ডিব্ৰুগড়ত আৰক্ষীৰ শূন্যলৈ গুলীচালনা!
সন্দেহযুক্ত গৰু চোৰক কেন্দ্র কৰিয়েই মাইজানত উতপ্ত পৰিস্থিতি
তিনি যুৱকসহ গাড়ী জব্দ,উত্তেজিত জনতাক নিয়ন্ত্ৰণৰ বাবেই শূন্যলৈ গুলী
*চাইন অন ডেস্ক:*
ডিব্ৰুগড়ত আৰক্ষীৰ শূন্যলৈ গুলীচালনা ঘটনাই ব্যাপক চাঞ্চল্যৰ স্বৃষ্টি কৰিছে।বছৰটোৰ দ্বিতীয়টো দিনতেই
ডিব্ৰুগড়ৰ মাইজান নতুন গাওঁত জনতাক ছত্ৰভঙ্গ দিয়াবলৈ আৰক্ষীয়ে শূন্যলৈ গুলীচালনা কৰিব লগা এক ভয়ংকৰ পৰিস্থিতিৰ স্বৃষ্টি হয়।এক সন্দেহযুক্ত
গৰু চোৰক কেন্দ্র কৰিয়েই মাইজানত উতপ্ত পৰিস্থিতিৰ উদ্ভৱ হয়।স্থানীয় ৰাইজৰ অভিযোগ অনুসৰি ৰাইজে আটক কৰা গৰু চোৰক আৰক্ষীয়ে যাবলৈ দিয়াৰ পিছতে উদ্ভৱ হয় এনে অপ্ৰীতিকৰ পৰিস্থিতি আৰু বিক্ষিপ্ত ঘটনা।অভিযোগ মতে
বিগত বহু সময় ধৰি মাইজানৰ বহু ঘৰৰ পৰা চুৰি হৈ আহিছিল গৰু-চাগলি।সেয়ে সেই অঞ্চলৰ একাংশ যুৱকে পহৰা দিয়াৰ ব্যৱস্থা কৰিছিল। আজিও পহৰা দি থাকোঁতেই পুৱতি নিশা প্ৰায় ৩ বজাত মাইজানৰ নতুন গাঁৱত এখন নাম্বাৰ প্লেট বিহীন চাৰিচকীয়া বাহন লৈ তিনি জনীয়া যুৱকৰ দল এটাৰ ৰহস্যজনক ভাৱে প্ৰৱেশ ঘটে আৰু সকলোকে আচম্বিত কৰি গৰুৰ জাক এটাৰ কাষলৈ যোৱাত গাওঁখনত গৰু চোৰ কৰিবলৈ অহাৰ সন্দেহত যুৱক কেইজনক সোধা পোচা কৰি স্থানীয় ৰাইজে আটক কৰি ৰাখে।কিন্তু যুৱকৰ দলটোৱে স্থানীয় ৰাইজৰ প্ৰশ্নৰ সদুত্তৰ দিব নোৱাৰি গোপনে আৰক্ষীলৈ ফোন কৰে।লগে লগে তহলদাৰী আৰক্ষীৰ দল উপস্থিত হৈ স্থানীয় ৰাইজক আসস্থ কৰাৰ বিপৰীতে নম্বৰ প্লেট বিহীন বাহন সহ তিনি যুৱকক ঘটনাস্থলীৰ পৰা আঁতৰাই পঠাই।
তাৰ পাছতেই স্থানীয় ৰাইজ একপ্ৰকাৰ ক্ষোভিত হৈ পৰে।দীৰ্ঘদিন ধৰি অঞ্চলটোত গৰু তথা পশুধনৰ চুৰি কাৰ্যৰ ফলত অতিষ্ঠ হৈ আছিল স্থানীয় ৰাইজ। ইতিমধ্যে অঞ্চলটোত গৰু চুৰি সংঘটিত হৈ গোহালী খালী হৈ পৰাৰ অভিযোগ উত্থাপন হোৱাৰ লগতে গৰু চুৰ ৰোধ কৰিবলৈ যোৱাৰ সময়ত গৰু চুৰিৰ হাতত কেইবাজনো লোক প্ৰহৃত হ’ব লগা হৈছে। অৱশেষত স্থানীয় গাওঁবাসীয়ে পাল পাতি গৰু চুৰ ৰুধিবলৈ চেষ্টা কৰি আহিছিল।তেনে সময়তে যোৱা নিশা প্ৰায় ৩ বজাত নম্বৰ প্লেট বিহীন বাহনত সন্দেহ জনক ভাৱে তিনি যুৱকক 
স্থানীয় ৰাইজে ৰখাই সোধপোছ কৰাৰ পৰৱৰ্তী সময়ত এক উতপ্ত পৰিস্থিতিৰ সৃষ্টি হয়।বাহন সহ যুৱক কেইজনক,ৰাইজৰ মাজৰ পৰা মুকলি কৰি যাবলৈ দিয়াত ৰাইজ খঙত অগ্নিশৰ্মা হৈ পৰে।ফলত
