ডিব্ৰুগড় বিশ্ববিদ্যালয় আন্তঃৰাষ্ট্ৰীয় সাহিত্য উৎসৱ–২০২৬ৰ তৃতীয় সংস্কৰণ সফল সমাপ্তি
দেশ- বিদেশৰ লেখক -সাহিত্যিক, সাংস্কৃতিক কৰ্মী উপস্থিতিত জীপাল ডিব্ৰুগড় বিশ্ববিদ্যালয়
১৫০ লেখক সাহিত্যিক, ১০ সহস্ৰাধিক ছাত্ৰ-ছাত্ৰী, অতিথি অংশগ্ৰহণ
চাইন অন ডেস্ক:
ডিব্ৰুগড় বিশ্ববিদ্যালয় আৰু ফকেল (Foundation for Culture, Arts & Literature)-ৰ যৌথ উদ্যোগত আয়োজিত “ডিব্ৰুগড় বিশ্ববিদ্যালয় আন্তঃৰাষ্ট্ৰীয় সাহিত্য উৎসৱ (DUILF)–২০২৬”-ৰ তৃতীয় সংস্কৰণ আজি এক গাম্ভীৰ্যপূৰ্ণ অনুষ্ঠানৰ জৰিয়তে সফলভাৱে সামৰণি পৰে। চাৰিদিনীয়া এই উৎসৱে সাহিত্যিক 
আদান-প্ৰদান, আন্তঃসংস্কৃতিক সংলাপ আৰু বৌদ্ধিক চিন্তাৰ এক জীৱন্ত পৰিসৰ সৃষ্টি কৰি উত্তৰ-পূব ভাৰতৰ সাহিত্যৰ উপস্থিতিক বিশ্বৰ মঞ্চত পুনৰ প্ৰতিষ্ঠা কৰে।সামৰণি অনুষ্ঠানত অসমৰ শিক্ষা মন্ত্ৰী ডা° ৰণোজ পেগু, বিশ্ববিদ্যালয়ৰ উপাচাৰ্য অধ্যাপক জিতেন হাজৰিকা, আইএএছ বিষয়া বি. কল্যাণ চক্ৰৱৰ্তী, আন্তঃৰাষ্ট্ৰীয় খ্যাতিসম্পন্ন লেখক তথা অনুবাদক এন মৰগান, মিশৰৰ লেখক শ্বেৰিফ বাকৰ আৰু বিশিষ্ট সাহিত্যিক মুৰ্জবান ফালি শ্ৰফ উপস্থিত থাকে। উপাচাৰ্য অধ্যাপক জিতেন হাজৰিকাই ভাষণ প্ৰদান কৰি উৎসৱৰ সফল আয়োজনৰ বাবে সকলো অতিথি, বক্তা, আয়োজক আৰু অংশগ্ৰহণকাৰীক ধন্যবাদ জনায়। তেওঁ উল্লেখ কৰে যে আয়োজক দল, ফকেল আৰু ছাত্ৰ-ছাত্ৰীৰ উৎসাহৰ ফলতেই এই উৎসৱ বৃহৎ সফলতা লাভ কৰিছে। “আমাৰ ছাত্ৰ-ছাত্ৰীসকলেই এই উৎসৱৰ প্ৰধান শক্তি,” বুলি মন্তব্য কৰি তেওঁ ২০২৭ চনৰ ১৬ৰ পৰা ১৯ ফেব্ৰুৱাৰীলৈ চতুৰ্থ সংস্কৰণ অনুষ্ঠিত হ’ব বুলি ঘোষণা কৰে।বি. কল্যাণ চক্ৰৱৰ্তীয়ে অসমীয়া সাহিত্যিক ঐতিহ্য আৰু আঞ্চলিক আখ্যানসমূহৰ সাংস্কৃতিক সমৃদ্ধিৰ বিষয়ে
আলোকপাত কৰে। তেওঁ প্ৰতিবেদক আৰু স্বেচ্ছাসেৱকসকলৰ নিষ্ঠা আৰু পৰিশ্ৰমৰ প্ৰশংসা কৰি কয় যে ৬৮টা অধিৱেশনত ১২ হাজাৰৰো অধিক ছাত্ৰ-ছাত্ৰীৰ অংশগ্ৰহণে উৎসৱটোক এক অনন্য মাত্ৰা প্ৰদান কৰিলে।লেখিকা এন মৰগানে তিনিওটা সংস্কৰণত অংশগ্ৰহণ কৰাৰ অভিজ্ঞতা উল্লেখ কৰি অনুষ্ঠানৰ সৈতে জড়িত হ’ব পাৰি নিজকে সন্মানিত অনুভৱ কৰে বুলি কয়। ভাৰতলৈ প্ৰথমবাৰৰ বাবে আগতীয়াকৈ অহা শ্বেৰিফ বাকৰে আতিথ্য আৰু সাহিত্যিক আদান-প্ৰদানৰ অভিজ্ঞতাৰ বাবে কৃতজ্ঞতা প্ৰকাশ কৰে। মুৰ্জবান ফালি শ্ৰফে লেখকৰ সৃষ্টিশীল যাত্ৰা আৰু প্ৰকাশন প্ৰক্ৰিয়াৰ জটিলতা বিষয়ে আলোচনা কৰি কয় যে এখন গ্ৰন্থৰ জীৱন মাত্ৰ মুদ্ৰিত ৰূপতেই সীমাবদ্ধ নহয়।