নিৰুদ্দিষ্ট মাতৃ-পুত্ৰৰ মৃতদেহ উদ্ধাৰ
ক’ত ? কেনেকৈ ?
বৰপেটা,২৮আগষ্ট:
বৰপেটা জিলাৰ চেঙা সমষ্টিৰ কাছুমাৰা আৰক্ষী থানাৰ অন্তৰ্গত কাশিমপুৰত যোৱাকালি ব্ৰহ্মপুত্ৰৰ সুঁতি নৈত নিৰুদ্দেশ হোৱা মাতৃ-পুত্ৰক মৃত অৱস্থাত কালি কাছুমাৰা আৰক্ষী থানাৰ এলেকাধীন মৈৰাদিয়া আৰু আলোপতি চৰ আৰক্ষী থানাৰ অন্তৰ্গত নিচানৰচৰত সূতি নৈ খনৰ পৰা উদ্ধাৰ হোৱাত সমগ্ৰ অঞ্চলতে তীব্ৰ চাঞ্চল্যৰ সৃষ্টি কৰিছে। জানিব পৰা মতে কাছুমাৰা আৰক্ষী থানাৰ অন্তৰ্গত কাশিমপুৰ গাঁৱৰ আইজ উদ্দিনৰ 
পত্নী কংকনা দত্ত আৰু চাৰিবছৰীয়া পুত্ৰ আকিবুল ইছলামে নৈত ভেড়াক গা ধুৱাৱলৈ গৈ পানীত পৰি নিৰুদ্দেশ হৈছিল। ঘটনাস্থলীত বৰপেটা জিলাৰ উপ আৰক্ষী অধীক্ষক এপিএছ ৰূপক কুমাৰ বৰা আৰু কাছুমাৰা আৰক্ষী থানাৰ ভাৰপ্ৰাপ্ত আৰক্ষী বিষয়া দ্বীপজ্যোতি চৌধুৰীৰ নেতৃত্বত আৰক্ষীৰ এটি সজাতি দলে এছডিআৰএফৰ উদ্ধাৰকাৰী দল আৰু স্থানীয় ৰাইজে উদ্ধাৰ অভিযান চলায় যদিও সন্ধিয়া সময়লৈকে নিৰুদ্দিষ্ট লোকৰ কোনো সন্ধান পোৱা নাছিল। আজি পুৱাৰ ভাগত ব্ৰহ্মপুত্ৰ সুঁতি
নদীৰ পানীত মৈৰাদিয়া পাৰঘাটত এটি শিশু আৰু আলোপতি চৰ আৰক্ষী থানাৰ অন্তৰ্গত নিচানৰচৰত এগৰাকী মহিলাৰ মৃতদেহ পানীত উপঙি থকা দেখি পৰিয়ালক অৱগত কৰাত পৰিয়ালৰ লোকে আৰক্ষী প্ৰশাসনক লগতলৈ কালি নিৰুদ্দেশ হোৱা দুয়োটা মৃতদেহ নিশ্চিত হৈ উদ্ধাৰ কৰে। উদ্ধাৰ কৰা মৃতদেহ দুটা কাছুমাৰা আৰক্ষীয়ে বৰপেটা জিলা অসামৰিক চিকিৎসা মহাবিদ্যালয়লৈ মৰণোত্তৰ পৰীক্ষাৰ বাবে প্ৰেৰণ কৰে। একে পৰিয়ালৰ দুটা মৃতদেহ উদ্ধাৰ হোৱাত সমগ্ৰ অঞ্চলজুৰি শোকাকুল পৰিবেশৰ সৃষ্টি হৈছে।