ডিব্ৰুগড় জিলাত সাধাৰণ পৰ্যবেক্ষক
নিৰ্বাচনী প্ৰশিক্ষণ আৰু প্ৰস্তুতিৰ পৰ্যালোচনা
চাইন অন ডেস্ক:
সমাগত অসম বিধানসভাৰ সাধাৰণ নিৰ্বাচন ২০২৬ৰ পৰিপ্ৰেক্ষিতত, ৯০ নং দুলীয়াজান, ৯১ নং টিংখং আৰু ৯২ নং নাহৰকটীয়া বিধানসভা সমষ্টিৰ বাবে নিযুক্ত সাধাৰণ পৰ্যবেক্ষক চিপহাং আৰ্থাৰ ৱৰচুইয়ো (IAS) ২ এপ্ৰিল তাৰিখে নিৰ্বাচনৰ সুচাৰু পৰিচালনাৰ বাবে ডিব্ৰুগড় জিলাত কেতবোৰ গুৰুত্বপূৰ্ণ পৰ্যালোচনা কাৰ্যসূচীত অংশগ্ৰহণ কৰে।
প্ৰথমে সাধাৰণ পৰ্যবেক্ষকগৰাকীয়ে ডিব্ৰুগড় জিলা আয়ুক্তৰ কাৰ্যালয়ত মাইক্ৰ’ পৰ্যবেক্ষকসকলৰ বাবে আয়োজিত এটি প্ৰশিক্ষণ অনুষ্ঠানত উপস্থিত থাকে। তাত তেওঁ মাইক্ৰ’ পৰ্যবেক্ষকসকলৰ মুখ্য দায়িত্বসমূহৰ ওপৰত গুৰুত্ব আৰোপ কৰে। নিৰ্বাচনৰ দিনা অতি স্পৰ্শকাতৰ ভোটগ্ৰহণ কেন্দ্ৰসমূহ স্বতন্ত্ৰভাৱে পৰ্যবেক্ষণ কৰা, মক পোল (Mock Poll) প্ৰক্ৰিয়া, EVM/VVPAT চীল কৰা আৰু নিৰ্ধাৰিত নিয়ম অনুসৰি কোনো ধৰণৰ অনিয়ম নোহোৱাকৈ ভোটগ্ৰহণ আৰম্ভ হোৱাটো নিশ্চিত কৰিবলৈ তেওঁ নিৰ্দেশ দিয়ে। ইয়াৰ উপৰিও, ভোটাৰ চিনাক্তকৰণ আৰু ভোটদান প্ৰক্ৰিয়া নিবিড়ভাৱে নিৰীক্ষণ কৰিবলৈ আৰু যিকোনো বিসংগতিৰ বিষয়ে তৎক্ষণাত সাধাৰণ পৰ্যবেক্ষকক অৱগত কৰি ভোটগ্ৰহণৰ সমাপ্তিত এক তথ্যভিত্তিক প্ৰতিবেদন দাখিল কৰিবলৈও তেওঁ নিৰ্দেশনা প্ৰদান কৰে।
ইয়াৰ পাছতে, পৰ্যবেক্ষকগৰাকীয়ে ডিব্ৰু মহাবিদ্যালয় ভ্ৰমণ কৰি নিৰ্বাচনী বিষয়া-কৰ্মচাৰীসকলৰ তৃতীয় পৰ্যায়ৰ প্ৰশিক্ষণ কাৰ্যসূচী তদাৰক কৰে। মহাবিদ্যালয়খনত সৰ্বমুঠ পাঁচটা প্ৰশিক্ষণ কক্ষত এই প্ৰক্ৰিয়া চলি আছিল। ভ্ৰমণকালত পৰ্যবেক্ষকগৰাকীয়ে প্রিজাইডিং বিষয়াসকলৰ সৈতে মতবিনিময় কৰে আৰু মক পোল প্ৰক্ৰিয়া, CRC (Close-Result-Clear) পদ্ধতি, মক পোলৰ ভোটাৰ স্লিপ চীল কৰা আৰু নিৰ্বাচনৰ দিনাৰ গুৰুত্বপূৰ্ণ নিয়মসমূহৰ ওপৰত তেওঁলোকৰ প্ৰস্তুতিৰ বুজ লয়।
বিয়লি সাধাৰণ পৰ্যবেক্ষকগৰাকীয়ে জিলা আয়ুক্তৰ কাৰ্যালয়ত অনুষ্ঠিত নিৰ্বাচনী প্ৰস্তুতি সম্পৰ্কীয় এখন বৈঠকত অংশগ্ৰহণ কৰে। বৈঠকত নিৰ্বাচন পৰিচালনাৰ কেইবাটাও গুৰুত্বপূৰ্ণ দিশ, যেনে— মোবাইল ফোন সংগ্ৰহ কেন্দ্ৰ স্থাপন, নিৰ্বাচনী আচৰণ বিধি (MCC) ৰূপায়ণৰ স্থিতি আৰু নিৰ্বাচন চমু চাপি অহাৰ লগে লগে FST আৰু SST দলসমূহক অধিক সক্ৰিয় কৰি তোলাৰ ওপৰত আলোচনা কৰা হয়। ৰাজনৈতিক সভা-সমিতিৰ অনুমতি প্ৰদানৰ ক্ষেত্ৰত স্বচ্ছতা আৰু নিৰপেক্ষতা বজাই ৰখাৰ লগতে সঠিক নিৰীক্ষণৰ ওপৰতো গুৰুত্ব দিয়া হয়।
পৰ্যবেক্ষকগৰাকীয়ে বিধানসভা সমষ্টি ভিত্তিক আৰক্ষী বাহিনীৰ মোতায়েন আৰু সামগ্ৰিক নিৰাপত্তা পৰিকল্পনাৰ পৰ্যালোচনা কৰি শান্তিপূৰ্ণ আৰু শৃংখলাবদ্ধ নিৰ্বাচন নিশ্চিত কৰিবলৈ নিৰাপত্তা পৰিকল্পনাটো অতি শীঘ্ৰে চূড়ান্ত কৰিবলৈ নিৰ্দেশ দিয়ে।