জোনাইত কেবালাখ টকাৰ মূল্যৱান খয়েৰ কুণ্ডা জব্দ:
চোৰাংকৈ অৰুনাচলৈ সৰবৰাহ কৰাৰ সময়তে জোনাই আৰক্ষীয়ে জব্দ কৰিবলৈ সক্ষম।
জোনাই ২৩ জুন:
ধেমাজি জিলাৰ জোনাই আৰক্ষীৰ বৃহৎ সাফল্য। আজি জোনাই সদৰ থানাৰ আৰক্ষীয়ে তিনিখন টাটা পিকাআপ ভৰ্তি মূল্যৱান খয়েৰ গছৰ কুণ্ডা জব্দ কৰিবলৈ সক্ষম হয়। জানিব পৰামতে জোনাই সমজিলাৰ চিমেন চাপৰিৰ চিমেন 
নদীৰ কাষত অৱস্থিত বনভূমিৰ পৰা চোৰাং কাঠ মাফিয়া চক্ৰই মূল্যৱান খয়েৰ গছ কাটি কুণ্ডাবোৰ জোনাই-ৰুকচিন চেকগেট হৈ অৰুণাচল প্ৰদেশৰ নামচাইৰ খয়েৰ ফেক্টৰীলৈ নিয়াৰ পথত
আজি জোনাই থানাৰ আৰক্ষীয়ে জোনাইৰ চন্দ্ৰপুৰৰ ৫১৫ নং ৰাষ্ট্ৰীয় ঘাইপথৰ পৰা খয়েৰ ভৰ্তি টাটা পিকআপ তিনিখন জব্দ কৰে। জব্দ কৰা খয়েৰ গছৰ কুণ্ডা ভৰ্তি টাটা পিকাআপ তিনিখন আৰক্ষীয়ে জোনাই থানালৈ আনি তদন্ত অব্যাহত ৰাখিছে। চোৰাং খয়েৰ গছৰ কুণ্ডা কঢ়িওৱা টাটা পিকাআপ তিনিখনৰ তিনিজন ড্ৰাইভাৰ আৰু হেণ্ডিমেন দুজনক আটক কৰি তদন্ত চলাই আছে। জানিব পৰামতে চিমেন চাপৰিৰ বনভূমিত কুঞ্জ দাস নামৰ এজনে বেদখল কৰি আছে। কিন্তু কুঞ্জ দাসে ঘৰত নথকাৰ সুযোগত ফুকন উপাধিৰ এজন লোকে মূল্যৱান খয়েৰ গছ কাটি অৰুণাচল প্ৰদেশৰ নামচাইৰ খয়েৰ ফক্টৰীলৈ সৰবৰাহ কৰিছিল। জোনাইৰ চিমেন চাপৰিৰ পৰা অৰুণাচলৰ নামচাইৰ ফেক্টৰীলৈ মূল্যৱান খয়েৰ গছৰ কুণ্ড সৰবৰাহৰ ঘটনাত বৃহৎ চোৰাং কাঠৰ বৃহৎ চক্ৰ জৰিত হৈ থকাৰ অভিযোগ উঠিছে। ফলত জোনাই আৰক্ষীৰ লগতে জোনাই বন বিভাগক মূল্যৱান খয়েৰ গছৰ চোৰাং বেহাৰ ওপৰত উচিৎ তদন্ত কৰি দোষীৰ বিৰুদ্ধে কঠাৰ আইনী ব্যৱস্থা গ্ৰহণ কৰিবলৈ প্ৰকৃতিপ্ৰেমী ৰাইজে দাবী জনাইছে। জব্দ কৰা খয়েৰ গছৰ 
মূল্য কেইবা লাখ টকা মূল্যৰ হ’ব বুলি জানিব পৰা গৈছে।