অৰুণাচলৰ মেওত নিহত ২ এন এছ চি এন (কে-ৱাই এ) দুধৰ্ষ কেডাৰ বিদ্ৰোহীৰ শিবিৰত মোক্ষম আঘাত
জোৱান আহত হোৱাৰ ‘প্ৰতিশোধ’ ?
মাৰ্ঘেৰিটা,১২মে’:
অৰুণাচল প্ৰদেশৰ চাংলাং জিলাৰ ম্যানমাৰ সীমান্তৱৰ্তী মিয়াওত আজি নিৰাপত্তা বাহিনীৰ এক তীব্ৰ সংঘৰ্ষত নিষিদ্ধ ঘোষিত সংগঠন এন এছ চি এন (কে-ৱাই এ)ৰ দুজনকৈ দুৰ্ধৰ্ষ কেডাৰ নিহত হয়। অঞ্চলটোত সন্ত্ৰাসবাদীৰ এটা বৃহৎ দলে আশ্ৰয় লৈ থকাৰ খবৰ লাভ কৰাৰ পাছতেই চলোৱা এই যুটীয়া অভিযানত নিৰাপত্তা বাহিনীয়ে বৃহৎ সফলতা লাভ কৰিবলৈ সক্ষম হৈছে। সেনাই চলোৱা এই ‘অপাৰেচন’ক বিদ্ৰোহী সংগঠনটোৰ ওপৰত এক প্ৰবল প্ৰত্যাহ্বান বুলি অভিহিত কৰা হৈছে।
উল্লেখ্য যে, কিছুদিন পূৰ্বে এই অঞ্চলটোতে এন এছ চি এনৰ এটা সশস্ত্ৰ গোটে আছাম ৰাইফলছৰ এটা দলক লক্ষ্য কৰি অতৰ্কিতে আক্ৰমণ চলাইছিল। সেই ভয়াৱহ আক্ৰমণত সেনাৰ এজন জোৱান গুৰুত্বৰভাৱে আহত হৈ জীৱন-মৃত্যুৰে যুঁজিবলগীয়া হৈছিল। এই ঘটনাই নিৰাপত্তা বাহিনীৰ মাজত তীব্ৰ জোকাৰণি সৃষ্টি কৰিছিল। তেতিয়াৰ পৰাই ভাৰতীয় সেনাই বিদ্ৰোহীৰ ঘাটি উচ্ছেদ কৰিবলৈ পণ লৈছিল আৰু চোৰাংচোৱাৰ নেটৱৰ্ক অধিক শক্তিশালী কৰি তুলিছিল।
দীৰ্ঘদিন ধৰি এন এছ চি এনৰ এই গোটটোৱে মিয়াও আৰু ইয়াৰ সমীপৱৰ্তী দুৰ্গম এলেকাৰ সাধাৰণ জনতাক ‘টেক্স’ৰ নামত ধনদাবী কৰি এক প্ৰকাৰৰ সমান্তৰাল চৰকাৰ চলাই আছিল। বিশেষকৈ চংকিং গাঁৱত বিদ্ৰোহীৰ এটা ১০-১৫ জনীয়া দলে ঘৰে ঘৰে গৈ গৃহ কৰ সংগ্ৰহ কৰি থকাৰ নিৰ্ভৰযোগ্য তথ্য সেনাৰ হাতত আছিল। কালি নিশা প্ৰায় ৮:৩০ বজাত মিয়াও চক্ৰৰ ডইমুখ নালা অঞ্চলত ০৮ আছাম ৰাইফলছ আৰু ১২ পেৰা ৰেজিমেন্টে এক অভূতপূৰ্ব ‘গেৰিলা অপাৰেচন’ আৰম্ভ কৰে।
পাহাৰীয়া অঞ্চলটোত সেনাৰ উপস্থিতি ধৰা পেলাই বিদ্ৰোহীৰ দলটোৱে আধুনিক স্বয়ংক্ৰিয় মাৰাণাস্ত্ৰৰে গুলীবৰ্ষণ আৰম্ভ কৰে। নিশাৰ আন্ধাৰ ফালি দুয়োপক্ষৰ মাজত প্ৰায় এঘণ্টা ধৰি চলে ৰক্তক্ষয়ী সংঘৰ্ষ। সেনাৰ তীক্ষ্ণ লক্ষ্যভেদী গুলীৰ সন্মুখত তিষ্ঠিব নোৱাৰি দুজন কেডাৰ থিতাতে ধৰাশায়ী হয়। নিহত কেডাৰ দুজনৰ এজন হ’ল টাংচাং অঞ্চলৰ নায়াং গাঁৱৰ সয়ম্ভ লেফটেনেণ্ট কৰ্ণেল উমকং (Lt. Col. Umkong) আৰু আনজন চিঠক গাঁৱৰ সয়ম্ভ চাৰ্জেণ্ট এনু (Sgt. Enu) বুলি চিনাক্ত কৰা হৈছে।
এই ঘটনাই বিদ্ৰোহী শিবিৰত হাহাকাৰৰ সৃষ্টি কৰিছে। সংগঠনটোৰ তথ্য আৰু প্ৰচাৰ মন্ত্ৰালয়ে (MIP, GPRN) এক প্ৰেছ বিবৃতিৰ জৰিয়তে এই ঘটনাক ‘উচটনিমূলক’ আৰু ‘একপক্ষীয়’ আখ্যা দি তীব্ৰ গৰিহণা জনাইছে। তেওঁলোকৰ দাবী অনুসৰি নিহত কেডাৰ দুজন শান্তিপূৰ্ণ কামতহে নিয়োজিত আছিল। অৱশ্যে সেনাৰ এক সূত্ৰই এই দাবী নৎসাত কৰি জনাইছে যে ঘটনাস্থলীৰ পৰা বৃহৎ পৰিমাণৰ গোলা-বাৰুদ আৰু মাৰাণাস্ত্ৰ উদ্ধাৰ কৰা হৈছে। বৰ্তমান সমগ্ৰ সীমান্তৱৰ্তী অঞ্চলটোত কমাণ্ডো বাহিনীৰ ‘কম্বিং অপাৰেচন’ অব্যাহত আছে। পলাই যোৱা অন্য সদস্যসকলৰ সন্ধানত ড্ৰ’নৰ জৰিয়তেও আকাশমাৰ্গৰ পৰা নিৰীক্ষণ কৰা হৈছে। এই অভিযানে ম্যানমাৰ সীমান্তত বিদ্ৰোহীৰ তৎপৰতাৰ বিৰুদ্ধে সেনাৰ শূন্য সহনশীলতাৰ স্পষ্ট বাৰ্তা প্ৰেৰণ কৰিছে। সমগ্ৰ ঘটনাই অৰুণাচল প্ৰদেশৰ মিয়াও তীব্ৰ উত্তেজনাৰ সৃষ্টি কৰিছে।