দুদিনীয়াকৈ অনুষ্ঠিত শ্ৰীমন্ত শংকৰদেৱ সংঘৰ অধিৱেশন
হৰিনামৰ ধ্বনিৰে মুখৰ চৌপাশ
ভাগৱতসহ বৰ্ণিল সাংস্কৃতিক শোভাযাত্ৰা
চাইন অন ডেস্ক:
আজি হৰিনামৰ ধ্বনিৰে মুখৰ হৈ পৰিছে তিতাবৰৰ ৰজাবাহৰ। চৌপাশত বিৰাজ কৰিছে উখল-মাখল পৰিৱেশ।
ৰজাবাহৰত দুদিনীয়া বৰ্ণাঢ্য কাৰ্যসূচীৰে অনুষ্ঠিত হৈছে শ্ৰীমন্ত শংকৰদেৱ সংঘৰ তিতাবৰ জিলা শাখাৰ বাৰ্ষিক অধিৱেশন।
সংঘৰ বৰহোলা আঞ্চলিকৰ আতিথ্যত সু-পৰিকল্পিত আৰু অতি আকৰ্ষণীয়কৈ অনুষ্ঠিত এই অধিৱেশনত অগনণ ভকত-বৈষ্ণৱ, আই-মাতৃ, শিশু-কিশোৰে অংশগ্ৰহণ কৰিছে।
আজি পুৱাতে ভাগৱতসহ বিশাল সাংস্কৃতিক শোভাযাত্ৰা ৰূপায়ন কৰা হয়। হৰিনাম-কীৰ্তনৰ ধ্বনিৰে চৌপাশ মুখৰ কৰি তোলা শোভাযাত্ৰাত জাতি, ধৰ্ম, বৰ্ণ নিৰ্বিশেষে কেইবাশতাধিক লোকে অংশগ্ৰহণ কৰে। গায়ন-বায়নসহ ৰূপায়িত শোভাযাত্ৰাটোৱে সমাজলৈ একতা আৰু আধ্যাত্মিকতাৰ এক ইতিবাচক বাৰ্তা দিয়া পৰিলক্ষিত হয়।
ইয়াৰ পিছতে অন্তৰংগ আলাপ, মুকলি সভা আদি অনুষ্ঠিত হ’ব। মুকলি সভাত ‘মহাপুৰুষ মাধৱদেৱ বঁটা’ আৰু ‘কীৰ্তিমান বঁটা’ প্ৰদান কৰা হ’ব। সভাত নিৰ্দিষ্ট বক্তাৰ লগতে উপস্থিত থাকিব কেইবাগৰাকীও বিশিষ্ট অতিথিয়ে।