ডিব্ৰুগড় জিলা স্বাস্থ্য বিভাগৰ উদ্যোগত
বিশ্ব আত্মহত্যা প্ৰতিৰোধ দিৱস
চাইন অন ডেস্ক,১০ ছেপ্টেম্বৰ:
ডিব্ৰুগড় জিলা স্বাস্থ্য বিভাগৰ উদ্যোগত আজি বিশ্ব আত্মহত্যা প্ৰতিৰোধ দিৱসৰ লগত সংগতি ৰাখি জিলা স্বাস্থ্য সমিতি, ডিব্ৰুগড়ৰ উদ্যোগত ডিব্ৰুগড় বি.এছ.চি. নাৰ্ছিং কলেজত এক কেন্দ্ৰীয় কাৰ্যসূচীৰ আয়োজন কৰা হয়। এই বৰ্ষৰ বিশ্ব আত্মহত্যা প্ৰতিৰোধ দিৱসৰ বিষয়বস্তু “Changing the Narrative on Suicide” অৰ্থাৎ আত্মহত্যা সম্পৰ্কীয় আখ্যানৰ ৰূপান্তৰ আৰু ইয়াৰ বাবে “Start the Conversation” অৰ্থাৎ কথোপকথন আৰম্ভ কৰাৰ আহ্বান – এই গভীৰ তাৎপৰ্যপূৰ্ণ ভাৱনাক সাৰোগত কৰি অনুষ্ঠানটিৰ সামগ্ৰিক ৰূপৰেখা প্ৰস্তুত কৰা হৈছিল।
অনুষ্ঠানত মুখ্য অতিথি হিচাপে উপস্থিত থাকি জিলাৰ যুটীয়া স্বাস্থ্য সেৱা সঞ্চালক ডাঃ তৃষ্ণা বৰাই এক অন্তৰ্দৃষ্টিসম্পন্ন আৰু প্ৰেৰণাদায়ক ভাষণ প্ৰদান কৰে। তেওঁ শাৰীৰিক স্বাস্থ্যৰ সমান্তৰালকৈ মানসিক স্বাস্থ্যকো সম-মৰ্যাদা প্ৰদান কৰাৰ অপৰিহাৰ্যতাৰ ওপৰত গুৰুত্ব আৰোপ কৰি আত্মহত্যাৰ দৰে এক জটিল সামাজিক-মনস্তাত্ত্বিক প্ৰত্যাহ্বানৰ মোকাবিলাৰ বাবে মুকলি আলোচনাৰ প্ৰয়োজনীয়তাৰ বিষয়ে আলোকপাত কৰে।
কাৰ্যসূচীৰ সামগ্ৰিক ৰূপৰেখা আৰু আত্মহত্যা প্ৰতিৰোধৰ বহুমাত্ৰিক কৌশলৰ বিষয়ে বিশদভাৱে আলোকপাত কৰে জিলা মানসিক স্বাস্থ্য কাৰ্যসূচীৰ জিলা ন’ডেল বিষয়া ডাঃ অবিনাশ গগৈয়ে। তেওঁ আত্মহত্যাৰ প্ৰাৰম্ভিক সতৰ্ক সংকেতসমূহৰ মনো-সামাজিক বিশ্লেষণ, সময়মতে হস্তক্ষেপৰ গুৰুত্ব আৰু সম্প্ৰদায়ভিত্তিক সহায় ব্যৱস্থা শক্তিশালী কৰাৰ প্ৰয়োজনীয়তাৰ বিষয়ে বক্তব্য আগবঢ়ায়।
জিলা মিডিয়া বিশেষজ্ঞ ডেইজী গগৈয়ে ভাৰত চৰকাৰৰ ৰাষ্ট্ৰীয় টেলি মানসিক স্বাস্থ্য সেৱা Tele-MANAS ৰ বিষয়ে উপস্থিত সকলোকে বিশদভাৱে অৱগত কৰে। তেওঁ Tele-MANAS সেৱাৰ সুবিধা, উপকাৰিতা আৰু গুৰুত্বৰ বিষয়ে আলোকপাত কৰি কয় যে টোল-ফ্ৰী নম্বৰ ১৪৪১৬ বা ১-৮০০-৯১-৪৪১৬ ত ফোন কৰি যিকোনো ব্যক্তিয়ে ২৪ ঘণ্টাই, বছৰৰ ৩৬৫ দিনে, বিশটাতকৈ অধিক ভাষাত সম্পূৰ্ণ বিনামূলীয়া 
আৰু গোপনীয় পৰামৰ্শ লাভ কৰিব পাৰে। এই সেৱাৰ জৰিয়তে প্ৰশিক্ষিত পৰামৰ্শদাতাৰ পৰা প্ৰাথমিক পৰামৰ্শৰ পৰা আৰম্ভ কৰি প্ৰয়োজন সাপেক্ষে মনোৰোগ বিশেষজ্ঞৰ সৈতে ভিডিঅ’ পৰামৰ্শলৈকে সকলো সুবিধা উপলব্ধ। তেওঁ উপস্থিত নাৰ্ছিং শিক্ষাৰ্থী তথা শিক্ষয়িত্ৰীসকলক এই সেৱাৰ বিষয়ে সমাজৰ প্ৰতিটো স্তৰত সৰ্বাধিক সজাগতা সৃষ্টি কৰিবলৈ আহ্বান জনায় যাতে সংকটত থকা কোনো ব্যক্তিয়েই সহায়ৰ পৰা বঞ্চিত হৈ নাথাকে।
ইয়াৰ উপৰিও, জিলা মানসিক স্বাস্থ্য কাৰ্যসূচীৰ পৰামৰ্শ দাতা য়াছমিন চুলতানাই জিলা মানসিক স্বাস্থ্য কাৰ্যসূচীৰ সামগ্ৰিক কাৰ্যকলাপ, জিলাখনত উপলব্ধ মানসিক স্বাস্থ্য সেৱাসমূহ আৰু ইয়াৰ ফলপ্ৰসূ ৰূপায়ণৰ বিষয়ে এক চমু অৱতাৰণা আগবঢ়ায় আৰু চিকিৎসাযোগ্য মানসিক ৰোগৰ ক্ষেত্ৰত প্ৰাৰম্ভিক চিকিৎসাৰ গুৰুত্বৰ বিষয়ে অৱগত কৰে।
অনুষ্ঠানত উপস্থিত আন বহুমুখী পৰামৰ্শদাতাসকলেও নিজৰ নিজৰ অভিজ্ঞতা আৰু মতামত আগবঢ়ায়। ইয়াৰ মাজতে এক বিশেষ কথোপকথন মূলক আলোচনাও অনুষ্ঠিত হয়, য’ত বি.এছ.চি. নাৰ্ছিং কলেজৰ অধ্যাপিকা আৰু ছাত্ৰীসকলে উত্থাপন কৰা বিভিন্ন প্ৰশ্ন আৰু বিষয়সমূহৰ ফলপ্ৰসূভাৱে আলোচনা কৰা হয়। এই বৌদ্ধিক আদান-প্ৰদানে সভাখনক অধিক ফলপ্ৰসূ আৰু প্ৰাসংগিক কৰি তোলে আৰু এই বছৰৰ মূল মন্ত্ৰ – কথোপকথন আৰম্ভ কৰাৰ জৰিয়তে আত্মহত্যাৰ আখ্যান সলনি কৰাৰ আহ্বানক অধিক শক্তিশালী কৰে।