ডিব্ৰুগড় বিশ্ববিদ্যালয়ত ড° কমলা কান্ত বৰগোহাঁই স্মাৰক বক্তৃতা
বিশ্ববিদ্যালয়ৰ সতে বুজাবুজিৰ চুক্তি সম্পন্ন
চাইন অন ডেস্ক,৭মে:
নাহৰৰ দেশ তথা উত্তৰ পূৱৰ অগ্ৰণী উচ্চশিক্ষাৰ বাটকটীয়া প্রতিষ্ঠান ডিব্রুগড় বিশ্ববিদ্যালয়ত সু-লেখক, গল্পকাৰ, ডিব্ৰুগড় বিশ্ববিদ্যালয়ৰ শিক্ষাতত্ত্ব বিভাগৰ প্ৰাক্তন সহযোগী প্রাধ্যাপক তথা ডিব্ৰুগড় বিশ্ববিদ্যালয়ৰ সাংবাদিকতা আৰু গণসংযোগ অধ্যয়ন কেন্দ্ৰৰ প্ৰতিষ্ঠাপক সঞ্চালক ড° কমলা কান্ত বৰগোহাঁইৰ এক গাম্ভীৰ্যপূৰ্ণ স্মাৰক বক্তৃতা অনুষ্ঠান আজি সুকলমে বিশ্ববিদ্যালয়ৰ চৌহদত অনুষ্ঠিত হয়।ড° বৰগোহাঁইৰ পবিত্ৰ স্মৃতিত প্ৰতি বছৰে ডিব্ৰুগড় বিশ্ববিদ্যালয়ৰ সাংবাদিকতা আৰু গণসংযোগ অধ্যয়ন কেন্দ্রত ড° কমলা কান্ত বৰগোহাঁই স্মাৰক বক্তৃতানুষ্ঠান আয়োজন কৰাৰ উদ্দেশ্য আগত ৰাখি ডিব্ৰুগড় বিশ্ববিদ্যালয় আৰু ড° কমলা কান্ত বৰগোহাঁইৰ পত্নী তথা বিশিষ্ট লেখিকা ড° মামণি বৰগোহাঁইৰ মাজত এক বুজাবুজিৰ চুক্তি স্বাক্ষৰিত হয়।চুক্তি অনুসৰি ড° কমলা কান্ত বৰগোহাঁইৰ পৰিয়ালৰ তৰফৰ পৰা তেখেতৰ স্মৃতি ৰক্ষাৰ্থে শৈক্ষিক তথা সাহিত্যিক কাম-কাজসমূহ চলাই নিবৰ বাবে ৫ লাখ টকাৰ অনুদান আগবঢ়ায়। উক্ত চুক্তিৰ জৰিয়তে স্মাৰক বক্তৃতানুষ্ঠান, আলোচনা সত্ৰ, ছাত্র-ছাত্রীৰ সহায়ক আৰু 
জনহিতৈষীমূলক বিভিন্ন কাৰ্যসূচীৰ জৰিয়তে ড° কমলা কান্ত বৰগোহাঁইৰ স্মৃতি তথা কর্মজীৱন চিৰযুগমীয়া কৰি ৰখাৰ প্ৰয়াস কৰা হয়। উল্লেখযোগ্য যে পূর্বেও ড° কমলাকান্ত বৰগোহাঁইৰ পৰিয়াল আৰু ডিব্ৰুগড় বিশ্ববিদ্যালয়ৰ মাজত আন এক বুজাবুজিৰ চুক্তি সম্পন্ন হৈছিল আৰু সেই চুক্তি অনুসৰি প্ৰতিবছৰে ডিব্ৰুগড় বিশ্বিদ্যালয়ৰ দীক্ষান্ত সমাৰোহত শিক্ষাতত্ত্ব বিভাগৰ স্বৰ্ণপদক প্রাপ্ত গৰাকীক ড° কমলাকান্ত বৰগোহাঁই স্কলাৰশ্বিপ প্ৰদান কৰি অহাৰ লগতেই ডিব্ৰুগড় বিশ্ববিদ্যালয়ৰ শিক্ষাতত্ত্ব বিভাগতেই ড° কমলাকান্ত বৰগোহাঁই মেমৰিয়েল কনফাৰেন্স হলো নিৰ্মাণ কৰা হৈছে।
