচলিত বিধি-বিধান আৰু জনস্বাৰ্থক আওকাণ কৰি একাংশ টোলগেট স্থাপন কৰি জনসাধাৰণৰ পৰা টোল কৰ সংগ্ৰহ কৰা হৈছে। শদিয়াৰ পৰা ধুবুৰী আৰু 
ধেমাজিৰ পৰা শ্ৰীৰামপুৰ সীমান্তলৈ ৰাজ্যৰ বিভিন্ন প্ৰান্তত স্থাপন কৰা টোলগেটসমূহৰ বৈধতা, অৱস্থান আৰু বিধিগত প্ৰক্ৰিয়াক লৈও সংগঠনটোৱে প্ৰশ্ন উত্থাপন কৰে।যুৱ পৰিষদৰ মতে, সংশ্লিষ্ট পথ পৰিবহণ বিধি অনুসৰি টোল সংগ্ৰহৰ পূৰ্বে পথ নিৰ্মাণ, উন্নয়ন আৰু ৰক্ষণাবেক্ষণৰ লগতে পথ ব্যৱহাৰকাৰীৰ বাবে প্ৰয়োজনীয় মৌলিক সুবিধাসমূহ নিশ্চিত কৰাটো অত্যন্ত গুৰুত্বপূৰ্ণ। কিন্তু ইয়াৰ বিপৰীতে ৰাজ্যৰ বহু ৰাষ্ট্ৰীয় ঘাইপথত নিৰ্মাণকাৰ্য সম্পূৰ্ণ নোহোৱাকৈ অথবা পথৰ অৱস্থা শোচনীয় হৈ থকাৰ পাছতো টোল সংগ্ৰহ অব্যাহত ৰখা হৈছে বুলি অভিযোগ কৰে সংগঠনটোৱে।
বিশেষকৈ উজনি অসম অভিমুখী ৩৭ নং ৰাষ্ট্ৰীয় ঘাইপথৰ যোৰহাট-মৰাণ অংশকে ধৰি ৰাজ্যৰ বিভিন্ন পথৰ নিৰ্মাণ তথা উন্নয়ন এতিয়াও সম্পূৰ্ণ নোহোৱাৰ অভিযোগ উত্থাপন কৰি যুৱ পৰিষদে কয় যে, একাংশ পথৰ দুৰৱস্থা আৰু মেৰামতিৰ অভাৱৰ মাজতো পথ ব্যৱহাৰকাৰীৰ পৰা নিয়মীয়াকৈ টোল সংগ্ৰহ কৰা হৈছে। পথ নিৰ্মাণ আৰু ৰক্ষণাবেক্ষণৰ দায়িত্ব পালনত ব্যৰ্থ হৈ জনসাধাৰণৰ পৰা টোল সংগ্ৰহ কৰাটো চৰকাৰৰ দ্বৈত নীতিৰ এক জ্বলন্ত উদাহৰণ বুলিও নেতাদ্বয়ে মন্তব্য কৰে।
ইফালে, ৰাষ্ট্ৰীয় ঘাইপথত টোল সংগ্ৰহৰ পূৰ্বে পথ ব্যৱহাৰকাৰীৰ বাবে প্ৰাথমিক চিকিৎসা, জৰুৰীকালীন উদ্ধাৰ ব্যৱস্থা, এম্বুলেন্স, শৌচাগাৰকে ধৰি প্ৰয়োজনীয় জনসেৱা নিশ্চিত কৰাটো জৰুৰী বুলি উল্লেখ কৰি সংগঠনটোৱে অভিযোগ কৰে যে, বহু ক্ষেত্ৰত এই মৌলিক সুবিধাসমূহ পৰ্যাপ্তভাৱে নথকাৰ পাছতো টোল সংগ্ৰহ অব্যাহত আছে।
টোলগেটৰ ওচৰত কোনো বাহন বিকল হৈ পৰিলে অথবা ইন্ধন শেষ হৈ গ’লে পথ ব্যৱহাৰকাৰীক জৰুৰীকালীন সহায় আগবঢ়োৱাৰ ক্ষেত্ৰতো পৰ্যাপ্ত ব্যৱস্থা নথকাৰ অভিযোগ কৰে যুৱ পৰিষদে। কেৱল টোল কৰ সংগ্ৰহৰ ক্ষেত্ৰতে ব্যৱস্থাটো সক্ৰিয় হৈ থকা যেন পৰিলক্ষিত হয় বুলিও সংগঠনটোৱে মন্তব্য কৰে।
জনসাধাৰণৰ পৰা নিয়মীয়াকৈ টোল কৰ সংগ্ৰহ কৰাৰ বিপৰীতে টোলৰ ধন সংগ্ৰহ কৰা পথসমূহৰ যথাসময়ত মেৰামতি আৰু ৰক্ষণাবেক্ষণ কিয় কৰা নহয় বুলিও প্ৰশ্ন 
