ডিব্ৰুগড় জিলা প্ৰশাসনৰ চুবুৰীয়া বানপীড়িত জিলাসমূহলৈ সাহায্যৰ হাত
চাইন অন ডেস্ক,২৭জুলাই :
ডিব্ৰুগড় জিলাখনে নিজে ধাৰাবাহিক বান পৰিস্থিতিৰ সৈতে যুঁজি থকাৰ পিছতো, মানৱীয় সেৱা আৰু আন্তঃজিলা সহযোগিতাৰ প্ৰতি থকা নিজৰ দৃঢ় প্ৰতিশ্ৰুতি প্ৰদৰ্শন কৰি চুবুৰীয়া বানপীড়িত জিলা শিৱসাগৰ আৰু চৰাইদেউলৈ একেৰাহে সাহাৰ্য্য সামগ্ৰী, মানৱ সম্পদ, উদ্ধাৰকাৰী দল, গধুৰ যন্ত্ৰপাতি আৰু লজিষ্টিক সম্পদৰ যোগান ধৰি সমৰ্থন আগবঢ়াইছে।
এই সাহায্য কাৰ্যসূচীৰ অংশ হিচাপে, বানাক্ৰান্ত জিলাসমূহলৈ ৩,৩৩,৬২৪ লিটাৰতকৈও অধিক খোৱাপানীৰ বটল আৰু ১,৯৫,৮৫২ টাৰো অধিক বিস্কুটৰ পেকেট বিতৰণ কৰা হয়। ইয়াৰ উপৰিও, ৪৫,০০০ গৰাকী লোকৰ বাবে সাত দিনৰ উপযোগী পৰ্যাপ্ত সাহায্য সামগ্ৰী প্ৰস্তুত কৰি প্ৰেৰণ কৰা হৈছে। এই পেকেটসমূহত বানপীড়িত পৰিয়ালসমূহৰ সুবিধাৰ্থে চাউল, দাইল, নিমখ, সৰিয়হৰ তেল আৰু অন্যান্য নিত্যপ্ৰয়োজনীয় খাদ্য 
সামগ্ৰী যোগান ধৰা হৈছে। তদুপৰি, চলি থকা সাহায্য প্ৰচেষ্টাৰ অংশ হিচাপে ১০,০০০ পেকেট গাখীৰ, শিৱসাগৰ জিলাৰ বাবে ১৫ কুইণ্টল চিৰা আৰু ৭,০০০ পেকেট সৰিয়হৰ তেল, আৰু চৰাইদেউ জিলাৰ বাবে ৬৮ কুইণ্টল ৰঙালাউ প্ৰেৰণ কৰা হৈছে।
সাহায্য সামগ্ৰীসমূহ সুচাৰুৰূপে পৰিবহণ কৰিবলৈ জিলা প্ৰশাসনে শিৱসাগৰ আৰু চৰাইদেউ জিলাৰ সাহায্য কাৰ্যসূচীৰ বাবে ৯৬ খন লঘূ বাহন আৰু ৫৮ খন ট্ৰাক নিয়োজিত কৰিছে।শিৱসাগৰ জিলাৰ বানপীড়িত অঞ্চলসমূহত সাহায্য সামগ্ৰী বোজাই আৰু নমোৱাৰ কামত প্ৰেৰণ কৰা প্ৰায় ৩৬ জন শ্ৰমিকৰ নিৰালস্য প্ৰচেষ্টাৰে এই বৃহৎ সাহায্য অভিযান চলাই থকা হৈছে। সাহায্য যোগানৰ উপৰিও ডিব্ৰুগড়ে জল পৰিবহণ আৰু উদ্ধাৰ কাৰ্যৰ বাবে জৰুৰী সম্পদৰো যোগান ধৰিছে। শিৱসাগৰ জিলাত সাতখন দেশীয় নাও মোতায়েন কৰা হৈছে। তদুপৰি, চৰাইদেউ জিলাত ৬ জন এছ.ডি.আৰ.এফ. (SDRF) কৰ্মীসহ দুখন নাও আৰু শিৱসাগৰ জিলাত ৭ জন