প্ৰধান অতিথি ডা° ৰণোজ পেগুৱে পাঠৰ ৰূপান্তৰকাৰী শক্তিৰ বিষয়ে আলোকপাত কৰি কয় যে লিখিত আখ্যানৰ সৈতে সম্পৃক্ততাৰ জৰিয়তে মানুহৰ মগজুৰ বিকাশ বিশেষভাৱে প্ৰভাৱিত হয়। পাঠকে কাহিনীৰ নায়কৰ অনুভৱৰ সৈতে একাত্ম হৈ সমালোচনামূলক আৰু সৃষ্টিশীল চিন্তা বিকাশ কৰে বুলি তেওঁ মন্তব্য কৰে। “বাসুধৈৱ কুটুম্বকম”—বিশ্ব এক পৰিয়াল—এই মূল দর্শন পুনৰ উল্লেখ কৰি তেওঁ সাহিত্যক সীমা অতিক্ৰম কৰা এক সংযোগৰ শক্তি বুলি অভিহিত কৰে। শেষত ডিব্ৰুগড় বিশ্ববিদ্যালয়ৰ পঞ্জীয়ক ডা° পৰমানন্দ সোণোৱালে শলাগ জ্ঞাপন কৰে। অসমৰ জাতীয় সংগীত পৰিৱেশনেৰে অনুষ্ঠানৰ সামৰণি কৰা হয়।
চাৰিদিনীয়া এই উৎসৱত ২৫খনৰো অধিক দেশৰ ১৫০ৰো অধিক লেখক, গৱেষক, শিল্পী আৰু সাংস্কৃতিক কৰ্মী অংশগ্ৰহণ কৰে আৰু ৬০ৰো অধিক অধিৱেশনৰ জৰিয়তে ১২ হাজাৰৰো অধিক অংশগ্ৰহণকাৰীৰ সৈতে মতবিনিময় হয়। সাহিত্য, পৰিচয়, অনুবাদ, 
প্ৰকাশন, ৰাজনীতি, সংগীত, স্মৃতি আৰু সমকালীন সামাজিক বাস্তৱতাৰ দৰে বিষয়সমূহত গভীৰ আলোচনা অনুষ্ঠিত হয়।
বিশেষকৈ “পৰিচয় আৰু অন্তৰ্ভুক্তি: আত্ম আৰু সমাজৰ সাহিত্যিক প্ৰতিফলন (Identity and Belonging: A Literary Reflection on Self and Society)” অধিৱেশনত পৰিচয়ক বহুস্তৰীয় আৰু ৰাজনৈতিকভাৱে গঠিত এক প্ৰক্ৰিয়া হিচাপে বিশ্লেষণ কৰা হয়। “শিশু সাহিত্য আৰু কাহিনী (Children’s Literature & Stories)” অধিৱেশনত শিশু সাহিত্যৰ গম্ভীৰতা আৰু দায়িত্বৰ ওপৰত গুৰুত্ব আৰোপ কৰা হয়। “শিশুৰ মাজত ব্যৱসায়িক চিন্তা বিকাশ (Developing Business Sense in Children)” অধিৱেশনত কাহিনীৰ জৰিয়তে উদ্যোগী মনোভাৱৰ পাঠ দিয়া হয়।
“অনুবাদ আমাৰ অধিকাৰ (Translation is Our Right and We’ll Have It)” অধিৱেশনত অনুবাদক সাংস্কৃতিক সংবেদনশীল সৃষ্টিশীল প্ৰক্ৰিয়া হিচাপে ব্যাখ্যা কৰা হয়। আনহাতে “লেখনী আৰু বজাৰ (Writing & The Market)” অধিৱেশনত প্ৰকাশন জগতৰ পৰিৱর্তন, ডিজিটেল মাধ্যমৰ প্ৰভাৱ আৰু সৃষ্টিশীলতা-বাণিজ্যৰ সমন্বয়ৰ বিষয়ত আলোচনা হয়। অংশগ্ৰহণকাৰীয়ে বাস্ক ‘Bertsolaritza’ মৌখিক পৰম্পৰা আৰু অসমীয়া কবিতা বিনিময়ৰ অভিজ্ঞতাও লাভ কৰে, যিয়ে বৈশ্বিক আৰু আঞ্চলিক সাহিত্যৰ মাজত এক সেতুবন্ধন সৃষ্টি কৰে।উল্লেখযোগ্য যে “মিডল ইষ্ট আৰু নৰ্থ আফ্ৰিকাৰ লেখনী (Writings from the Middle East and North Africa)” শীৰ্ষক বিষয়বস্তুৰে আয়োজিত এই উৎসৱে সমকালীন সাহিত্য, অনুবাদ, আদিবাসী কাহিনী আৰু বিশ্ব সাহিত্যিক প্ৰবণতাৰ ওপৰত বিস্তৃত আলোচনা আগবঢ়াই এক অন্তৰ্ভুক্তিমূলক সাংস্কৃতিক পৰিৱেশ গঢ়ি তুলিবলৈ সক্ষম হৈছে।