ডিব্ৰুগড় বিশ্ববিদ্যালয়ত সম্পন্ন হোৱা বুজাবুজিৰ চুক্তি অনুসৰি ডিব্ৰুগড় বিশ্ববিদ্যালয়ৰ সাংবাদিকতা আৰু গণসংযোগ অধ্যয়ন কেন্দ্ৰৰ উদ্যোগত আজি বিশ্ববিদ্যালয়ৰ ইন্দিৰা মিৰি প্ৰেক্ষাগৃহত “অসমত 
সংবাদমাধ্যমৰ দুটা শতক গতি-প্রকৃতি আৰু সম্ভাৱনা” শীর্ষক এক বক্তৃতানুষ্ঠানৰ আয়োজন কৰা হয়। উক্ত বক্তৃতানুষ্ঠানত বক্তৃতা প্ৰদান কৰে তেজপুৰ বিশ্ববিদ্যালয়ৰ সাংবাদিকতা আৰু গণসংযোগ বিভাগৰ প্ৰাধ্যাপক অভিজিত বৰাই।
তেওঁ যুৱ নোহ হাৰাৰীৰ এখন কিতাপৰ কথা উল্লেখ কৰি এক গুৰুত্বপূৰ্ণ কথা বক্তৃতাত উল্লেখ কৰি কয় যে – “মানুহে জীৱনটো সহজ কৰি তুলিবলৈ অহৰহ নতুন নতুন প্রযুক্তি আৰু ব্যৱস্থা উদ্ভাৱন কৰি আহিছে, কিন্তু বেছিভাগ ক্ষেত্ৰতেই সেইবোৰক অর্থপূর্ণ আৰু সচেতনভাৱে ব্যৱহাৰ কৰাৰ জ্ঞান বা সক্ষমতা মানুহে গঢ়ি তুলিব পৰা নাই।”
ডিব্ৰুগড় বিশ্ববিদ্যালয়ৰ উপাচার্য ড° জিতেন হাজৰিকাই অনুষ্ঠানটোৰ বক্তব্যত অতি সাৱলীলভাৱে উল্লেখ কৰে যে -“প্রজন্মক অনুপ্রাণিত কৰি অহা ড° কমালাকান্ত বৰগোহাঁই স্মাৰক বক্তৃতা এক জীৱন, দৃষ্টিভংগী, বৌদ্ধিক অৱদানৰ প্ৰতি এক অর্থপূর্ণ শ্রদ্ধাঞ্জলি।”
বিশ্ববিদ্যালয়ৰ পঞ্জীয়ক ড° পৰমানন্দ সোণোৱালেও সভাত গুৰুত্বপূৰ্ণ ভাষণ প্ৰদান কৰে লগতে অনুষ্ঠানৰ বিশিষ্ট অতিথি ড° মামণি বৰগোহাঁইয়েও তেওঁৰ কৃতজ্ঞতা আৰু স্মৃতি মিশ্ৰিত এক বক্তৃতাৰে সভাৰ সৌষ্ঠৱ বৃদ্ধি কৰে।
অনুষ্ঠানৰ আদৰণি ভাষণত গাম্ভীর্যপূর্ণ ভাষণ প্ৰদান কৰে ড° মামণি বৰগোহাঁই, ডিব্ৰুগড় বিশ্ববিদ্যালয়ৰ পঞ্জীয়ক ড° পৰমানন্দ সোণোৱাল আৰু ডিব্ৰুগড় বিশ্ববিদ্যালয়ৰ সাংবাদিকতা আৰু গণসংযোগ অধ্যয়ন কেন্দ্ৰৰ প্ৰাক্তন সঞ্চালক ড° প্রবীণ কুমাৰ গগৈয়ে। উক্ত অনুষ্ঠানতেই বুজাবুজিৰ চুক্তি স্বাক্ষৰিত কৰি ড° কমলা কান্ত বৰগোহাঁইৰ স্মৃতি চিৰ যুগমীয়া কৰি ৰখাৰ বাবে প্ৰতিবছৰে এনে অনুষ্ঠানৰ আয়োজন কৰাৰ বাবে যাৱতীয় ব্যৱস্থা গ্ৰহণ কৰা হয়।