ডিব্ৰুগড়ত আৰম্ভ উন্নত হেমেট’লজী আৰু ব’ন মেৰ’ ট্ৰান্সপ্লান্ট সেৱা
চাইন অন ডেস্ক,২৯মে’:
উত্তৰ-পূৰ্ব ভাৰতৰ স্বাস্থ্য খণ্ডত এক গুৰুত্বপূৰ্ণ পদক্ষেপ হিচাপে হায়দৰাবাদৰ যশোদা হস্পিটেলৰ প্ৰধান হেমেট’লজিষ্ট, হেমেট’-অনক’লজিষ্ট আৰু ব’ন মেৰ’ ট্ৰান্সপ্লান্ট বিশেষজ্ঞ ড° গণেশ জয়শেটৱাৰে আজি এক সংবাদমেল সম্বোধন কৰি অসমত নিজৰ বিশেষজ্ঞ সেৱা আৰম্ভ কৰাৰ ঘোষণা কৰিলে।
ড° গণেশ জয়শেটৱাৰে উত্তৰ-পূৰ্বাঞ্চলত লিউকেমিয়া, লিম্ফ’মা, মায়েল’মা, ইমিউন’ডেফিচিয়েঞ্চী আৰু ব’ন মেৰ’ ট্ৰান্সপ্লান্ট সম্পৰ্কীয় ৰোগৰ বৃদ্ধিৰ বিষয়ে চিন্তা প্ৰকাশ কৰিলে। ২৫ বছৰতকৈ অধিক অভিজ্ঞতাসম্পন্ন ড° জয়শেটৱাৰে কয় যে শীঘ্ৰ নিদান আৰু উন্নত চিকিত্সাৰ প্ৰয়োজন আছে।
তেওঁ পুনৰাই কয়, “উত্তৰ-পূৰ্বাঞ্চলৰ বহুতো ৰোগীয়ে এতিয়াও উন্নত চিকিৎসাৰ বাবে দূৰৰ মহানগৰলৈ যাব লাগে। মোৰ লক্ষ্য হৈছে বিশ্বমানৰ চিকিৎসা ৰোগীৰ ঘৰৰ কাষতে উপলব্ধ কৰোৱা।
ড° গণেশ জয়শেটৱাৰে এতিয়ালৈকে ৫০০ৰো অধিক ব’ন মেৰ’ ট্ৰান্সপ্লান্ট (BMT) সফলতাৰে সম্পন্ন কৰিছে। যশোদা হস্পিটেলত তেওঁৰ নেতৃত্বত কেইবাটাও ঐতিহাসিক সাফল্য লাভ কৰা হৈছে। ইয়াৰ ভিতৰত ২০১৫ চনত তেলেগু ৰাজ্যসমূহত প্ৰথম হেপ্ল’আইডেণ্টিকেল ব’ন মেৰ’ ট্ৰান্সপ্লান্ট আৰু ২০১৬ চনত ভাৰতত প্ৰাপ্তবয়স্কৰ বাবে প্ৰথম এক্স-ভিভ’ টি-চেল ডিপ্লিটেড হেপ্ল’ BMT অন্যতম।
ড° গণেশ জয়শেটৱাৰে ২০০১ চনত নাগপুৰ বিশ্ববিদ্যালয়ৰ পৰা MBBS, মুম্বাই বিশ্ববিদ্যালয়ৰ পৰা MD Pathology আৰু কলকাতাৰ WBUHSৰ পৰা DM Clinical Hematology সম্পূৰ্ণ কৰিছে।
এতিয়াৰ পৰা অসম আৰু উত্তৰ-পূৰ্বাঞ্চলৰ ৰোগীসকলে ডিব্ৰুগড়ৰ মৃত্যুঞ্জয় হেল্থকেয়াৰ,স্বৰ্ণ কম্প্লেক্সত তেওঁৰ পৰা পৰামৰ্শ ল’ব পাৰিব।
এই উদ্যোগে অসম আৰু সমগ্ৰ উত্তৰ-পূৰ্বাঞ্চলৰ ৰোগীৰ বাবে অতি উপকাৰী হ’ব বুলি আশা কৰা হৈছে। ইয়াৰ ফলত ৰোগীসকলে উন্নত হেমেট’লজী চিকিত্সাৰ বাবে বাহিৰলৈ যোৱাৰ প্ৰয়োজন নোহোৱাকৈ স্থানীয়ভাৱে চিকিৎসা লাভ কৰিব পাৰিব।