Eco-Sensitive Zone ১ কিলোমিটাৰলৈ হ্ৰাস কৰাৰ চৰকাৰী সিদ্ধান্ত !
কংগ্ৰেছৰ ৰাজ্যজুৰি প্ৰতিবাদ
চাইন অন ডেস্ক,৩০আগষ্ট:
কাজিৰঙা ৰাষ্ট্ৰীয় উদ্যানৰ পৰিবেশ-সংবেদনশীল অঞ্চল (Eco-Sensitive Zone) ১০ কিলোমিটাৰৰ পৰা ১ কিলোমিটাৰলৈ হ্ৰাস কৰাৰ চৰকাৰী সিদ্ধান্তৰ বিৰুদ্ধে ৰাজ্যজুৰি প্ৰতিবাদ সাব্যস্ত কৰাৰ সমান্তৰালভাৱে ডিব্ৰুগড়তো কংগ্ৰেছে ৰূপায়ণ কৰে প্ৰতিবাদী কাৰ্যসূচী।অসম প্ৰদেশ কংগ্ৰেছ কমিটিৰ সভাপতি গৌৰৱ গগৈৰ নিৰ্দেশত ডিব্ৰুগড় জিলা কংগ্ৰেছৰ উদ্যোগত অনুষ্ঠিত হয় প্ৰতিবাদী পদযাত্ৰা আৰু সংবাদমেল। হাতে হাতে বেনাৰ-পোষ্টাৰ লৈ প্ৰতিবাদকাৰীসকলে কাজিৰঙাৰ 
পৰিবেশ সুৰক্ষাৰ স্বাৰ্থত চৰকাৰৰ সিদ্ধান্ত পুনৰ বিবেচনা কৰাৰ দাবী জনায়।কংগ্ৰেছ নেতাসকলে অভিযোগ কৰে যে কাজিৰঙা কেৱল অসমৰেই নহয়, সমগ্ৰ বিশ্বৰ বাবে এক গুৰুত্বপূৰ্ণ প্ৰাকৃতিক ঐতিহ্য। এশিঙীয়া গঁড়ৰ লগতে বাঘ, হাতী আৰু বিভিন্ন প্ৰজাতিৰ বন্যপ্ৰাণীৰ অন্যতম নিৰাপদ আবাসস্থলী কাজিৰঙাক উদ্যোগিক প্ৰদূষণ, অবৈধ নিৰ্মাণ আৰু ক্ৰমবৰ্ধমান মানৱীয় হেঁচাৰ পৰা সুৰক্ষিত কৰি ৰখাৰ বাবে পৰ্যাপ্ত পৰিবেশ-সংবেদনশীল অঞ্চল অতি জৰুৰী।
১০ কিলোমিটাৰৰ পৰিবেশ-সংবেদনশীল অঞ্চলৰ সুৰক্ষা হ্ৰাস কৰিলে কাজিৰঙাৰ পাৰিপাৰ্শ্বিক ভাৰসাম্য আৰু বন্যপ্ৰাণীৰ সুৰক্ষাৰ ক্ষেত্ৰত নেতিবাচক প্ৰভাৱ পৰাৰ আশংকা প্ৰকাশ কৰে প্ৰতিবাদকাৰীসকলে।
সংবাদমেলত কংগ্ৰেছ নেতাসকলে চৰকাৰক সিদ্ধান্তটো শীঘ্ৰে পুনৰ বিবেচনা কৰি কাজিৰঙাৰ পৰিবেশ-সংবেদনশীল অঞ্চলৰ পূৰ্বৰ সুৰক্ষা ব্যৱস্থা বাহাল ৰাখিবলৈ দাবী জনায়। লগতে, কাজিৰঙাৰ পৰিবেশ আৰু বন্যপ্ৰাণীৰ
সুৰক্ষাৰ দৰে গুৰুত্বপূৰ্ণ বিষয়ক লৈ বিভ্ৰান্তিকৰ বা ভুৱা প্ৰচাৰ বন্ধ কৰাৰ বাবেও চৰকাৰৰ প্ৰতি আহ্বান জনায়।
প্ৰতিবাদী কাৰ্যসূচীত ডিব্ৰুগড় জিলা কংগ্ৰেছৰ নেতা-কৰ্মীৰ লগতে স্থানীয় সচেতন নাগৰিক আৰু বিভিন্ন সামাজিক সংগঠনৰ প্ৰতিনিধিয়েও অংশগ্ৰহণ কৰে।কাজিৰঙাৰ পৰিবেশ, বন্যপ্ৰাণী আৰু ভৱিষ্যৎ প্ৰজন্মৰ স্বাৰ্থত চৰকাৰৰ সিদ্ধান্তৰ বিৰুদ্ধে প্ৰয়োজন সাপেক্ষে ধাৰাবাহিক আন্দোলন গঢ়ি তোলাৰ হুংকাৰ দিয়ে কংগ্ৰেছ নেতৃত্বই।