উল্লেখ্য যে, ইৰাণে প্ৰথমে ১০ জুনত ইজৰাইলৰ ওপৰত নিক্ষেপ কৰিছিল ক্লাষ্টাৰ বোমা। এই বোমা পৰেগৈ টেল আভিভৰ উপকণ্ঠ অঞ্চল আজোৰত। ফলত অঞ্চলটোৰ বিস্তৰ ক্ষতি হৈছে।
অৱশ্যে এই ঘটনাত হতাহতিৰ সঠিক খবৰ লাভ কৰা নাই। আনুষ্ঠানিকভাৱে এতিয়ালৈকে এই সংখ্যা প্ৰকাশ কৰা নাই ইজৰাইলে। মন কৰিবলগীয়া যে ইয়াৰ পূৰ্বেও বিভিন্ন যুদ্ধত ক্লাষ্টাৰ বোমাৰ ব্যৱহাৰ হৈছিল।
বহুতৰ মতে ক্লাষ্টাৰ বোমা বেলিষ্টিক মিছাইলতকৈ অধিক বিপজ্জনক। কাৰণ, ইয়াৰ জৰিয়তে একেলগে কেইবাটাও ঠাইত একাধিক আক্ৰমণ কৰিব পৰা যায়। ক্ষতিৰ পৰিমাণো তুলনামূলকভাৱে বেছি।
ইংৰাজীত ‘ক্লাষ্টাৰ’ শব্দটোৰ অৰ্থ হৈছে ‘এটা গোট’। এটা ক্লাষ্টাৰ বোমাত থাকে সৰু সৰু কেইবাটাও বোমা। এই প্ৰতিটো বোমা সৰু, কিন্তু শক্তিশালী। এটা ডাঙৰ মিছাইলৰ কেচিং সেই সৰু সৰু বোমাবোৰেৰে ভৰি থাকে।
তাৰ পৰা কমেও ২০টা বোমা ওলাই আহিল। মধ্য ইজৰাইলৰ বিভিন্ন ঠাইত আঠ কিলোমিটাৰ পৰ্যন্ত এলেকাত সিঁচৰতি হৈ আছিল এই বোমাবোৰ। ক্লাষ্টাৰ বোমাৰ আন এটা বিশেষ বৈশিষ্ট্য হ’ল ই স্বয়ংচালিত নহয়।
ক্লাষ্টাৰ বোমাৰ পৰা ওলোৱা সৰু সৰু বোমাবোৰ মাটিত পৰাৰ লগে লগে বিস্ফোৰণ নহয়। কিবা এটাৰ সংস্পৰ্শলৈ আহিলেহে বিস্ফোৰণ ঘটে। অৰ্থাৎ জনবসতিপূৰ্ণ অঞ্চল নাথাকিলে আৰু কোনো বস্তুৰ সংস্পৰ্শলৈ নাহিলে এই বোমাবোৰ দীৰ্ঘদিন ধৰি সক্ৰিয় হৈ থাকিব পাৰে।
