লাওখোৱা অভয়াৰণ্যত উচ্ছেদ অভিযান
শ-শ বিঘা মৰাপাট খেতিত উচ্ছেদ
ৰূপহীহাট,৩জুলাই:
লাওখোৱা অভয়াৰণ্যৰ মাটি অবৈধভাবে বেদখল কৰি খেতি কৰা সকলৰ বাজি উঠিল বিপদঘন্টা।লাওঁখোৱা অভয়াৰণ্যৰ খৰনলি বিলৰ পাৰত আজি পুৱাৰে পৰা আৰম্ভ হৈছে বৃহৎ উচ্ছেদ অভিযান। উক্ত উচ্ছেদ অভিযানক লৈ অঞ্চলটোত তীব্ৰ চাঞ্চল্যৰ সৃষ্টি কৰিছে।
লাওখোৱা অভয়াৰণ্যৰ খৰনলি বিলৰ পাৰত অবৈধ বেদখলকাৰীয়ে শ-শ বিঘা মাটি বেদখল কৰি মৰাপাট খেতি কৰিছিল।মৰাপাট খেতি লহপহকৈ বাঢ়ি অহাৰ সময়তে আজি চলায় উচ্ছেদ অভিযান।অভয়াৰণ্যৰ মাটিত অবৈধ বেদখলকাৰীয়ে মৰাপাটৰ খেতি কৰা সকলক কোনো উচ্ছেদৰ জাননী দিয়া হোৱা নাই। যাৰ বাবে আজি খেতিয়ক সকলৰ মাজত এক হাহাকাৰ পৰিস্থিতিৰ সৃষ্টি হয়।লাওখোৱা অভয়াৰণ্যৰ সুৰক্ষাৰ স্বাৰ্থত বন বিভাগে শ শ বিঘা মাটিত অবৈধভাৱে কৰা মৰাপাট খেতি ট্ৰেক্টৰে ধ্বংস কৰিছে।সামৰিক বাহিনীৰ কটকটীয়া নিৰাপত্তা বেষ্টনীৰ মাজত এই অভিযান চলায়। উক্ত উচ্ছেদ 
অভিযানত সংবাদ মাধ্যমৰ লোকৰ প্ৰৱেশতো নিষেধাজ্ঞা আৰোপ কৰা হৈছে। বন বিভাগৰ একাংশ বিষয়া-কৰ্মীৰ উৎকোচ লৈ দীৰ্ঘদিন ধৰি এই চৰকাৰী মাটিত খেতি কৰিবলৈ দিয়া হৈছিল বুলি অভিযোগ উঠেছে বন বিভাগৰ বিৰুদ্ধে।স্থানীয় ৰাইজৰ মতে, বিগত ১৫-২০ বছৰ ধৰি তেওঁলোকে তাত খেতি কৰি আহিছে। ইমান দিনে বন বিভাগে কোনো বাধা নিদিয়াৰ বাবেই তেওঁলোকে নিশ্চিন্ত হৈ শ শ বিঘা ভূমিত খেতি কৰিছিল। এতিয়া হঠাতে কোনো জাননী বা বিকল্প ব্যৱস্থা নকৰাকৈ খেতিসমূহ ধ্বংস কৰাত তেওঁলোক চৰম আৰ্থিক সংকটৰ সন্মুখীন হব বুলি ক্ষোভ উজাৰিছে। উল্লেখ্য য়ে ১৯৭২ চনৰ বন্যপ্রাণী আইন মতে অভয়াৰণ্যত মানুহ আৰু পোহনীয়া জীৱ জন্তৰ প্ৰৱেশ কঠোৰভাবে নিষেধ। অভয়াৰণ্য খনত বনকৰ্মী সকল গিজগিজাই থকা স্বত্বেও কেনেকৈ অবৈধ বেদখলকাৰীয়ে অভয়াৰণ্যৰ মাটি বেদখল কৰি খেতি কৰিব পাৰিলে ই এক ৰহস্যৰ বিষয় হৈ পৰিছে।