মৰাণত থকা জৰুৰীকালীন অৱতৰণ সুবিধা (ই এল এফ)

মৰাণত থকা জৰুৰীকালীন অৱতৰণ সুবিধা (ই এল এফ)

পৰিদৰ্শন মুখ্যমন্ত্ৰী ড° হিমন্ত বিশ্ব শৰ্মাৰ

চাইন অন ডেস্ক:

অসমৰ মুখ্যমন্ত্ৰী ড০ হিমন্ত বিশ্ব শৰ্মাই আজি মৰাণৰ জাতীয়নী গাঁৱত উপস্থিত হৈ ৰাষ্ট্ৰীয় ঘাইপথ ২ (ৰাষ্ট্ৰীয় ঘাইপথ”ত নিৰ্মাণ হৈ থকা জৰুৰীকালীন অৱতৰণ সুবিধা (ই এল এফ) পৰিদৰ্শন কৰে।

অতি সোনকালে ডিব্ৰুগড় জিলাৰ মৰাণৰ ঘাইপথৰ ষ্ট্ৰেচত ৰাফেল, এম আই জি, তেজাছ, হাৰকিউলিছ, এ এন-৩২ৰ দৰে যুঁজাৰু বিমান অৱতৰণ কৰিব পাৰিব। ই এক উল্লেখযোগ্য মাইলৰ খুঁটি, কিয়নো ভাৰতীয় বায়ুসেনাৰ যুদ্ধ বিমান আৰু হেলিকপ্টাৰে উচ্চ অসমৰ মৰাণ অঞ্চলৰ এই পথত অৱতৰণ আৰু উৰা মাৰিব পাৰিব।

২নং ৰাষ্ট্ৰীয় ঘাইপথৰ নিৰ্মাণাধীন ১১ কিলোমিটাৰ দৈৰ্ঘ্যৰ চাৰিলেনযুক্ত পথত খাটখাটি আৰু টিলয়জানৰ প’ল’কল ক্লাবৰ মাজত বিকশিত হৈ থকা ই এল এফ পৰিদৰ্শন কৰে মুখ্যমন্ত্ৰীয়ে। পোলকল ক্লাব আৰু ৰছিপথাৰৰ মাজৰ ৪.২ কিলোমিটাৰ দৈৰ্ঘ্যৰ অংশটো জৰুৰীকালীন অৱতৰণ অভিযানৰ বাবে উন্নত স্পেচিফিকেশনেৰে নিৰ্মাণ কৰা হৈছে।

যুদ্ধ বা প্ৰাকৃতিক দুৰ্যোগৰ সময়ত এই পথটো ক্ষীপ্ৰতাৰে ভাৰতীয় বায়ুসেনাৰ বাবে অস্থায়ী বিমানবন্দৰলৈ ৰূপান্তৰিত কৰিব পৰা যায়। মুঠ ১১ কিলোমিটাৰ দৈৰ্ঘ্যৰ ঘাইপথৰ ৪.২ কিলোমিটাৰ অংশত নিৰ্মিত ই এল এফক আধুনিক বৈশিষ্ট্যৰে নিৰ্মাণ কৰা হৈছে যাতে বিমানৰ উৰণ আৰু অৱতৰণ দুয়োটাতে সুবিধা হয়।

ৰাষ্ট্ৰীয় ঘাইপথ কৰ্তৃপক্ষ আৰু ভাৰতীয় বায়ুসেনাৰ বিমানবন্দৰ নিৰ্মাণ বিভাগৰ যৌথ পদক্ষেপ। কাৰ্য্যকলাপৰ সময়ত সুৰক্ষা নিশ্চিত কৰিবলৈ উৰণ আৰু অৱতৰণৰ সময়ত মানুহ বা পশুৰ অনুপ্ৰৱেশ ৰোধ কৰিবলৈ অস্থায়ী বেৰ স্থাপন কৰা হৈছে। এই সুবিধাৰ অংশ হিচাপে এয়াৰ ট্ৰেফিক কণ্ট্ৰল (এটিচি) টাৱাৰো নিৰ্মাণ কৰা হৈছে।

এই পথটো কেৱল জৰুৰীকালীন অৱস্থাত বিমান চলাচলৰ বাবেহে ব্যৱহাৰ কৰা হ’ব। সাধাৰণ পৰিস্থিতিত নিয়মীয়া ৰাজহুৱা পৰিবহণৰ বাবে খোলা থাকিব।

ইতিমধ্যে যোৱা ১ এপ্ৰিলৰ পৰা মৰাণ টাউনৰ পৰা টিলয়জানলৈকে ১১ কিলোমিটাৰ দৈৰ্ঘ্যৰ চাৰিলেনযুক্ত পথটো ৰাজহুৱা যাতায়তৰ বাবে মুকলি কৰা হৈছে।অচিৰেই প্ৰধানমন্ত্ৰী নৰেন্দ্ৰ মোদীয়ে আনুষ্ঠানিকভাৱে উদ্বোধন কৰাৰ সম্ভাৱনা আছে।