গহপুৰত ড্ৰাগছ কণ্টেইনাৰ জব্দ
এজন যুৱকক গ্ৰেপ্তাৰ
গহপুৰ,২৪জুন:
গহপুৰ আৰক্ষী থানাৰ ভাৰপ্ৰাপ্ত আৰক্ষী বিষয়া পৱন গায়নৰ নেতৃত্বত চলাই থকা ড্ৰাগছ বিৰোধী কঠোৰ অভিযানৰ মাজতে মঙলবাৰে সন্ধিয়া প্ৰায় ৭-৩০ বজাত ড্ৰাগছৰ কণ্টেইনাৰসহ হাতে লোটে গ্ৰেপ্তাৰ হয় এজন যুৱক। ধৃত যুৱকজন 
হৈছে গহপুৰ আৰক্ষী থানাৰ অন্তৰ্গত চত্ৰংপাৰ নিবাসী ভৱেন বৰাৰ পুত্ৰ সিদ্ধাৰ্থ বৰা(২৫)। গহপুৰ আৰক্ষী থানাৰ ভাৰপ্ৰাপ্ত আৰক্ষী বিষয়া পৱন গায়নৰ নেতৃত্বত যোৱা এটা অভিযানকাৰী দলে কলেজগুৰীৰ ৰে’ল আলীৰ ওচৰৰ পৰা গ্ৰেপ্তাৰ কৰে যুৱকজনক। তেওঁৰ জিম্মাৰ পৰা আৰক্ষীয়ে চাৰিটা ড্ৰাগছ ভৰ্তি কণ্টেইনাৰ জব্দ কৰিবলৈ সক্ষম হৈছে। গহপুৰ আৰক্ষীৰ এই সফল অভিযানক
স্থানীয় ৰাইজে শলাগ লৈছে। উল্লেখযোগ্য যে -গহপুৰ আৰক্ষী থানাৰ এলেকাৰ গহপুৰ নগৰকে ধৰি বিভিন্ন প্ৰান্তত ড্ৰাগছ আসক্ত যুৱকৰ সংখ্যা ক্ৰমাগতভাৱে বৃদ্ধি পোৱা বুলি স্থানীয় ৰাইজে বহুদিনৰে পৰা অভিযোগ উত্থাপন কৰি আহিছে।ৰিহেব চেণ্টাৰৰ পৰা ওলাই অহা একাংশ ড্ৰাগছ আসক্ত যুৱক চৌৰ্য্য বৃত্তিত জড়িত হোৱাৰ অভিযোগো এতিয়া ৰাইজৰ মুখে মুখে। গহপুৰ আৰক্ষী থানাৰ ভাৰপ্ৰাপ্ত আৰক্ষী বিষয়া পৱন গায়নে ধৃত সিদ্ধাৰ্থ বৰাৰ পৰা ড্ৰাগছৰ সংক্ৰান্তত অধিক তথ্য উদ্ঘাটন কৰি গহপুৰত চলি থকা ড্ৰাগছৰ ৰেকেট কিছু পৰিমাণে হ’লেও মষিমূৰ কৰিব পাৰিব বুলি গহপুৰবাসী ৰাইজে মন্তব্য কৰিছে। ধৃত সিদ্ধাৰ্থ বৰাৰ বিৰুদ্ধে যাবতীয় আইনী ব্যৱস্থা গ্ৰহণ কৰিছে গহপুৰ আৰক্ষীয়ে।