এছ.ডি.আৰ.এফ. কৰ্মীসহ আন দুখন নাও উদ্ধাৰ আৰু সাহায্য কাৰ্যৰ বাবে প্ৰেৰণ কৰা হৈছে।উদ্ধাৰ অভিযান অধিক ক্ষিপ্ৰ কৰিবলৈ, ৩০ জন কৰ্মী আৰু চাৰিখনকৈ নাও থকা দুটা এন.ডি.আৰ.এফ. (NDRF) ৰ দল শিৱসাগৰ জিলালৈ জৰুৰীকালীন উদ্ধাৰ কাৰ্যত সহায় কৰিবলৈ প্ৰেৰণ কৰা হৈছে।
অসমৰ মুখ্যমন্ত্ৰীৰ নিৰ্দেশ মৰ্মে ২৫ জুলাই তাৰিখে ডিব্ৰুগড় জিলা প্ৰশাসনে ৫০ টা বিশেষ সাহায্য কিট যোগান ধৰে, যাৰ প্ৰত্যেকটোতে চাউল, মচুৰ দাইল, নিমখ আৰু সৰিয়হৰ তেল আছিল। এইসমূহ ভাৰতীয় বায়ু সেনাই শিৱসাগৰৰ নাজিৰা আৰু শিৱসাগৰৰ বানপীড়িত অঞ্চলসমূহত আকাশৰ পৰা এয়াৰ ড্ৰপ কৰা হয়।একেদৰে কাইলৈও বিমানযোগে সাহায্য বিতৰণ প্ৰক্রিয়া অব্যাহত থাকিব।জনস্বাস্থ্য কাৰিকৰী বিভাগ (PHED), ডিব্ৰুগড়ে চৰাইদেউৰ জনস্বাস্থ্য কাৰিকৰী বিভাগক ৩৪,০০০ টা 
NaDCC পানী বিশুদ্ধকৰণ টেবলেট, ১৫ বস্তা ব্লিচিং পাউডাৰ আৰু সজাগতামূলক পত্ৰিকা যোগান ধৰি বানপীড়িত অঞ্চলসমূহত নিৰাপদ খোৱাপানী নিশ্চিত কৰিবলৈ আৰু অনাময় ব্যৱস্থা প্ৰসাৰিত কৰিবলৈ গুৰুত্বপূৰ্ণ সহায় আগবঢ়ায়।ইফালে, লোকনিৰ্মাণ বিভাগে (PWD) ৰাস্তা-ঘাট মেৰামতি আৰু জৰুৰীকালীন সঁহাৰিৰ বাবে নাজিৰালৈ চাৰিখন প’কেলেইন এক্সকেভেটৰ, ছয়খন জে.চি.বি. (JCB) মেচিন আৰু ১৩ খন ডাম্পাৰ প্ৰেৰণ কৰি গধুৰ যন্ত্ৰপাতি নিয়োজিত কৰিছে।ডিব্ৰুগড় জিলা প্ৰশাসনে সময়োপযোগী মানৱীয় সাহায্য আগবঢ়াবলৈ দৃঢ়প্ৰতিজ্ঞ আৰু বানপীড়িত জিলাসমূহৰ ৰাইজৰ সৈতে একাত্মতাৰে থিয় দিছে।জিলাখন নিজেই ধাৰাবাহিক বান পৰিস্থিতিৰ সৈতে যুঁজি থকা সত্ত্বেও, ডিব্ৰুগড়ে প্ৰতিৱেশী জিলাসমূহলৈ সহায়ৰ হাত আৰু সম্পদ আগবঢ়াইছে যিয়ে এনে সংকটৰ মুহূৰ্তত আন্তঃজিলা সহযোগিতা আৰু যৌথ দায়িত্ববোধৰ এক অনন্য নিদৰ্শন দাঙি ধৰিছে।