বিজেপিৰ ভাৰ্চুৱেল বৈঠকক লৈ বিস্ফোৰক অভিযোগ অখিল গগৈৰ
বিজেপিক ভোট নিদিয়া লাখ লাখ ভোটাৰৰ নাম কৰ্তনৰ ষড়যন্ত্ৰ
৬০ টা সমষ্টিত যোগ্য ভোটাৰ কৰ্তনৰ দায়িত্ব মন্ত্ৰী অশোক সিংহালৰ
বিজেপিৰ সভাপতি দিলীপ শইকীয়াৰ নেতৃত্বত ষড়যন্ত্ৰৰ অভিযোগ
*চাইন অন ডেস্ক:*
বিজেপিক ভোট নিদিয়া লাখ লাখ ভোটাৰৰ নাম কৰ্তন কৰিবলৈ ষড়যন্ত্ৰৰ অভিযোগ উত্থাপন কৰিছে ৰাইজৰ দলৰ সভাপতি তথা বিধায়ক অখিল গগৈয়ে। ৰাজ্যিক বিজেপিৰ সভাপতি দিলীপ শইকীয়াৰ নিৰ্দেশত ৰাজ্যৰ প্ৰতিটো সমষ্টিৰ পৰা ১০ হাজাৰকৈ বিজেপি বিৰোধী ভোটাৰৰ নাম কৰ্তনৰ বাবে কাম-কাজ চলাই থকাৰ গুৰুতৰ অভিযোগ আনিছে বিধায়ক অখিল গগৈয়ে।কালি ডিব্ৰুগড়ত এক সংবাদমেল অনুষ্ঠিত কৰি বিধায়ক অখিল গগৈয়ে ৰাজ্যিক বিজেপিৰ সভাপতি দিলীপ শইকীয়া আৰু মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে সৰৱ হৈ পৰে। সংবাদমেলত বিধায়ক অখিল গগৈয়ে অভিযোগ উত্থাপন কৰি কয় যে, 
৪ জানুৱাৰীৰ সন্ধিয়া ৮.২০ বজাৰ পৰা ৮.৩০ বজাৰ ভিতৰত কথাখিনি শুনিছিলোঁ। এই কথাখিনি বিজেপিৰ সভাপতি দিলীপ শইকীয়াৰ কথা আছিল। বিজেপিৰ এজন বিশেষ নেতাই মোৰ লগত এক আলোচনা বহিছিল। সন্ধিয়া ৭.৩০ বজাত লগ পাইছিলোঁ বিজেপি নেতাজনক। ৮ বজাত ৰাজ্যিক বিজেপিৰ সভাপতিৰ লগত ভিডিঅ’ কনফাৰেন্স আছে বুলি কৈ মোৰ সন্মুখতে বিজেপি নেতাজনে অংশগ্ৰহণ কৰিছিল। মই তেতিয়া দূৰৰ পৰা চাই আছিলোঁ। লাউড স্পিকাৰ দি ভাৰ্চুৱেল বৈঠকখনৰ কথাবোৰ শুনি আছিল। আৰু ময়ো
বিজেপি নেতাজনৰ সৈতে কথাখিনি শুনি আছিলোঁ। দেৱাল লিখনক লৈ প্ৰথমে আলোচনা হৈ আছিল আৰু বিজেপিৰ সভাপতিয়ে কিছু নিৰ্দেশনা দি আছিল। কনফাৰেন্সত মন্ত্ৰী যোগেন মহনক প্ৰশংসা কৰি আছিল দিলীপ শইকীয়াই। কনফাৰেন্সত নথকা বিধায়কৰ তালিকা প্ৰস্তুত কৰিবলৈ কোনোবা এজনক নিৰ্দেশ দি আছিল। তাৰ মাজত ভয়ংকৰ কথা কৈছিল দিলীপ শইকীয়াই। বিধায়ক আৰু জিলা সভাপতিয়ে এছ আই আৰক গুৰুত্ব নিদিয়াটো খোব বেয়া কথা বুলি ধমক দি আছিল। এছ আই আৰক গুৰুত্ব দিবলৈ নিৰ্দেশ দি আছিল বিজেপিৰ সভাপতি দিলীপ শইকীয়াই। ১২ জানুৱাৰীৰ ভিতৰতে জিলা আৰু মণ্ডল সভাপতিয়ে দিলীপ শইকীয়াক ভোট নিদিয়া ভোটাৰ তালিকা দিবলৈ কৈ আছিল। এইখিনি কথা মই স্পষ্টতাৰে শুনি আছিলোঁ। দিলীপ শইকীয়াই এছ আই আৰক চিৰিয়াছলি নোলোৱাক লৈ খং উঠি আছিল। বুথ ভিত্তিত ভোটাৰ তালিকা দিবলৈ নিৰ্দেশ দিছিল। বিজেপিৰ ভেটি দুৰ্বল হোৱা বুথৰ তালিকা বিচাৰি আছিল। মন্ত্ৰী অশোক সিংহালক ৬০ টা সমষ্টিত ভোটাৰ তালিকাৰ নাম কৰ্তন কৰিবলৈ দায়িত্ব দি আছিল। জিলা বিজেপিৰ সভাপতি আৰু বিধায়কসকলৰ সৈতে হোৱা ভাৰ্চুৱেল বৈঠকখনত হোৱা এই আলোচনাৰ মতে যদিহে বিজেপিয়ে কাম-কাজ আৰম্ভ কৰে তেনেহ’লে লাখ লাখ ভোটাৰৰ নাম কৰ্তন হোৱাটো প্ৰায় নিশ্চিত। একেটা সংবাদমেলত বিধায়ক অখিল গগৈয়ে কয়, অশোক সিংহালে গোপনে উজনি অসম ভ্ৰমণত আছে। অনা অসমীয়া বিজেপিৰ মন্ত্ৰীৰ নেতৃত্বতে সমষ্টি পুনৰ নিৰ্ধাৰণ প্ৰক্ৰিয়া সমাপন কৰা হৈছিল। খিলঞ্জীয়া মানুহক বঞ্চিত কৰি অনা অসমীয়াক প্ৰাধান্য দিয়া হৈছিল। জনজাতি আৰু জনগোষ্ঠী লোকসকলক মাধমাৰ দি সমষ্টিৰ মানচিত্ৰ সলনি কৰি দিলে। দিলীপ শইকীয়াই এইজন অনা অসমীয়াৰ নেতৃত্বতে যোগ্য ভোটাৰৰ নাম কৰ্তনৰ কৰ্তৃত্ব দিয়া হৈছে। একেটা প্ৰসংগত ৰাহুল গান্ধীয়ে ভোট চুৰিৰ কথা কৈ থকাৰ সময়ত আমি কিছু বিশ্বাস কৰিব পৰা নাছিলোঁ। কিন্তু ৪ জানুৱাৰীত হোৱা ভাৰ্চুৱেল বৈঠকখনৰ কথাবোৰ শুনাৰ পাছত আশ্বস্ত হ’ব পাৰিছিলো। এছ আই আৰে বাঙালী ভোটাৰৰ ক্ষেত্ৰত অসুবিধাত পেলাব বুলি সংবাদমেলত উল্লেখ কৰি অখিল গগৈয়ে কয়, ডি ভোটাৰ হিচাপে 
প্ৰমাণ কৰাৰ ক্ষেত্ৰত সুবিধা হ’ব। ভাৰতবৰ্ষৰ মৌলিক অধিকাৰক কাঢ়ি নিয়াৰ ষড়যন্ত্ৰ কৰিছে বিজেপিয়ে। সকলো গণতান্ত্ৰিক অধিকাৰ নাইকীয়া কৰিব খোজা হৈছে। এই খবৰটো বিধানসভাৰ অধিৱেশনতে আমি পাইছিলোঁ। বিজেপিৰ বিধায়কসকলক প্ৰতি সমষ্টিত দহ হাজাৰ ভোটাৰ কৰ্তন কৰিবলৈ নিৰ্দেশ দিছিল। আনকি চৰকাৰৰ বিশ্বস্ত সাংবাদিকেও এইখিনি কথা মোক কৈছিল। চৰকাৰী বিএলঅ’ আৰু বিজেপিৰ বিএলঅ’ মিলি এইখিনি কাম কৰিবলৈ নিৰ্দেশ দিয়া হৈছে। আনহাতে মুখ্যমন্ত্ৰী যদি সচাকৈ জড় পদাৰ্থ হোৱা নাই তেনেহ’লে দেশৰ সংবিধান আৰু গণতন্ত্ৰক ধ্বংস কৰাৰ কাম নকৰিবলৈ বিধায়ক অখিল গগৈয়ে আহ্বান জনাই কয়, ভোটাৰ তালিকা কৰ্তন কৰিবলৈ মন্ত্ৰী অশোক সিংহালক দিয়া দায়িত্ব বন্ধ কৰক। ৰাজ্যিক নিৰ্বাচনী আয়োগৰ সহযোগত এই কামটো কৰিবলৈ আগবাঢ়িছে। আমি সকলো বিৰোধী দলে ইয়াৰ বিৰুদ্ধে কাম কৰো আহক। অসমৰ প্ৰতিজন জনতাক অনুৰোধ কৰিছোঁ যে, আমাৰ দেশৰ গণতান্ত্ৰিক ব্যৱস্থাক নাইকীয়া কৰিব দিব বিচৰা ষড়যন্ত্ৰৰ বিৰুদ্ধে আহক প্ৰতিবাদ কৰোঁ। নৈতিকতাৰ কথা কোৱা বিজেপি-আৰ এছ এছে দেশৰ সংবিধান সলনি কৰি পুনৰ শাসনলৈ আহিব বিচৰাতো চৰম লজ্জাজনক বুলিও মন্তব্য কৰিছে অখিল গগৈয়ে।