লক্ষ্ণৌৰ কোচিং চেণ্টাৰত ভয়াৱহ অগ্নিকাণ্ড:
১৪ গৰাকী শিক্ষাৰ্থীৰ কৰুণ মৃত্যু
লক্ষ্ণৌ, ২২ জুন:
উত্তৰ প্ৰদেশৰ ৰাজধানী চহৰ লক্ষ্ণৌৰ আলিগঞ্জ অঞ্চলত আজি সংঘটিত হ’ল এক হৃদয়বিদাৰক অগ্নিকাণ্ড। এখন ব্যৱসায়িক ভৱনত থকা এটা কোচিং চেণ্টাৰত লগা এই ভয়াৱহ অগ্নিকাণ্ডত কমেও ১৪ গৰাকী শিক্ষাৰ্থীয়ে প্ৰাণ হেৰুৱাইছে। এই ঘটনাত আন চাৰিজন গুৰুতৰভাৱে আহত হৈছে।
প্ৰাপ্ত তথ্য অনুসৰি, তিনি মহলীয়া ভৱনটোৰ প্ৰথম মহলাত এই কোচিং চেণ্টাৰটো অৱস্থিত আছিল। অগ্নিকাণ্ডৰ খবৰ পোৱাৰ লগে লগে সমগ্ৰ অঞ্চলটোত হাহাকাৰ সৃষ্টি হয়। জুইৰ পৰা ৰক্ষা পাবলৈ বহু শিক্ষাৰ্থীয়ে প্ৰাণৰ মমতাত পকী ভৱনটোৰ খিৰিকীৰে জপিয়াই দিয়াৰ 
দৃশ্যই সকলোকে শিয়ৰাই তুলিছে। ইয়াৰে এটা ভিডিঅ’ত এগৰাকী ব্যক্তিক পকী ভৱনটোৰ পৰা তললৈ সৰি পৰা দেখা গৈছে, যিজন এতিয়া চিকিৎসাধীন হৈ আছে।
ঘটনাৰ পিছতে উত্তৰ প্ৰদেশৰ উপ-মুখ্যমন্ত্ৰী ব্ৰজেশ পাঠক ঘটনাস্থলীত উপস্থিত হৈ 
উদ্ধাৰ অভিযান তদাৰক কৰে। তেওঁ সংবাদ মাধ্যমৰ আগত কয় যে, “দুৰ্ভাগ্যজনক এই ঘটনাত ১৪ টি শিশুৱে প্ৰাণ হেৰুৱাইছে। আহতসকলক কিং জৰ্জ মেডিকেল কলেজৰ (KGMC) ট্ৰমা চেণ্টাৰত ভৰ্তি কৰোৱা হৈছে। এই দুৰ্ঘটনাৰ কাৰণ জানিবলৈ এক উচ্চস্তৰীয় তদন্তৰ নিৰ্দেশ দিয়া হৈছে। দোষীৰ বিৰুদ্ধে কঠোৰ ব্যৱস্থা গ্ৰহণ কৰা হ’ব।”
ইপিনে, প্ৰধানমন্ত্ৰী নৰেন্দ্ৰ মোদীয়ে এই ঘটনাত গভীৰ শোক প্ৰকাশ কৰিছে। প্ৰধানমন্ত্ৰীৰ কাৰ্যালয়ৰ পৰা এক বিবৃতিত কোৱা হৈছে যে, মৃতকৰ পৰিয়াললৈ প্ৰধানমন্ত্ৰীৰ ৰাষ্ট্ৰীয় সাহায্য পুঁজিৰ পৰা ২ লাখ টকাকৈ এক্স-গ্ৰেচিয়া (ex-gratia) আৰু আহতসকললৈ ৫০ হাজাৰ টকাকৈ প্ৰদান কৰা হ’ব।
ৰাজ্যিক দুৰ্যোগ ব্যৱস্থাপনা বাহিনী আৰু অগ্নিনিৰ্বাপক বাহিনীৰ বহু ঘণ্টা জোৰা প্ৰচেষ্টাৰ অন্তত জুই নিৰ্বাপন কৰিবলৈ সক্ষম হয়। বৰ্তমান উদ্ধাৰ অভিযান সমাপ্ত হৈছে আৰু ভৱনটোৰ ভিতৰত কোনো শিক্ষাৰ্থী আৱদ্ধ হৈ থকা নাই বুলি প্ৰশাসনে নিশ্চিত কৰিছে।