উত্থাপন কৰে সংগঠনটোৱে। টোলগেটত অনিয়ম অথবা অবৈধভাৱে টোল সংগ্ৰহ কৰা হৈছে বুলি কোনো পথ ব্যৱহাৰকাৰীয়ে অভিযোগ দাখিল কৰিব বিচাৰিলে সহজে যোগাযোগ কৰিব পৰাকৈ সংশ্লিষ্ট টোলগেটসমূহৰ বিনামূলীয়া অভিযোগ নম্বৰ ৰাজহুৱাভাৱে প্ৰচাৰ কৰা হোৱা নাই বুলিও অভিযোগ কৰে।
টোলগেট স্থাপনৰ ক্ষেত্ৰত নগৰাঞ্চলৰ নিকটৱৰ্তী এলেকা সম্পৰ্কীয় বিধিগত সীমাবদ্ধতাসমূহ কঠোৰভাৱে পালন কৰা উচিত বুলি উল্লেখ কৰি যুৱ পৰিষদে ৰহাৰ টোলগেটৰ অৱস্থানক লৈও প্ৰশ্ন উত্থাপন কৰে।
ইয়াৰ সমান্তৰালভাৱে কেন্দ্ৰীয় পথ পৰিবহণ আৰু ঘাইপথ মন্ত্ৰী নীতিন গাডকাৰীৰ পূৰ্বৰ বক্তব্যৰ প্ৰসংগও উত্থাপন কৰে অসম জাতীয়তাবাদী যুৱ পৰিষদে। মন্ত্ৰীগৰাকীয়ে সংসদত ৬০ কিলোমিটাৰ দূৰত্বৰ ভিতৰত এটাতকৈ অধিক 
টোল প্লাজা নথকাৰ কথা উল্লেখ কৰি অতিৰিক্ত টোল প্লাজা বন্ধ কৰাৰ আশ্বাস দিছিল বুলি সংগঠনটোৱে দাবী কৰে। সেয়েহে ৬০ কিলোমিটাৰ দূৰত্বৰ ভিতৰত একাধিক টোলগেট থকা ক্ষেত্ৰত সংশ্লিষ্ট কৰ্তৃপক্ষই বিধি অনুসৰি ব্যৱস্থা গ্ৰহণ কৰিব লাগে বুলি দাবী জনায়।সংগঠনটোৰ অভিযোগ, ৰাষ্ট্ৰীয় ঘাইপথৰ দুৰৱস্থা, মেৰামতিৰ অভাৱ আৰু পথ সুৰক্ষাৰ প্ৰতি চৰকাৰ তথা সংশ্লিষ্ট কৰ্তৃপক্ষৰ উদাসীনতাৰ ফলত সাধাৰণ ৰাইজে প্ৰতিদিনে জীৱনক বিপদৰ মুখলৈ ঠেলি পথত চলাচল কৰিবলগীয়া হৈছে। শেহতীয়াকৈ শোচনীয় পথৰ বাবে সংঘটিত দুৰ্ঘটনাত ৮ গৰাকীকৈ নিৰীহ লোকৰ মৃত্যু হোৱা ঘটনাৰ উল্লেখ কৰি সংগঠনটোৱে কয় যে, এনে ঘটনাই পথ সুৰক্ষাৰ ভয়ংকৰ ছবিখন স্পষ্ট কৰি তুলিছে।“মানুহৰ জীৱন ৰক্ষাতকৈ যদি ৰাজহ সংগ্ৰহ চৰকাৰৰ অগ্ৰাধিকাৰ হয়, তেন্তে সেই চৰকাৰৰ জনসাধাৰণৰ প্ৰতি দায়বদ্ধতাক লৈ প্ৰশ্ন উঠিবই”—বুলি মন্তব্য কৰে যুৱ পৰিষদৰ নেতাদ্বয়ে।
সেয়েহে ৰাষ্ট্ৰীয় ঘাইপথৰ নিৰ্মাণ আৰু উন্নয়ন সম্পূৰ্ণ নোহোৱালৈকে, জৰাজীৰ্ণ পথসমূহ বিজ্ঞানসন্মতভাৱে মেৰামতি নকৰালৈকে আৰু পথ ব্যৱহাৰকাৰীৰ বাবে প্ৰয়োজনীয় মৌলিক তথা জৰুৰীকালীন সুবিধাসমূহ নিশ্চিত নকৰালৈকে সংশ্লিষ্ট টোলগেটসমূহত টোল কৰ সংগ্ৰহ বন্ধ ৰখাৰ বাবে চৰকাৰৰ ওচৰত দাবী জনাইছে অসম জাতীয়তাবাদী যুৱ পৰিষদে।লগতে ৰাজ্যৰ প্ৰতিটো টোলগেটৰ বৈধতা, দূৰত্বৰ ব্যৱধান, অৱস্থান, পথ নিৰ্মাণৰ অগ্ৰগতি আৰু টোল সংগ্ৰহৰ বিধিগত ভিত্তি ৰাজহুৱা কৰাৰ লগতে জনসাধাৰণৰ অভিযোগৰ বাবে বিনামূলীয়া আৰু সহজলভ্য অভিযোগ ব্যৱস্থা নিশ্চিত কৰিবলৈও চৰকাৰ আৰু সংশ্লিষ্ট কৰ্তৃপক্ষক দাবী জনায় সংগঠনটোৱে।