ডিব্ৰুগড়ৰ বেৰী হোৱাইট সংগ্ৰহালয় আজিও উদ্বোধন নহল কিয় ?
এতিয়াও নতুন তাৰিখ নিৰ্ধাৰণ হোৱা নাই !
চাইন অন ডেস্ক,৭ছেপ্টেম্বৰ:
বহু প্ৰত্যাশিত ডিব্ৰুগড়ৰ ডাঃ জন বেৰী হোৱাইট হেৰিটেজ মিউজিয়ামৰ ১ জুলাইত নিৰ্ধাৰিত উদ্বোধন সম্পন্ন নহ’ল। সংগ্ৰহালয়টো কেতিয়া আনুষ্ঠানিকভাৱে মুকলি কৰা হ’ব, তাৰ কোনো নতুন তাৰিখো এতিয়ালৈ নিৰ্ধাৰণ কৰা হোৱা নাই। ইফালে ঐতিহাসিক চৌহদটোৰ বৰ্তমানৰ অৱস্থাই ৰক্ষণাবেক্ষণক লৈ যথেষ্ট উদ্বেগৰ সৃষ্টি কৰিছে।
বহু বছৰ ধৰি চলি থকা বিলম্বৰ অন্তত ৰাষ্ট্ৰীয় চিকিৎসক দিৱস উপলক্ষে যোৱা ১ জুলাইত সংগ্ৰহালয়টো উদ্বোধন কৰাৰ কথা আছিল। কিন্তু নিৰ্ধাৰিত কাৰ্যসূচী অনুষ্ঠিত নহ’ল।
ডিব্ৰুগড়ৰ মেয়ৰ ডা: সৈকত পাত্ৰই পূৰ্বে কৈছিল যে কিছুমান সমস্যাৰ বাবে ১ জুলাইত উদ্বোধন কৰিব পৰা নগ’ল আৰু এতিয়ালৈ নতুন কোনো তাৰিখ
নিৰ্ধাৰণ কৰা হোৱা নাই।
ইফালে সংগ্ৰহালয় চৌহদটোৰ অৱস্থাই উদ্বেগৰ সৃষ্টি কৰিছে। স্থানটো পৰিদৰ্শন কৰাৰ সময়ত মূল প্ৰৱেশদ্বাৰৰ লোহাৰ গেটখনৰ দুটা অংশৰ এটা ভাঙি মাটিত পৰি থকা দেখা যায়। লগতে চৌহদটোৰ বিভিন্ন স্থানত লতাজাতীয় উদ্ভিদ আৰু জোপোহা গজি উঠি সমগ্ৰ পৰিৱেশটো অপৰিষ্কাৰ আৰু আগাছাৰে ভৰি পৰা ৰূপ ধাৰণ কৰিছে।
বছৰ বছৰ পূৰ্বেই পুনৰুদ্ধাৰৰ কাম যথেষ্ট পৰিমাণে সম্পূৰ্ণ হোৱাৰ পিছতো সংগ্ৰহালয়টো মুকলি নোহোৱাটোৱে বিষয়টোক অধিক গুৰুত্বপূৰ্ণ কৰি তুলিছে।অইল ইণ্ডিয়া লিমিটেড (OIL)-ৰ পুঁজিৰে আৰু ইণ্ডিয়ান নেচনেল ট্ৰাষ্ট ফৰ আৰ্ট এণ্ড কালচাৰেল হেৰিটেজ (INTACH)-ৰ জৰিয়তে ৰূপায়ণ কৰা ২.১ কোটি টকাৰ পুনৰুদ্ধাৰ প্ৰকল্পটোৰ কাম ২০১৮ চনৰ জানুৱাৰীত আৰম্ভ হৈছিল। প্ৰথম অৱস্থাত ১৫ মাহৰ ভিতৰত কাম সম্পূৰ্ণ কৰাৰ লক্ষ্য নিৰ্ধাৰণ কৰা হৈছিল যদিও প্ৰশাসনিক, কাৰিকৰী আৰু প্ৰক্ৰিয়াগত বিভিন্ন বিলম্বৰ বাবে প্ৰকল্পটো বাৰম্বাৰ পিছুৱাই যায়।
ঐতিহাসিক বেৰী হোৱাইট মেডিকেল স্কুলৰ ভৱনটোতে সংগ্ৰহালয়টো স্থাপন কৰা হৈছে। ডাঃ জন বেৰী হোৱাইটৰ দানশীলতাৰ ফলত ১৯০০ চনত ডিব্ৰুগড়ত এই চিকিৎসা শিক্ষানুষ্ঠান স্থাপন হৈছিল। অসমত ২৪ বছৰ সেৱা আগবঢ়োৱা ব্ৰিটিছ শল্য চিকিৎসক ডাঃ হোৱাইটে চিকিৎসা প্ৰতিষ্ঠান স্থাপনৰ বাবে তেওঁৰ জীৱনজোৰা সঞ্চয় দান কৰিছিল।
পৰৱৰ্তী সময়ত বেৰী হোৱাইট মেডিকেল স্কুলে ১৯৪৭ চনত অসম মেডিকেল কলেজ স্থাপনৰ ক্ষেত্ৰত এক ভেটি হিচাপে কাম কৰাৰ লগতে উত্তৰ-পূৰ্বাঞ্চলত আধুনিক চিকিৎসা শিক্ষাৰ 
বিকাশতো গুৰুত্বপূৰ্ণ ভূমিকা পালন কৰে।
১ জুলাইত সংগ্ৰহালয়টো মুকলি কৰাৰ ঘোষণাই দীৰ্ঘদিনীয়া অপেক্ষাৰ অৱসান ঘটিব বুলি আশা জগাই তুলিছিল। কিন্তু পুনৰ উদ্বোধন পিছুৱাই যোৱাৰ লগতে নতুন তাৰিখ নিৰ্ধাৰণ নোহোৱাত এতিয়া স্থানীয় ৰাইজে কৰ্তৃপক্ষৰ স্পষ্টীকৰণ আৰু ঐতিহাসিক চৌহদটোৰ উপযুক্ত
ৰক্ষণাবেক্ষণৰ বাবে অপেক্ষা কৰিছে।