চেচা তিনিআলিত ‘মৃত্যুৰ ফান্দ’!
জৰুৰী সুৰক্ষা ব্যৱস্থাৰ দাবী লেজাই-কলাখোৱা আছুৰ
চাইন অন ডেস্ক,২৫আগষ্ট:
ডিব্ৰুগড়ৰ ৩৭ নং ৰাষ্ট্ৰীয় ঘাইপথৰ চেচা তিনিআলি ক্ৰমান্বয়ে পৰিণত হৈছেগৈ এক বিপজ্জনক পথ সংযোগস্থলত হিচাপে। সম্ভাৱ্য ভয়ংকৰ দুৰ্ঘটনা ৰোধৰ বাবে চেচা তিনিআলিত শীঘ্ৰে উপযুক্ত সুৰক্ষা ব্যৱস্থা গ্ৰহণ কৰাৰ দাবীৰে লেজাই-কলাখোৱা আঞ্চলিক ছাত্র সন্থাই ডিব্ৰুগড় জিলাৰ আয়ুক্তলৈ এখন স্মাৰকপত্ৰ প্ৰেৰণ কৰে। ডিব্ৰুগড়ৰ পৰা দক্ষিণমুখী ৩৭নং ৰাষ্ট্ৰীয় ঘাইপথ আৰু ডিব্ৰুগড়-লেজাই কলাখোৱা পথৰ গুৰুত্বপূৰ্ণ সংযোগস্থল হৈছে চেচা তিনিআলি। ডিব্ৰুগড়-শিৱসাগৰ যাতায়াতৰ অন্যতম গুৰুত্বপূৰ্ণ পথছোৱাত সম্প্ৰতি অসম মালাৰ অধীনত নিৰ্মাণকাৰ্য চলি থকাৰ লগতে দুয়োপাৰে বিভিন্ন 
নিৰ্মাণকাৰ্য চলি আছে। ফলত যান-বাহনৰ চলাচলত অসুবিধাৰ সৃষ্টি হোৱাৰ লগতে তীব্ৰবেগী যানবাহনৰ চলাচলে দুৰ্ঘটনাৰ আশংকাও ক্ৰমান্বয়ে বৃদ্ধি পাইছে। বিশেষকৈ ৩৭ নং ৰাষ্ট্ৰীয় ঘাইপথৰ চাৰিলেনযুক্ত চেচা তিনিআলিত বৰ্তমান যান-বাহনসমূহে অতি বিপজ্জনকভাৱে পথ পাৰ হ’বলগীয়া হয়। ডিব্ৰুগড়ৰ পৰা লেজাই অভিমুখে যাবলৈ হ’লে U-Turn ল’বৰ বাবে প্ৰায় ১.৫০ কিলোমিটাৰ দূৰলৈ যাবলগীয়া হয়। ফলত বহু সময়ত চমু পথ ব্যৱহাৰৰ বাবে যান-বাহন ভুল দিশে চলাচল কৰাৰ পৰিস্থিতিৰ সৃষ্টি হয়। এনে 
পৰিস্থিতিয়ে যিকোনো সময়তে ভয়ংকৰ দুৰ্ঘটনাৰ ৰূপ লোৱাৰ আশংকা স্পষ্ট হৈ পৰিছে। এই সন্দৰ্ভত লেজাই কলাখোৱা আঞ্চলিক ছাত্ৰ সন্থাৰ সভাপতি মানস প্ৰতীম গগৈ আৰু সাধাৰণ সম্পাদক প্ৰীতম দাসে কয় যে, চেচা তিনিআলিৰ দৰে গুৰুত্বপূৰ্ণ সংযোগস্থলত যান-বাহনৰ সুৰক্ষিত চলাচলৰ বাবে পৰ্যাপ্ত ব্যৱস্থা নথকাটো অত্যন্ত উদ্বেগজনক প্ৰকাশ কৰি ডিব্ৰুগড় জিলা আয়ুক্তলৈ এখন স্মাৰক পত্ৰ পেৰণ কৰে। 
সংগঠনটোৱে চেচা তিনিআলিৰ দুৰ্ঘটনাপ্ৰৱণ স্থানত যান-বাহন নিয়ন্ত্ৰণৰ বাবে উপযুক্ত ব্যৱস্থা গ্ৰহণ কৰাৰ লগতে পথ সংযোগস্থলৰ দুয়োফালে স্পষ্ট দিক-নিৰ্দেশক ফলক স্থাপন আৰু পৰ্যাপ্ত পোহৰৰ ব্যৱস্থা কৰাৰ দাবী জনাই।
জনসাধাৰণৰ জীৱন আৰু সুৰক্ষাৰ প্ৰতি লক্ষ্য ৰাখি অন্ততঃ ১০ দিনৰ ভিতৰত কাৰ্যকৰী ব্যৱস্থা গ্ৰহণ কৰিবলৈ জিলা প্ৰশাসনক আহ্বান জনাইছে লেজাই কলাখোৱা আঞ্চলিক ছাত্ৰ সন্থাই।