স্থানীয় ৰাইজ আৰু আৰক্ষীৰ মাজত মতানৈক্যৰ সৃষ্টি হয় আৰু আৰক্ষী-ৰাইজৰ মাজত ঠেলা হেঁচাৰ লগতে পৰিস্থিতি নিয়ন্ত্রণৰ বাহিৰলৈ যায়।অভিযোগ অনুসৰি এজন আৰক্ষী কনিষ্টবল আহত হয়। অৱশেষত পৰিস্থিতি নিয়ন্ত্ৰণ কৰিবলৈ আৰক্ষীৰ লোকে শূন্যলৈ গুলী চালনা কৰে।কিন্ত পৰিস্থিতিৰ বিশেষ পৰিৱৰ্তন নঘটাত ক্ৰমান্বয়ে অধিক অৱনতি ঘটাত নিয়ন্ত্ৰণৰ বাবে আহিব লগা হ’ল এগৰাকী অতিৰিক্ত আৰক্ষী অধীক্ষক।টনা- আঁজোৰা,ইমানেই ভয়ংকৰ আছিল যে এজন আৰক্ষীৰ লোকৰ নেইম প্লেট ঘটনাস্থলিতে পৰি ৰয়।ৰাইজে খালি কাৰ্টজ উদ্ধাৰ কৰি আৰক্ষীক গটাই দিয়া বুলিও প্ৰকাশ।ইফালে ঘটনাক লৈ ডিব্ৰুগড়ৰ জ্যেষ্ঠ আৰক্ষী অধীক্ষক দিলীপ অভিজিৎ গৌৰৱ উপস্থিত হৈ পৰিস্থিতি তদন্ত কৰে।সংবাদ মাধ্যমৰ আগত জ্যেষ্ঠ আৰক্ষী অধীক্ষক গৌৰৱে কয় যে মাইজান ঘটনাটো সন্দেহযুক্ত গৰু চোৰ বুলি ৰাইজে অভিযোগ কৰিছে।আমি তিনিও যুৱকক জেৰা কৰি তদন্ত চলাই থকা অৱস্থাত গৰু চোৰৰ বিশেষ তথ্য লাভ কৰা নাই আৰু স্থানীয় ৰাইজে আইন হাতত তুলি লৈছে।সমগ্ৰ ঘটনাতোৰ তদন্তৰ পাছতহে প্ৰকৃত কথাবোৰ ফাদিল হব।ইফালে
ঘটনাস্থলীত অতিৰিক্ত আৰক্ষী অধীক্ষক,উপ আৰক্ষী অধীক্ষক, জেষ্ঠ আৰক্ষী অধীক্ষক সহ বিশাল অৰ্ধসামৰিক বাহিনী উপস্থিত হৈ কেনেদৰে ঘটনাটো সংঘটিত হ’ল সেই সন্দৰ্ভত তদন্ত অব্যাহত ৰখাৰ লগতে নম্বৰ প্লেট বিহীন বাহন খন আৰক্ষীয়ে জব্দ কৰে। লগতে বাহনখনত থকা গৰু চুৰৰ সন্দেহ কৰা তিনি যুৱকক আটক কৰি তদন্ত অব্যাহত ৰাখিছে। আৰক্ষীয়ে জানিবলৈ দিয়া মতে তিনি যুৱকে পুৱতি নিশা উক্ত অঞ্চললৈ যোৱা সময়ত স্থানীয় ৰাইজে আইন হাতত তুলি বাহন অনিষ্ট আৰু তিনি যুৱকক প্ৰহাৰ কৰাৰ বাবে পৰিস্থিতি নিয়ন্ত্ৰণ কৰিবলৈ গুলী চলাব লগা পৰিস্থিতিৰ সৃষ্টি হয়। সমগ্ৰ ঘটনা সন্দৰ্ভত আৰক্ষীয়ে তদন্ত কৰি দোষী সকলৰ বিৰুদ্ধে ব্যৱস্থা গ্ৰহণ কৰিব বুলি সকীয়াই দিয়ে। অৱশ্যে ডিব্ৰুগড় বিভিন্ন প্ৰান্তত শেহতীয়াকৈ আৰক্ষীৰ নিৰ্লিপ্ত ভূমিকা বাবে সঘনাই গৰু চুৰ ঘটনা বৃদ্ধি হোৱা লগতে স্থানীয় জনসাধাৰণ সৰ্বস্বান্ত হৈ আহিছে। ইপিনে আৰক্ষীক গোচৰ দিলেও কোনো ব্যৱস্থা গ্ৰহণ কৰা বিপৰীতে আৰক্ষী গৰু চুৰ পক্ষ গ্ৰহণ কৰা গুৰুত্বৰ অভিযোগ উত্থাপন হৈছে।যাৰ বাবে যোৱা নিশা ঘটনা উদ্ভৱ হোৱা বুলি অভিযোগ উত্থাপন হৈছে।অৱশ্যে সমগ্ৰ ঘটনাৰ সন্দৰ্ভত আৰক্ষীয়ে তদন্ত কৰাৰ পাছতহে পোহৰলৈ আহিব।