ডিব্ৰুগড়ত গৰু চুৰি চক্ৰৰ বিৰুদ্ধে আৰক্ষীৰ অভিযান
গ্ৰেপ্তাৰ ৰহমান আলি,জব্দ দুখন বিলাসী বাহন
চাইন অন ডেস্ক,১১জুনঃ
ডিব্ৰুগড়ত সক্ৰিয় গৰু চুৰি চক্ৰৰ বিৰুদ্ধে আৰক্ষীয়ে চলাই থকা ধাৰাবাহিক অভিযানত পুনৰ সফলতা লাভ কৰিছে গাভৰুপথাৰ আৰক্ষীয়ে। এই অভিযানত গৰু চুৰি কাণ্ডৰ সৈতে জড়িত থকাৰ অভিযোগত চাউলখোৱাৰ বাসিন্দা ৰহমান আলি নামৰ এজন 
অভিযুক্তক গ্ৰেপ্তাৰ কৰিবলৈ সক্ষম হয়।
গাভৰুপথাৰ আৰক্ষী চকীৰ ভাৰপ্ৰাপ্ত আৰক্ষী বিষয়া অলংকাৰ বৰাৰ নেতৃত্বত চলোৱা এক বিশেষ অভিযানত গোপন সূত্ৰৰ ভিত্তিত ৰহমান আলিক গ্ৰেপ্তাৰ কৰাৰ লগতে গৰু চুৰি কাণ্ডত ব্যৱহৃত বুলি সন্দেহ কৰা দুখন বিলাসী বাহনো জব্দ কৰিবলৈ সক্ষম হয় আৰক্ষীয়ে। জব্দ কৰা বাহন দুখন হৈছে AS-01GM-9430 নম্বৰৰ ক’লা ৰঙৰ Hyundai Venue
আৰু AS-06AJ-1854 নম্বৰৰ ক’লা ৰঙৰ Hyundai Creta। আৰক্ষীৰ প্ৰাথমিক তদন্তত পোহৰলৈ আহিছে যে Creta বাহনখনত সংলগ্ন নম্বৰ প্লেটখন ভুৱা। লগতে বাহনখনৰ ভিতৰৰ পৰা বিভিন্ন ধৰণৰ চোকা অস্ত্ৰও উদ্ধাৰ কৰা হৈছে। উল্লেখযোগ্য যে, জব্দ কৰা AS-01GM-9430 নম্বৰৰ Venue বাহনখন চলিত বৰ্ষৰ ৩ এপ্ৰিলত গুৱাহাটীৰ হাটিগাঁও অঞ্চলৰ বাসিন্দা আছিৰোদ্দিন আলি নামৰ এজন যুৱকৰ পৰা চুৰি হোৱা বুলি অভিযোগ উত্থাপিত হৈছিল। এই সন্দৰ্ভত হাটিগাঁও আৰক্ষী থানাত PS Case No. 65/26 নম্বৰত গোচৰ ৰুজু কৰা হৈছিল। গোচৰটোৰ তদন্তৰ সময়তে বাহনখন ডিব্ৰুগড়ত থকাৰ সম্ভাৱনাৰ তথ্য লাভ কৰি গাভৰুপথাৰ আৰক্ষীয়ে বিশেষ তদন্ত অব্যাহত ৰাখিছিল। গোপন সূত্ৰৰ পম খেদি চলোৱা অভিযানত অৱশেষত আৰক্ষীয়ে সন্ধানহীন বাহনখন উদ্ধাৰ কৰাৰ লগতে গৰু চুৰি চক্ৰৰ সৈতে জড়িত এজন অভিযুক্তক গ্ৰেপ্তাৰ কৰিবলৈ সক্ষম হয়। এই ঘটনাই গৰু চুৰি চক্ৰটোৰ সংগঠিত, সুপৰিকল্পিত আৰু আন্তঃজিলাভিত্তিক নেটৱৰ্কৰ সন্দেহ অধিক গাঢ় কৰি তুলিছে। উল্লেখ্য যে, মাত্ৰ দুদিন পূৰ্বেও গাভৰুপথাৰ আৰক্ষীয়ে এক পৃথক অভিযানত গৰু চুৰি কাণ্ডৰ সৈতে জড়িত দুখন বিলাসী বাহন জব্দ কৰাৰ লগতে হৃদয় গগৈ আৰু চিৰাজুল আলি নামৰ দুজন অভিযুক্তক গ্ৰেপ্তাৰ কৰিছিল। সম্প্ৰতি এই চুৰি চক্ৰটোৰ সৈতে আন কোনো ব্যক্তি জড়িত আছে নেকি, বাহন চুৰি আৰু গৰু চুৰিৰ
জত কোনো সংগঠিত সংযোগ আছে নেকি, সেই সন্দৰ্ভত আৰক্ষীয়ে অধিক তদন্ত অব্যাহত ৰাখিছে। আৰক্ষীৰ এই ধাৰাবাহিক সফলতাই ডিব্ৰুগড়ত সক্ৰিয় গৰু চুৰি চক্ৰসমূহৰ বিৰুদ্ধে অধিক কঠোৰ আৰু ব্যাপক অভিযান চলোৱাৰ স্পষ্ট ইংগিত বহন কৰিছে।